Imama 15 - Wunta Mempori

Nahi mokoburua tama ka beine

¹ Ondae i Ue mepau ndi Musa ka ndi Haruni,

² ”Ipepaumo a nto Isaraeli ka potaeako ira: Tewala anuno asa tama moluarako uwoino, manasa onae mokoburuomo hangano uwoino atuu.

³ Kanandiomo imokoburu mongkona nana atuu, moiko uwoino atuu meluarako inso a anuno ke te'onto a anuno, onaemo mokoburuano.

⁴ Sompo poturia anu ipoturiario mia anu meluarako uwoino atuu gagi mokoburu, ka sompo sangka anu pinentorokino gagi mokoburu mbo'u.

⁵ Sompo mia anu modanggi poturiano asalakono ilomboo sangkano, wo'ohiako uwoi koroino, ka onae gagi mokoburu hawe sumoo oleo.

⁶ Isema anu mentoro a wawo sangka anu pinentorokino mia anu meluarako uwoino, asalakono ilomboo sangkano, wo'ohiakono uwoi koroino, ka onae gagi mokoburu hawe sumoo oleo.

⁷ Isema anu dumanggio koroino mia anu meluarako uwoino, asalakono ilomboo sangkano, koroino iwo'ohiakono uwoi, ka onae gagi mokoburu hawe sumoo oleo.

⁸ Tewala mia anu meluarako uwoino mo'onui mia nahi mokoburu, mia andio asalakono ilomboo sangkano, koroino iwo'ohiakono uwoi, ka onae gagi mokoburu hawe sumoo oleo.

⁹ Sompo lampi anu pinentorokino mia anu moluarako nana gagi mokoburu.

¹⁰ Sompo mia anu modanggi maupo hapa anu ipentorokiomo mia hieno gagi mokoburu hawe sumoo oleo. Isema anu tumandeo, asalakono ilomboo sangkano, koroino iwo'ohiakono uwoi, ka onae gagi mokoburu hawe sumoo oleo.

¹¹ Sompo mia anu dinanggino mia anu meluarako uwoino maupo se'eluno nahi wo'ohiakono uwoi kaeno, mia anu dinanggi atuu asalakono ilomboo sangkano, koroino iwo'ohiakono uwoi, ka onae gagi mokoburu hawe sumoo oleo.

¹² Kuro wita anu dinanggino mia anu meluarako uwoino, asalakono pineha, ka sompo parewa keu asalakono wino'ohiako uwoi.

¹³ Tewala mia anu meluarako uwoino nami mokoburu inso a uwoino, asalakono idoao opitu oleo mbo'u kai pinokomanasa nami mokoburu, ka i'amba ilomboo sangkano, koroino iwo'ohiakono uwoi waa, ka i'amba gagi nahi mokoburu.

¹⁴ A oleo ko'oalu onae asalakono mo'ala orua manu-manu wurokou ke orua anano manu-manu marapati, ka i'aiwa i aro-Do i Ue, a mpewowa Kema Tepotowoa ka ipeweengakono manu-manu atuu a sando mpesomba.

¹⁵ Sando mpesomba asalakono mesombaakono, anu asa gagi pesomba po'onini hala ka anu asa mbo'u gagi pesomba tinunu. Kanandiomo sando mpesomba moweweu pesintuwua tiano mia atuu i aro-Do i Ue hangano uwoino.

¹⁶ Tewala asa tama te'uwu uwoi anuno, asalakono luwuno koroino iwo'ohiakono uwoi, ka onae gagi mokoburu hawe sumoo oleo.

¹⁷ Sompo sangka ka kuli anu ikonao uwoi anuno atuu asalakono wino'ohiako uwoi ka gagi mokoburu hawe sumoo oleo.

¹⁸ Tewala asa tama moturi saru asa beine ka ite'uwu uwoi anuno, asalakono orua ira dowo'ohiakono uwoi koroido, ka ondae gagi mokoburu hawe sumoo oleo.

¹⁹ Tewala asa beine meluarako uwoino ka uwoino atuu rea inso a anuno, asalakono i larono opitu oleo onae tekonai merege ka sompo mia anu dumanggio gagi mokoburu hawe sumoo oleo.

²⁰ Luwuakoano anu ipoturiario i larono ihaweo wulano gagi mokoburu, ka luwuakoano anu pinentorokino gagi mokoburu mbo'u.

²¹ Sompo mia anu dumanggio poturiano beine atuu asalakono ilomboo sangkano, koroino iwo'ohiakono uwoi ka onae gagi mokoburu hawe sumoo oleo.

²² Sompo mia anu dumanggio maupo sangka hapamokoa anu ipentorokio beine atuu asalakono ilomboo sangkano, koroino iwo'ohiakono uwoi ka onae gagi mokoburu hawe sumoo oleo.

²³ I tempono mbo'u ipodanggi anu kongko a mpoturia ke a wawo sangka anu pinentorokino beine atuu, onae gagi mokoburu hawe sumoo oleo.

²⁴ Tewala asa tama moturi saru beine atuu, ka i'aluo wulano beine atuu, asalakono onae gagi mokoburu i larono opitu oleo, ka sompo poturia anu ipoturiario gagi mokoburu mbo'u.

²⁵ Tewala asa beine tehine lahi ipeluarako rea anu komba tempono ihaweo wulano, ke tewala onae meluarako rea tehineopo sekono tempono ihaweo wulano, onaemo tempono ipeluarako rea mokoburu atuu, beine atuu mokoburu kana tempono ihaweo wulano.

²⁶ Sompo poturia anu ipoturiario tempono ipeluarako rea, asalakono gagi kana poturia tempono ihaweo wulano ka sompo sangka anu pinentorokino gagi mokoburu mengkena kana mokoburuno ihaweo wulano.

²⁷ Sompo mia anu dumanggio luwuno sangka atuu gagi mokoburu ka onae asalakono ilomboo sangkano, koroino iwo'ohiakono uwoi, ka onae gagi mokoburu hawe sumoo oleo.

²⁸ Sine tewala beine atuu nami mokoburu inso a peluarakono uwoino, asalakono idoao mbo'u opitu oleo, umarino atuu ka i'amba nami mokoburu.

²⁹ A oleo anu ko'oalu asalakono i'alao orua manu-manu wurokou ke orua anano manu-manu marapati ka iwawaomo ndi sando mpesomba a mpewowano Kema Tepotowoa.

³⁰ Sando mpesomba asalakono mesombaakono anu asa gagi pesomba po'onini hala ka anu asa mbo'u gagi pesomba tinunu. Kanandiomo iweweuo sando mpesomba pesintuwua tiano mia atuu i aro-Do i Ue, hangano uwoino anu mokoburu atuu.

³¹ Kanatuumo asalakono imeliahako ira to Isaraeli inso a mokoburua, kasi domemate i laro mokoburuado, ba domengkokoburutio Kema Mempori-Ku anu i tonga-tongado atuu.”

³² Onaemo songka mongkona asa tama anu meluarako uwoino ke meluarako uwoi anuno onaemo kai mokoburu,

³³ ka mongkona asa beine anu i'aluo wulano, mongkona mbo'u asa mia anu meluarako uwoino, moiko tama maupo beine, ka mongkona tama anu moturi saru beine anu mokoburu.