Imama 2 - Wunta Mempori

Pesomba kaanga

¹ ”Tewala asa mia ta mompesombaako pesomba kaanga ndi Ondae i Ue, asalakono pesombano atuu tarigu moiko ntu'u. Asalakono i tawao lana ka iponaakono dupa i wawono.

² Ka i'amba pesomba atuu iwawao a luwuno anano i Haruni, luwuno sando mpesomba atuu. Sando mpesomba mo'ala inso a mpesomba atuu asa raku tarigu, lana ka luwuno dupa, ka i'amba tumunuo luwuno atuu i wawono meda pontunua pesomba gagi pepopoto'ori, pesomba tinunuako api anu woono mokomawongkoo aroa-Do i Ue.

³ Pesomba kaanga toreano gagi tiano i Haruni saru luwuno anano, aasa ntia tedoa mempori inso a mpesomba tinunuako api ndi Ondae i Ue.

⁴ Tewala omue mopesombaako pesomba kaanga wua mpinopahomu a laro pontunua, asalakono inso a ntarigu moiko ntu'u atuu, kana roti bonggoli anu nahi peragi ka sinaloako lana, ke roti monipi nahi peragi ka hinahiako lana.

⁵ Tewala pesombamu pesomba kaanga anu tinunu a wawo mporaramia, asalakono atuu inso a ntarigu anu moiko ntu'u sinaloako lana ka nahi peragi.

⁶ Asalakono upole-poleo, ka i'amba tinawa lana i wawono. Onaemo pesomba kaanga.

⁷ Tewala pesombamu pesomba kaanga anu umari ninahu a ngkawali, asalakono atuu inso a ntarigu moiko ntu'u anu ninahuako lana.

⁸ Asalakono kau pesombaakono ndi Ondae i Ue pesomba kaanga anu ninahu kanatuu, kai pineweengako a nsando mpesomba anu ta wawao a meda pontunua pesomba.

⁹ Sando mpesomba asalakono monsiao tiano pepopoto'ori inso a mpesomba kaanga atuu, ka i'amba tumunuo i wawono meda pontunua pesomba gagi pesomba tinunuako api anu woono mokomawongkoo aroa-Do i Ue.

¹⁰ Pesomba kaanga toreano gagi tiano i Haruni ka luwuno anano, asa ntia tedoa mempori inso a mpesomba ndi Ondae i Ue anu tinunuako api.

¹¹ Sompo pesomba kaanga anu pinesombaakomiu ndi Ondae i Ue asalakono sinalo nahi peragi, hangano hapamo koa anu wineweu saru ragi ke siu hoani nahi moiko imentunuo gagi pesomba ndi Ondae i Ue anu tinunuako api.

¹² Sine omiu moiko impesombaakono ndi Ondae i Ue gagi pesomba inso a hasili amba-ambano, butumokoa si mewawao i wawono meda pontunua pesomba gagi woono anu mompokomawongko.

¹³ Sompo pesomba kaangamu asalakono imponaakono ohia. Si mengkolupeo ohia pedandia-Do Ue Alamu inso a mpesomba kaangamu. Ponaakonomo ohia a sompo pesombamu.

¹⁴ Tewala omue mompesombaako pesomba kaanga inso a wua amba-ambano ndi Ondae i Ue, asalakono upesombaakono wua gandu anu sinompui a wawo api, gandu wo'ohu anu inisa gagi pesomba kaanga inso a wua amba-ambano.

¹⁵ Asalakono ponaakono lana ka dupa i wawono. Onaemo pesomba kaanga.

¹⁶ Asalakono itunuo sando mpesomba gagi tia pepopoto'ori inso a gandu anu inisa atuu, lanano, saru luwuno dupano gagi pesomba ndi Ondae i Ue anu tinunuako api.”