Imama 16 - Wunta Mempori

Oleo langkai pesintuwua

¹ Umari mateano orua ira anano i Haruni, anu gagi tempono do'umpeda i aro-Do i Ue, mepau Iramo i Ue ndi Musa,

² Pau-Do i Ue ndi onae, ”Pauakonomo i Haruni, pepaekompomu kasi sompo tempo ipewinso a mpo'ianga mempori i bungkuno sawu pelingo, i arono tutuwino pesintuwua anu i wawono burua pedandia kasi mate. Hangano Aku mepopokita a laro nseru i wawono tutuwino pesintuwua atuu.

³ Kanandiomo i Haruni ba tamewinso i larono po'ianga mempori atuu, iwawao asa sapi laki mongura anu ta gagi pesomba po'onini hala ka asa bimba laki anu ta gagi pesomba tinunu.

⁴ Asalakono ipelembaako lemba lena meloae i larono anu mempori, mesaluara lena tumutuwiakono anuno, mompake peboontonga lena, ka metali uluako lena. Onaemo sangka mempori anu asalakono ipakeo, umarino iwo'ohiakono uwoi koroino.

⁵ Inso a bawaa Isaraeli onae asalakono mo'ala orua bembe lakino ta gagi pesomba po'onini hala ka asa bimba lakino ta gagi pesomba tinunu.

⁶ Ka i'amba i Haruni asalakono mompesombaako sapi lakino anu ta gagi pesomba po'onini halano ka kanandiomo ta gagi pesintuwua tiano ka somborino.

⁷ Onae asalakono umalao orua bembe lakino atuu ka iwawao i aro-Do i Ue i arono pewowano Kema Tepotowoa.

⁸ Asalakono ipontende undi a orua bembe lakino atuu, asa undi ndi Ondae i Ue ka asa mbo'u ndi Asaseli.

⁹ Ka i'amba i Haruni asalakono mompesombaako bembe lakino anu kona undi ndi Ondae i Ue ka iweweuo gagi pesomba po'onini hala.

¹⁰ Sine, bembe lakino anu kona undi ndi Asaseli asalakono ninaa kongko tuwu i aro-Do i Ue ta gagi pesintuwua, ka i'amba pinotolaako i Asaseli i pada one.

¹¹ I Haruni asalakono mompesombaako sapi lakino anu ta gagi pesomba po'onini halano onaeno ka moweweu pesintuwua tiano ka somborino. Asalakono isumbeleo sapi lakino atuu.

¹² Onae asalakono mo'ala pontunua anu bukeako waro api inso i wawono meda pontunua pesomba anu i aro-Do i Ue, saru asa raku buke dupa mo'ahi woono anu ginili ranta motutu, ka i'amba wawao mewinso i bungkuno pelingo.

¹³ Ka i'amba asalakono numaao dupa atuu a wawo api i aro-Do i Ue, ranta ahuno dupa atuu tumutuwio tutuwino pesintuwua anu i wawono songka-Do Ue Ala, kasi imate.

¹⁴ Asalakono kai po'ala tedei reano sapi lakino atuu ka itawisiakono wunga ngkaeno i wawono tutuwino pesintuwua i arono ka asalakono itawisiakono wunga ngkaeno tedei rea atuu pepitu i arono tutuwino pesintuwua atuu.

¹⁵ Umarino atuu onae asalakono sumumbeleo bembe lakino anu ta gagi pesomba po'onini halado tongku atuu ka wawao reano mewinso i bungkuno pelingo. Rea atuu asalakono wineweu kana iweweuo reano sapi lakino; asalakono itawisiakono i wawono ka i arono tutuwino pesintuwua atuu.

¹⁶ Kanandiomo iweweuo pesintuwua tiano po'ianga mempori atuu hangano luwuno mokoburudo to Isaraeli ka luwuno pe'ewado, maupo hapa halado. Asalakono kai kanandiomo iweweuo a Kema Tepotowoa anu mo'ia mpiha i olodo i tonga-tongano luwuno mokoburudo.

¹⁷ Si hina maupo te'asa mia kongko i larono Kema Tepotowoa, tempono ipewinso i Haruni ta moweweu pesintuwua a mpo'ianga mempori ranta kai peluarako umarino moweweu pesintuwua tiano onaeno, somborino ka tiado luwuno tungku Isaraeli.

¹⁸ Asalakono ka i'amba lumako i bungkuno a meda pontunua pesomba anu i aro-Do i Ue, ka iweweuo pesintuwua tiano meda pontunua pesomba. Asalakono kai po'ala tedei reano sapi lakino saru mbo'u reano bembe lakino atuu ka iponaakono limbu a ntandu-tanduno meda pontunua pesomba.

¹⁹ Asalakono itawisiakono wunga ngkaeno tedei rea atuu, pepitu a meda pontunua pesomba atuu ka nahi mokoburu saru mokomemporio inso a luwuno mokoburudo to Isaraeli.

²⁰ Mansano umari moweweu pesintuwua tiano po'ianga mempori ka Kema Tepotowoa saru meda pontunua pesomba, asalakono ipesombaakono bembe lakino anu da tuwu atuu.

²¹ I Haruni asalakono numaao orua kaeno a wawo uluno bembe lakino anu da tuwu atuu ka i wawono uluno bembe atuu imangakuakono luwuno salado to Isaraeli saru luwuno pe'ewado, maupo hapa mbo'u halado. Asalakono ipopotembiakono luwuno atuu a wawo uluno bembe lakino atuu ka i'amba motolao a mpada one molalo asa mia anu mepatindaomo atuu.

²² Kanandiomo bembe lakino atuu asalakono tumembio luwuno salado to Isaraeli a wita anu londa, ka bembe atuu asalakono pinotola i pada one.

²³ Umarino atuu i Haruni asalakono mewinso a laro Kema Tepotowoa ka ilohuo sangka lena anu pinakeno tempono ipewinso a mpo'ianga mempori ka asalakono ibintao i ra'ai.

²⁴ Asalakono koroino iwo'ohiakono uwoi i asa po'ianga anu mempori ka ipokonao sangkano onaeno. Ka i'amba meluarako ka mompesombaako pesomba tinunu anuno onaeno ka pesomba tinunu anudo tongku atuu. Kanandiomo iweweuo pesintuwua tiano onaeno ka tongku atuu.

²⁵ Asalakono kai tunuo tabano pesomba po'onini hala i wawono meda pontunua pesomba.

²⁶ Mia anu motolao bembe lakino tiano i Asaseli, asalakono ilomboo sangkano, koroino iwo'ohiakono uwoi, ka umarino atuu ka i'amba moikoomo ipewinso a mpekemaa.

²⁷ Sapi lakino ka bembe lakino pesomba po'onini hala, anu reano winawaomo mewinso ta wineweu pesintuwua a mpo'ianga mempori, asalakono winawa meluarako inso a mpekemaa. Kulino, bauno, ka ta'ino asalakono tinunu kai pingko.

²⁸ Isema anu tumunuo luwuno atuu, asalakono ilomboo sangkano, koroino iwo'ohiakono uwoi ka umarino atuu ka i'amba moikoomo ipewinso a mpekemaa.

²⁹ Onaemo andio anu asalakono gagi pompakosi ranta nahina tampulaano ndi omiu: a wula ko'opitu, tanggala hopulu wula atuu asalakono impe'urumako saru mempuasa ka si mpoweweu anggaa hapamokoa, maupo bawaa ntu'u ke maupo mia hawe anu mpo'ia i tonga-tongamiu.

³⁰ Hangano a oleo atuu asalakono wineweu pesintuwua tiamiu ka nahi mokoburu. Nami komiu memokoburu inso a luwuno halamiu i aro-Do i Ue.

³¹ Oleo atuu asalakono gagi oleo saba, oleo penaa-naaa buke, ndi omiu ka asalakono impe'urumako kai mempuasa. Onaemo pompakosi ranta nahina tampulaano.

³² Pesintuwua asalakono iweweuo sando mpesomba anu inurapiomo ka rinonso kai po'ini potoro sando mpesomba umeuo amano. Asalakono ipakeo sangka lena, sangka mempori.

³³ Onae asalakono moweweu pesintuwua tiano po'ianga tedoa mempori, Kema Tepotowoa ka meda pontunua pesomba, saru mbo'u tiado luwuno sando mpesomba ka luwuno tongku, bawaa atuu.

³⁴ Onaemo anu asalakono gagi pompakosi ranta nahina tampulaano ndi omiu, kai wineweu pohona asa nta'u pesintuwua tiado to Isaraeli hangano luwuno halado.” Onaemo kai weweuo i Haruni kana parenta-Do i Ue ndi Musa.