Imama 22 - Wunta Mempori

Memporino pesomba

¹ Ondae i Ue mepau ndi Musa,

² ”Pauakonomo i Haruni ka luwuno anano, ka dompopetu'ui mongkona luwuno pesomba mempori anu dompokomemporia-Kune to Isaraeli, kasi domelaloo memporino nee-Ku anu mempori; Ongkuemo Ue.

³ Pauako iramo: Tiado luwuno anu mentuwu lembuino tewala asa mia inso a luwuno inulemiu aiwa umpeda a luwuno pesomba mempori anu dompokomemporiako Ira i Ue to Isaraeli, kahinaano onae tekonai mokoburu, manasa mia atuu ta pinokotampula inso i aro-Ku. Ongkuemo Ue.

⁴ Asa mia inso a inuleno i Haruni anu mohawe haki ngkuli mesaki ke anu moluarako uwoino, nahi moiko ipongkaa luwuno pesomba mempori, se'eluno napi pinokomanasa nahi mokoburu. Asa mia anu tepodanggi saru asa anu mokoburu hangano mia mate, ke mia anu meluarako uwoi anuno,

⁵ ke mia anu tepodanggiako asa kondehora melele kai gagi mokoburu ke i olono asa mia anu weweuo kai mokoburu, ke hapamokoa anu mokoburu, onae gagi mokoburu.

⁶ Mia anu tepodanggiako anu kanatuu gagi mokoburu hawe sumoo oleo. Onae si pongkaa inso a luwuno pesomba mempori ba napi wo'ohiakono uwoi koroino.

⁷ Tempono isumoo oleo, onae gagi nahi mokoburu ka umarino atuu moikoomo ipongkaa inso a luwuno pesomba mempori atuu, hangano onaemo kaangano.

⁸ Onae si pongkaa kondehora anu mate onaeno ke toreano kondehora lambaha, kasi gagi mokoburu hangano onae. Ongkuemo Ue.

⁹ Ondae asalakono mpe'ini mpiha ndi Ongkue, kasi domentehala a ngkoroido ka memate hangano halano. Hangano domelelaloomo memporino parenta atuu. Ongkuemo Ue anu mokomempori ira.

¹⁰ Sompo mia biasa si mpongkaa pesomba mempori; kanatuu koa mbo'u mia hawe anu mperato a sando mpesomba ke mia tinambo.

¹¹ Sine tewala asa mia umariomo inoliako doino sando mpesomba ta gagi atano, ka mia atuu moiko ipetonda mongkaa, kanatuu koa mbo'u ondae anu pine'anaako i rahano.

¹² Tewala anano sando mpesomba anu beine mekombiaako mia anu komba sando mpesomba ka inuleno, onae nahi moiko ipongkaa pesomba tiado sando mpesomba inso a luwuno pesomba mempori.

¹³ Sine tewala anano sando mpesomba anu beine atuu gagi tuwu beine, ke pinonsua, nahina anano, ka mekuleomo i rahano amano kana tempono da i'ana beine, moikoomo ipongkaa inso a ngkaangano amano. Sompo mia biasa nahi moiko ikaano.

¹⁴ Tewala asa mia nahi pe'inungakono mongkaa pesomba mempori, asalakono ipoweeakono euno a sando mpesomba saru tumiangio asa ntia olimano.

¹⁵ Luwuno sando mpesomba si dompolaloo luwuno pesomba memporido to Isaraeli anu dompesusuakono tiado i Ue,

¹⁶ hangano ondae ta mokomanasaako ira salado to Isaraeli anu asalakono tinolosi, tewala mpongkaa ira luwuno pesomba memporido. Menteeano Ongkuemo Ue anu mokomempori ira.”

¹⁷ Ondae i Ue mepau ndi Musa,

¹⁸ ”Pepaumo ndi Haruni ka a luwuno anano saru a luwuno to Isaraeli. Potaeako ira: Tewala asa mia inso a bawaa Isaraeli ka mia hawe i olodo to Isaraeli ta mompesombaako moiko pesomba pontanga maupo pesomba moleono aroa gagi pesomba tinunu ndi Ondae i Ue,

¹⁹ ka Dotarima komiu i Ue, asalakono pesomba atuu sapi lakino, bimba ke bembe nahina tataano.

²⁰ Luwuno anu hinao tataano si mpesombaako, hangano atuu nahi Dotarima komiu i Ue.

²¹ Tewala mbo'u asa mia mompesombaako ndi Ondae i Ue pesomba tekaduduia gagi po'owahi pontanga pinesusua, ke pesomba a moleono aroa inso a nsapi ke asa bawaa bembe bimba, pesomba atuu asalakono nahina tataano, ka Dotarimao koa i Ue; si hina maupo tedei tataano ndi onae.

²² Kondehora anu morawu ke tepudu wukuno, anu mobela ke mengkamba, anu mengkumbi ke merasa, luwuno atuu si mpesombaako ndi Ondae i Ue. Kondehora kanatuu si menaao gagi pesomba anu tinunu ndi Ondae i Ue i wawono meda pontunua pesomba.

²³ Sine asa sapi ke bimba anu ondau lahi ke owowa kae ka karuno, moiko ipesombaako gagi pesomba a moleono aroa, sine nahi pinesombaako gagi pesomba pontanga.

²⁴ Kondehora anu wuku nsu'uluino, tewombo, tepeha, teberi ke sinesei, si mpesombaakono ndi Ondae i Ue; si mpoweweu kanandio i witamiu.

²⁵ Maupo inso a ngkaedo mia hawe si mpesombaakono kondehora kanatuu gagi pesomba ndi Ondae Ue Alamiu, hangano luwuno masolaomo ka hinao tataano. Nahi Ira tumarima komiu i Ue hangano luwuno pesomba atuu.”

²⁶ Ondae i Ue mepau ndi Musa,

²⁷ ”Tewala asa anano sapi ke anano bimba ke anano bembe pine'anaako, asalakono opitu oleo tehineno ipo'ia saru ineno. Mompu'u ko'oalu oleono pinotuwu atuu moikoomo i gagi pesomba anu tinunu ndi Ondae i Ue.

²⁸ Asa sapi ke bembe ke bimba si mensumbeleo meronga saru anano a oleo anu mengkena.

²⁹ Tewala komiu mpopesombaako pesomba po'undemiu ndi Ondae i Ue, asalakono imensumbeleomo kanandio, ranta ka Dotarima komiu i Ue.

³⁰ A oleokoa mbo'u atuu asalakono kai kinaa pesomba atuu; si pinetorea maupo hapamokoa inso ndi onae hawe mo'oru; Ongkuemo Ue.

³¹ Asalakono impe'ini a parenta-Ku ka meweweuomo, Ongkuemo Ue.

³² Si melaloo memporino nee-Ku anu mempori, ka Kupinokomempori i tonga-tongado to Isaraeli, Ongkuemo Ue anu mokomempori komiu,

³³ anu wawa komiu mpeluarako inso i wita Masiri ka Kugagi Ue Alamiu; Ongkuemo Ue.”