Imama 18 - Wunta Mempori

Memporino pekombiaa

¹ Ondae i Ue mepau ndi Musa,

² ”Pepaumo a nto Isaraeli ka potaeako ira: Ongkuemo Ue, Ue Alamiu.

³ Siimo impoweweu kana anu wineweudo mia i wita Masiri a mpo'iangamiu i ndi'ipua. Siimo mbo'u impoweweu kana anu wineweudo mia i wita Kana'a ba isua Aku wawa komiu. Siimo imentuwu montonda gaudo.

⁴ Asalakono imeweweuo atora-Ku ka mpe'ini a pompakosi-Ku saru mentuwu mentondao luwuno atuu. Ongkuemo Ue, Ue Alamiu.

⁵ Mentee ntu'u omiu asalakono mpe'ini a pompakosi-Ku ka atora-Ku. Mia anu weweuo ta tuwu hangano onae. Ongkuemo Ue.

⁶ Isemamokoa i olomiu si pewowaliakono pe'etu umpedano kai sungkeo anuno. Ongkuemo Ue.

⁷ Si sungkeo anuno amamiu, ka sumungkeo anuno inemiu. Onae atuu inemiu, onaemo si sungkeo anuno.

⁸ Si sungkeo anuno kombiano amamu, hangano anu atuu anuno amamu.

⁹ Anuno pepaekompomu beine, moiko anano amamu maupo anano inemu, moiko anu hina i rahano amamu maupo anu hina a raha susua, si sungkeo anuno.

¹⁰ Anuno ana beine inso a anamu tama ke anamu beine, si sungkeo, hangano anumu omuemu.

¹¹ Anuno ana beine inso a asa kombiano amamu anu hina inso ndi amamu, si sungkeo anuno, hangano onae pepaekompomu beine.

¹² Si sungkeo anuno pepaekompono amamu anu beine, hangano onae pepaekompono amamu.

¹³ Si sungkeo anuno pepaekompono inemu anu beine, hangano onae pepaekompono inemu.

¹⁴ Si sungkeo anuno kombiano pepaekompono tama amamu, si pewowaliakono kombiano, hangano onae kombiano pepaekompono amamu.

¹⁵ Si sungkeo anuno ponimu beine, hangano onae kombiano anamu tama. Si sungkeo anuno.

¹⁶ Si sungkeo anuno kombiano pepaekompomu tama, hangano anu atuu sungkeo anuno tama.

¹⁷ Si sungkeo anuno asa beine ka anano beine. Si po'ala ana beine inso a anano tama ke inso a anano beine ka sungkeo anuno, hangano ondae rea ka ihimu. Wineweu atuu mokoburu.

¹⁸ Si alao pepaekompono beine kombiamu gagi samburueno kai sungkeo anuno i larono beineno atuu da tuwu.

¹⁹ Si rangkuhio beine tempono i'aluo wulano anu weweuo kai mokoburu kosungkeo anuno.

²⁰ Si pewowaliakono kombiano pe'asa miamu, ranta kau gagi mokoburu saru onae.

²¹ Si peweengakono aasa anamu inso a luwuno anamu kai pinesombaako ndi Moloko, kasi ulaloo memporino nee-Do Ue Alamu. Ongkuemo Ue.

²² Si poturi saru tama kana mewowaliako beine. Onae atuu asa anu mokoburu.

²³ Si pompewowaliako maupo kondehora hapamokoa, ranta kau gagi mokoburu saru kondehora atuu. Asa beine si pentade i arono asa kondehora ta mewowaliakono, hangano wineweu kanatuu nahi tekona.

²⁴ Si pokogagio mokoburu koroimiu inso a luwuno atuu, hangano atuu luwuno tongku anu Aku sumaario inso i aromiu, dompokomokoburuoomo koroido.

²⁵ Wita atuu gagiomo mokoburu ka Kupombaloakonomo salano ndi onae, ranta wita atuu lumua ira palilino.

²⁶ Sine, omiu asalakono mpe'ini mpiha a pompakosi-Ku ka atora-Ku, ka si mpoweweu maupo te'asa inso a luwuno anu mokoburu atuu, moiko bawaa ntu'u ke maupo mia hawe anu mpo'ia i tonga-tongamiu,

²⁷ hangano luwuno anu mokoburu atuu domeweweuomo palili wita se'eluno omiu, onaemo wita atuu gagi mokoburu,

²⁸ kasikoa luakomiu io wita atuu, tewala impokomokoburuo, kana umariomo iluakonomo tongku anu se'eluno omiu.

²⁹ Hangano sompo mia anu moweweu maupo hapamokoa inso a luwuno anu mokoburu atuu, mia atuu asalakono pinokotampula inso i tonga-tongano tongkuno.

³⁰ Onaemo pu'uno omiu asalakono me'inio anu lano tekona imeweweuo ndi Ongkue, kasi mpoweweu te'asa inso a gau anu mokoburu atuu, anu wineweudo se'eluno omiu, ka si meweweuo koroimiu mokoburuako luwuno atuu. Ongkuemo Ue, Ue Alamiu.”