Imama 23 - Wunta Mempori

Oleo langkai

¹ Ondae i Ue mepau ndi Musa,

² ”Pepaumo a nto Isaraeli ka potaeako ira: Luwuno oleo langkai anu pinakosi-Do i Ue asalakono kai mento'orio gagi tepotowoa mempori. Luwuno oleo langkai anu Kupakosio onaemo kana tudano andio.

³ I larono onoo oleo anggaa moiko i'inangga, sine a oleo ko'opitu asalakono hinao saba, oleo penaa-naaa buke, asa oleo tepotowoa mempori. Maupo anggaa hapamokoa si me'anggao; onaemo saba ndi Ondae i Ue a luwuno po'iangamiu.

⁴ Ndiomo luwuno oleo langkai anu pinakosi-Do i Ue, luwuno oleo tepotowoa mempori, anu asalakono imento'orio menunu saru tempo anu pinakosi.

⁵ A wula amba-ambano, tanggala opaa wula atuu, i tempono ngkiniwia hinao Pasa ndi Ondae i Ue.

⁶ A oleo kohopulu ka olima wula atuu hinao oleo langkai Roti Nahi Peragi ndi Ondae i Ue. I larono opitu oleo asalakono impongkaa roti nahi peragi.

⁷ A oleo amba-ambano asalakono impoweweu tepotowoa mempori ka si mpo'angga maupo anggaa hapamokoa anu mobea.

⁸ Asalakono impopesombaako pesomba anu tinunu ndi Ondae i Ue i larono opitu oleo. A oleo ko'opitu asalakono hinao tepotowoa mempori ka omiu si mpo'angga maupo anggaa hapamokoa anu mobea.”

⁹ Ondae i Ue mepau ndi Musa,

¹⁰ ”Pepaumo a nto Isaraeli ka potaeako ira: Tewala mehawe komiu a wita anu Aku weeakomiu, ka mposowi hasilino, asalakono impowawa te'asa nte'u inso a hasilino amba-ambano sinowimiu a sando mpesomba.

¹¹ Sando mpesomba asalakono tumandeo te'uno atuu i aro-Do i Ue, ka Dotarima komiu koa i Ue. Asalakono kai tandeo sando mpesomba umarino oleo saba.

¹² A oleo imentandeo tine'u atuu asalakono impesombaakono asa bimba umuruno asa nta'u anu nahina tataano gagi pesomba tinunu ndi Ondae i Ue,

¹³ ka pesomba kaanga onaemo orua ntia hopulu efa tarigu moiko ntu'u, sinaloako lana gagi pesomba anu tinunu ndi Ondae i Ue, asa woono anu mompokomawongko, saru pesomba tinawa, onaemo asa ntia opaa hini anggoro.

¹⁴ Hawe oleo mbo'u atuu si mpokaa roti, ke gandu sinompui ke gandu wo'ohu, ranta kai mpowawamo pesombamiu ndi Ondae Ue Alamiu. Onaemo asa pompakosi ranta nahina tampulaano ndi omiu hawe a inulemiu a luwuno po'iangamiu.

¹⁵ Ka i'amba asalakono imedoao mompu'u inso a oleo umarino saba atuu, oleo imewawao tine'u pesomba tinande, opitu minggu buke

¹⁶ hawe oleo umarino saba ko'opitu, ka asalakono kai medoao lima pulu oleo. Ka i'amba mpesombaakono pesomba kaanga anu wo'ohu ndi Ondae i Ue.

¹⁷ Inso a mpo'iangamiu asalakono imewawao orua roti tandea anu wineweu inso a orua ntia hopulu efa tarigu moiko ntu'u ka anu tinunu umarino sinaloako ragi gagi wua amba-ambano ndi Ondae i Ue.

¹⁸ Meronga saru roti atuu asalakono impesombaakono opitu bimba umuruno asa nta'u anu nahina tataano, asa sapi lakino mongura ka orua bimba lakino. Luwuno atuu asalakono gagi pesomba tinunu ndi Ondae i Ue, meronga saru pesomba kaanga ka luwuno pesomba tinawa, asa pesomba tinunu anu woono mokomawongko Ira i Ue.

¹⁹ Ka i'amba asalakono mpesombaakono asa bembe lakino gagi pesomba po'onini hala ka orua bimba umuruno asa nta'u gagi pesomba tekaduduia.

²⁰ Sando mpesomba asalakono tumandeo luwuno atuu saru roti inso a wua amba-ambano atuu gagi pesomba tinande ndi Ondae i Ue, saru mbo'u orua bimba atuu. Luwuno atuu asalakono gagi pesomba mempori ndi Ondae i Ue ka gagi tiado sando mpesomba.

²¹ A oleo mbo'u atuu asalakono impaleleo tepotowoa mempori ka si mpo'angga maupo anggaa hapamokoa anu mobea ranta nahina tampulaano a luwuno po'iangamiu asa mpinu'umiu.

²² I tempono imensowio hasilino witamiu, siimo imensewoo leremiu kai pingko hawe a wiwino ka siimo imebinio hapa anu tebinta inso a mponsowiamiu. Luwuno atuu asalakono imebintaako ira mia mongkokolaro ka mia hawe. Ongkuemo Ue, Ue Alamiu.”

²³ Ondae i Ue mepau ndi Musa,

²⁴ ”Pauako ira to Isaraeli, kanandio: Tanggala asa wula ko'opitu, asalakono asa oleo atuu impokogagio oleo penaa-naaa ntu'u anu riname-rameako pompuuri tawuwua, asa tepotowoa mempori.

²⁵ Si mpo'angga maupo anggaa hapamokoa anu mobea ka asalakono impopesombaako pesomba ndi Ondae i Ue anu tinunu a api.”

²⁶ Ondae i Ue mepau ndi Musa,

²⁷ ”Sine a tanggala hopulu wula ko'opitu atuu onaemo oleo pesintuwua. Asalakono impoweweu tepotowoa mempori ka impe'urumako kai mempuasa saru mpopesombaako pesomba anu tinunu ndi Ondae i Ue.

²⁸ A oleo mbo'u atuu siimo impo'angga maupo anggaa hapamokoa. Onaemo atuu oleo pesintuwua kai mpoweweu pesintuwuamiu i aro-Do i Ue, Ue Alamiu.

²⁹ Menteeano, sompo mia anu a oleo atuu nahi pe'urumako saru mepuasa, asalakono pinokotampula inso i olodo mia pe'asa tongkuno.

³⁰ Sompo mia anu mo'angga maupo anggaa hapamokoa a oleo atuu, mia atuu Aku mepateo inso i tonga-tongano tongkuno.

³¹ Siimo impo'angga maupo anggaa hapamokoa. Onaemo asa pompakosi anu nahina tampulaano ndi omiu asa mpinu'u a luwuno po'iangamiu.

³² Onaemo atuu saba, oleo penaa-naaamiu ntu'u, ka asalakono impe'urumako saru mepuasa. Mompu'u a wongi tanggala osio wula atuu, inso a sumoono oleo hawe kai sumoo oleo, asalakono impelangkaio saba-Ku.”

³³ Mepau Ira i Ue ndi Musa,

³⁴ ”Pauako iramo to Isaraeli, kanandio: A oleo kohopulu ka olima wula ko'opitu onaemo oleo langkai-Do i Ue, oleo langkai Laika Lewe Ngkeu, opitu oleo tehineno.

³⁵ A oleo amba-ambano asalakono hinao tepotowoa mempori. Siimo impo'angga maupo anggaa hapamokoa anu mobea.

³⁶ I larono opitu oleo asalakono impopesombaako pesomba tinunu ndi Ondae i Ue, ka a oleo anu ko'oalu asalakono impoweweu tepotowoa mempori saru mpopesombaako pesomba tinunu ndi Ondae i Ue. Onaemo atuu tepumpua langkai. Siimo impo'angga maupo anggaa mobea hapa.

³⁷ Onaemo atuu luwuno oleo langkai anu pinakosi-Do i Ue, anu asalakono imento'orio gagi tepotowoa mempori kai mpopesombaako pesomba tinunu ndi Ondae i Ue, onaemo pesomba tinunu ka pesomba kaanga, pesomba sinumbele ka luwuno pesomba tinawa, montonda hadiono anu pinakosi sompo oleono.

³⁸ Umarino atuu hinao luwuno oleo saba-Do i Ue ka hinao mbo'u luwuno pesombamiu ke luwuno pesomba pontangamiu ke luwuno pesomba moleono aroamiu anu pinesombaakomiu ndi Ondae i Ue.

³⁹ Sine a oleo kohopulu ka olima wula ko'opitu atuu, i tempono imempumpuo hasilino witamiu, asalakono impoweweu porame-ramea ndi Ondae i Ue opitu oleo tehineno. A oleo amba-ambano asalakono hinao penaa-naaa ntu'u ka a oleo anu ko'oalu mbo'u hinao penaa-naaa ntu'u.

⁴⁰ A oleo amba-ambano asalakono impo'ala wua inso a luwuno keu anu moiko, popano keu koroma, sampa-sampano keu anu marombo ka inso a ngkeu gandarusa. Asalakono imemawongko i aro-Do i Ue, Ue Alamiu, opitu oleo tehineno.

⁴¹ Asalakono imerame-rameo gagi porame-ramea ndi Ondae i Ue opitu oleo tehineno i larono asa nta'u. Onaemo atuu asa pompakosi ndi omiu anu nahina tampulaano asa ntinuwu. A wula anu ko'opitu asalakono imerame-ameo.

⁴² Omiu asalakono mpo'ia a luwuno laika lewe ngkeu opitu oleo tehineno. Sompo bawaa ntu'u i Isaraeli asalakono mo'ia a luwuno laika lewe ngkeu,

⁴³ ka domento'orio inulemiu nine Kutena iramo to Isaraeli mpo'ia a luwuno laika lewe ngkeu tempono Kutaate ira umarido mpeluarako inso i wita Masiri. Ongkuemo Ue, Ue Alamiu.”

⁴⁴ Kanandiomo ipauako ira i Musa a nto Isaraeli pau mongkona luwuno oleo langkai anu pinakosi-Do i Ue.