Imama 20 - Wunta Mempori

Memporino bawaa-Do i Ue

¹ Ondae i Ue mepau ndi Musa,

² ”Omue asalakono mepau a nto Isaraeli: Sompo mia, moiko to Isaraeli maupo mia hawe anu mpo'ia i Isaraeli anu mompeweengako luwuno anano ndi Moloko, onae asalakono hinuku mate; palili i wita atuu asalakono wunoakono watu.

³ Ongkue isa'a anu umaropio mia atuu ka mokotampulao inso i tonga-tongano tongkuno. Hangano ipeweengakono asa inso a luwuno anano ndi Moloko saru tinoono weweuo mokoburu po'ianga mempori-Ku ka lumaloo memporino nee-Ku anu mempori.

⁴ Sine tewala palili wita mpo'ineeo mia atuu meweengakono asa inso a luwuno anano ndi Moloko ka nahi domehuku mateo mia atuu,

⁵ manasa Ongkue isa'a anu umaropio mia atuu saru asa nsomborino ka mokotampulao inso i tonga-tongano tongkuno saru luwuno mia anu tumondao mososabo, onaemo monsosabo mesombaio i Moloko.

⁶ Mia anu momperorohi a onituno mia mate ke a mia anu mompau anu ta gagi, monsosaboako pesikenono ndi ondae, Ongkue isa'a anu umaropio mia atuu ka mokotampulao inso i tonga-tongano tongkuno.

⁷ Asalakono impokomemporio koroimiu ka igagi mempori, hangano Ongkuemo Ue, Ue Alamiu.

⁸ Asalakono impe'ini a pompakosi-Ku ka imeweweuomo. Ongkuemo Ue anu mokomemporikomiu.

⁹ Tewala asa mia montutundali amano ke ineno, onae asalakono hinuku mate. Onae montutundaliomo amano ke ineno, asalakono reano itembio onaeno.

¹⁰ Tewala asa tama monsosabo saru kombiano mia susua, monsosabo saru kombiano pe'asa miano, moiko tama maupo beine anu monsosabo atuu asalakono hinuku mate.

¹¹ Tewala asa tama monsosabo saru kombiano amano, onae sumungkeo anuno amano. Orua ira asalakono hinuku mate, ka reado dotembio ondaedo.

¹² Tewala asa tama moturi saru ponino beine, kombiano anano tama, orua ira asalakono hinuku mate. Moweweu iramo anu nahi tekona; reado dotembio ondaedo.

¹³ Tewala asa tama moturi saru tama susua kana mewowaliako beine orua ira moweweu anu mokoburu. Ondae asalakono hinuku mate ka reado dotembio ondaedo.

¹⁴ Tewala asa tama mo'ala asa beine ka ineno, onae atuu moweweu mokoburu. Onae ka orua ira beine atuu asalakono tinunu, kasihina wineweu mokoburu i tonga-tongamiu.

¹⁵ Tewala asa tama mompewowaliako saru asa kondehora, asalakono kai hinuku mate, ka maupo kondehora atuu asalakono ipinepate.

¹⁶ Tewala asa beine morangkuhi kondehora maupo hapamokoa ka ipewowaliakono, beine ka kondehora atuu asalakono ipinepate. Ondae asalakono hinuku mate ka reado dotembio ondaedo.

¹⁷ Tewala asa tama mo'ala pepaekompono beine, anano amano ke anano ineno ka dopewowali, onae atuu asa mo'o'anua. Ondae asalakono pinokotampula i arodo luwuno mia pe'asa tongkudo. Mia atuu isungkeomo anuno pepaekompono beine, ka onae asalakono tumembio salano onaeno.

¹⁸ Tewala asa tama moturi saru asa beine anu tekonai i'aluo wulano, isungkeakono anuno beine atuu ka beine atuu sumungkeo mbo'u peluarakono rea ka tama atuu umungkahio pewaluno peluarakoano rea; orua ira asalakono pinokotampula inso i tonga-tongano tongkudo.

¹⁹ Si sungkeo anuno pepaekompo beine inemu ke pepaekompono beine amamu, hangano anuno pepaekompo onaeno anu inungkahino. Asalakono dotembio ondaedo salado.

²⁰ Tewala asa tama moturi saru kombiano pepaekompono amano, isungkeo anuno pepaekompono amano. Ondae ta tumembio halado ondaedo ka mate ira nahina anado.

²¹ Tewala asa tama mo'ala kombiano pepaekompono, onae atuu moweweu mokoburu, hangano isungkeo anuno pepaekompono tama. Ondae nahi ta me'ana.

²² Asalakono impe'ini a luwuno pompakosi-Ku a atora-Ku saru meweweuo luwuno atuu, kasi lua komiu wita ba isua Aku wawa komiu kai mpo'iangario.

²³ Si mentuwu mpotonda gaudo tongku anu Aku sumaari ira inso i aromiu. Hangano luwuno atuu domeweweuomo, ranta kai mokoburu-Ku kumita ira.

²⁴ Sine, ndi omiu mepau Akumo: Omiumo anu komiu mpetorokio witado ka Ongkuemo anu weeakomiu kai mpe'ueo, asa wita anu hadio ntu'u susu ka siu hoanino. Ongkuemo Ue, Ue Alamiu anu monsia komiu inso a luwuno tongku susua.

²⁵ Asalakono imposinggeo kondehora nahi mokoburu saru anu mokoburu, ka manu-manu anu mokoburu saru anu nahi mokoburu, kasi megagi mokoburu hangano kondehora mekaru opaa ka manu-manu saru luwuno anu melele a wawo wita, anu Kuponsiaomo gagi anu mokoburu ndi omiu.

²⁶ Omiu asalakono gagi mempori ndi Ongkue, hangano Ongkue andio Ue, mempori ka Kuponsia komiumo inso a luwuno tongku susua, kai megagi bawaa-Ku.

²⁷ Tewala asa tama ke beine mompoboi onituno mia mate ke penaa anu mompau hapa anu ta gagi, ondae asalakono hinuku mate, winunoako watu. Reado dotembio ondaedo.”