Imama 19 - Wunta Mempori

Memporino tumuwu

¹ Ondae i Ue mepau ndi Musa,

² ”Pepaumo a luwuno bawaa Isaraeli ka potaeako ira: Asalakono kai memempori, hangano Ongkue Ue, Ue Alamiu mempori.

³ Sompo mia i olomiu asalakono pelangkaio ineno ka amano saru mekakaakono luwuno oleo saba-Ku. Ongkuemo Ue, Ue Alamiu.

⁴ Si mpewolili a luwuno lahumoa, ka si mpoweweu pesombaamiu susua anu tinawa. Ongkuemo Ue, Ue Alamiu.

⁵ Tewala komiu mpopesombaako pesomba tekaduduia ndi Ondae i Ue, asalakono impesombaakono kanandio, ka i'amba Dopekonokomiu i Ue.

⁶ Pesomba atuu asalakono kinaa a oleo impesombaakono ke tisomono, sine hapa anu torea hawe a oleo ko'otolu asalakono tinunu kai pingko.

⁷ Tewala kinaa mbo'u a oleo ko'otolu, asalakono atuu ta gagi asa anu mokoburu ka Ondae i Ue nahi Dopekonoo mia atuu.

⁸ Isema anu kumaano ta tumembio salano onaeno, hangano isosa'akiomo hapa anu mempori ndi Ondae i Ue. Mia atuu asalakono pinokotampula inso a tongkuno.

⁹ Tempono imposowi hasilino witamiu, siimo pingko imensewoo leremiu hawe a wiwino, ka siimo imebinio hapa anu tebinta inso a mposowiamiu.

¹⁰ Lere anggoromiu si me'opuo kompenduano hasilino ka wuano anu tedonta i lere anggoromiu si mebinio, sine luwuno atuu asalakono imembintao tiado mia mongkokolaro ka mia hawe. Ongkuemo Ue, Ue Alamiu.

¹¹ Si mponako, si mpegaupi, si mpopopo'oo pe'asa miamiu.

¹² Si mpesumpa nahi mentee a nee-Ku, kasi mensosa'ario nee-Do Ue Alamiu. Ongkuemo Ue.

¹³ Si mporontu a pe'asa miamiu nahi pototono ka si mporontu. Siimo unaao tambono asa mia mo'angga asa oleo hawe tisomo.

¹⁴ Si tutundalio mia mobongo ka i arono mia morawu si ponaa watu tetidua, sine asalakono imedoitoako Ira Ue Alamiu. Ongkuemo Ue.

¹⁵ Si memolengku a mpopaua kara-kara: si mpo'alaako mia mongkokolaro ke mentondao po'ehedo mia langkai potorono, sine asalakono impopau mentee kara-karado pe'asa miamiu.

¹⁶ Si melako ngkoraane ngkoramai mompalele petuluri i olodo mia pe'asa tongkumu; si mpokodoitoo tuwuno pe'asa miamu. Ongkuemo Ue.

¹⁷ Si o'aliaakono pepaekompomu i laro aroamu. Asalakono kuahakono pe'asa miamu i arono ka nahi poweweuakomu halamu hangano onae.

¹⁸ Siimo potuntu pobalasi, ka siimo ponaa-naa aroa a luwuno mia pe'asa tongkumu, tendeano pehohawaomo pe'asa miamu kana koroimu. Ongkuemo Ue.

¹⁹ Asalakono impe'ini a pompakosi-Ku. Si pompopokombia orua rupa pinotuwu, si mporawo i leremiu orua rupa inii ka si mpopake sangka anu wineweu inso a orua rupa sawuno.

²⁰ Tewala asa tama mewowaliako asa beine, asa ata anu pinatindaako tama susua sine napi tinolosi ka napi pinokomaradeka, manasa poweweu atuu asalakono hinuku. Sine kasi dohinuku mate orua ira, hangano beine atuu napi pinokomaradeka.

²¹ Tama atuu asalakono mowawa pontolosi salano ndi Ondae i Ue a mpewowano Kema Tepotowoa, onaemo asa bimba lakino gagi pesomba pontolosi sala.

²² Sando mpesomba asalakono moweweu pesintuwua tiano mia atuu mompake bimba lakino pesomba pontolosi sala ndi Ondae i Ue, hangano hala anu iweweuomo, ranta kai pohawe te'oninino halano atuu.

²³ Tewala mpewinso komiumo i wita atuu ka mpopaho mperupa-rupa pinopaho wua ngkeu, asalakono imentuduo luwuno wuano mokoburu. I larono otolu nta'u luwuno wua ngkeu atuu mokoburu ndi omiu ka si mengkaano.

²⁴ Sine ta'u anu ko'opaa luwuno wuano asalakono gagi pesomba mempori, asa po'unde-unde ndi Ondae i Ue.

²⁵ A nta'u ko'olima ka i'amba moiko impokaa wuano, kai mentiniangiako hasilino. Ongkuemo Ue, Ue Alamiu.

²⁶ Si mpongkaa hapa anu da hinao reano. Si mpoweweu pontasere ke mpopau anu ta gagi.

²⁷ Si mengkeruo wuu a wiwino ulumiu ka si mensolangio wiwino danggomiu.

²⁸ Si mensorekio koroimiu hangano mia mate ka si meduduhuo kulimiu gagi petondoni; Ongkuemo Ue.

²⁹ Si mensolangio memporino anamu beine ka impokogagio beine belesu, kasi mpoweweu pebelesua i wita atuu kai bukeako wineweu mokoburu.

³⁰ Asalakono impekakaakono luwuno oleo saba-Ku ka impelangkaio po'ianga mempori-Ku; Ongkuemo Ue.

³¹ Si mpewolili a onituno mia mate ke a luwuno penaa anu mompau hapa anu ta gagi; si me'ungke ira kai megagi mokoburu hangano ondae. Ongkuemo Ue, Ue Alamiu.

³² Omue asalakono impentade i arodo mia me'uwa, melangkai ira mia anu mota'u, ka doitoako Ira Ue Alamu. Ongkuemo Ue.

³³ Tewala asa mia hawe mo'ia ndi omiu i witamiu, si mempokonsiio.

³⁴ Mia hawe anu mo'ia ndi omiu asalakono imentuduo mengkena kana to Isaraeli ntu'u i olomiu. Impehohawaomo kana koroimiu, hangano i ndi'ipua omiu mbo'u mia hawe i wita Masiri; Ongkuemo Ue, Ue Alamiu.

³⁵ Si mpoweweu molengku a laro mpopaua kara-kara, mongkona posongka, pongkati, ka ponsa'u.

³⁶ Asalakono impopake timbanga ka watu timbanga anu mentee, efa ka hini anu mentee; Ongkuemo Ue, Ue Alamiu anu wawakomiu mpeluarako inso i wita Masiri.

³⁷ Kanandiomo asalakono impe'ini a luwuno pompakosi-Ku da luwuno parenta-Ku saru weweuo luwuno atuu; Ongkuemo Ue.”