Imama 14 - Wunta Mempori

¹ Ondae i Ue mepau ndi Musa,

² ”Ndiomo songka mongkona mia anu mohawe haki ngkuli anu mesaki a oleo pepokomorinano: onae asalakono winawa a sando mpesomba,

³ ka sando mpesomba asalakono lumako i bungkuno pekemaa kai paresao. Tewala mengkaa mia atuu tompaomo inso a haki ngkuli anu mesaki atuu,

⁴ sando mpesomba asalakono meparenta, kai inalaako orua manu-manu anu tuwu ka nahi mokoburu tiano mia ta pinokotompa, saru mbo'u keu arasi, sawu motaha ntu'u ka hisopi.

⁵ Sando mpesomba asalakono meparenta kai manu-manu anu asa sinumbele i wawono kuro wita a wawo uwoi waa.

⁶ Sine manu-manu anu da tuwu asalakono i'alao saru keu arasi, sawu motaha ntu'u ka hisopi. Ka i'amba meronga saru manu-manu atuu luwuno asalakono i'emoo a laro reano manu-manu anu sinumbeleomo i wawono uwoi waa atuu.

⁷ Ka i'amba asalakono itawisiakono rea atuu pepitu a mia anu ta pinokotompa inso a haki ngkuli anu mesaki atuu ka kanandiomo onae pinokotompa. Ka i'amba manu-manu anu tuwu atuu asalakono pinotola a mpada.

⁸ Mia anu ta pinokotompa atuu asalakono molombo sangkano, kumeruo luwu wuuno ka iwo'ohiakono uwoi, onaemo ka igagi morina. Umarino atuu moikoomo ipewinso a laro mpekemaa, sine asalakono mo'ia i bungkuno kemano onaeno opitu oleo tehineno.

⁹ A oleo ko'opitu asalakono ikeruo luwu wuuno, moiko wuu a uluno, danggono, maupo kireno, tendeano wuluno, molombo sangkano ka koroino iwo'ohiakono uwoi; onaemo kai nahi mokoburu.

¹⁰ A oleo ko'oalu asalakono i'alao orua bimba lakino nahina tataano, asa bimba waino umuruno asa nta'u anu nahina tataano ka otolu ntia hopulu efa tarigu moiko ntu'u sinaloako lana gagi pesomba kaanga saru asa logi lana.

¹¹ Sando mpesomba anu mompokomanasa nahi mokoburu atuu asalakono numaao mia anu nahi mokoburu ka pesombano i aro-Do i Ue i arono pewowa Kema Tepotowoa.

¹² Sando mpesomba asalakono umalao bimba lakino anu asa ka ipesombaakono gagi pesomba pontolosi sala meronga saru lana anu asa logi atuu, ka i'amba mesombaakono gagi pesomba tinande i aro-Do i Ue.

¹³ Bimba lakino atuu asalakono isumbeleo a mpo'iangado mia wela mposumbele pesomba po'onini hala ka pesomba tinunu a mpo'ianga mempori. Hangano pesomba pontolosi sala, kanatuu koa mbo'u pesomba po'onini hala, onaemo tiado sando mpesomba; onaemo anu tedoa mempori.

¹⁴ Sando mpesomba asalakono mo'ala tedei reano pesomba pontolosi sala atuu ka iponaakono a lewe biri koanano mia anu ta pinokomanasa nahi mokoburu ka a ine ntoniso kae ngkoanano saru mbo'u a ine ntoniso karu koanano.

¹⁵ Sando mpesomba asalakono mo'ala tedei lana anu asa logi atuu ka itawao a pelengkae manggalino onaeno,

¹⁶ i'emoo wungangkae koana a lana anu a pelengkae manggalino atuu ka metawisiako tedei lana atuu saru tonisono pepitu i aro-Do i Ue.

¹⁷ Toreano inso a lana atuu asalakono sando mpesomba monaakono tedei a lewe biri ngkoanano mia atuu, a ine ntoniso kae koanano ka a ine ntoniso karu ngkoanano a mpo'ianga ipinonaako reano pesomba pontolosi sala.

¹⁸ Lana anu torea a pelengkaeno asalakono inaao a uluno mia anu ta pinokomanasa nahi mokoburu. Kanandiomo sando mpesomba moweweu pesintuwua tiano mia atuu i aro-Do i Ue.

¹⁹ Sando mpesomba asalakono mesombaakono pesomba po'onini hala ka kanandiomo iweweuo pesintuwua tiano mia anu ta pinokomanasa nahi mokoburu inso a mokoburuano. Umarino atuu asalakono isumbeleo pesomba tinunu.

²⁰ Ka i'amba sando mpesomba asalakono mesombaakono pesomba tinunu ka pesomba kaanga a wawo meda pontunua pesomba. Kanandiomo sando mpesomba moweweu pesintuwua tiano mia atuu kai gagi nahi mokoburu.

²¹ Tewala mia atuu mongkokolaro ka nahi polio, asalakono ipo'ala te'asamokoa bimba laki gagi pesomba pontolosi sala weweua pesomba tinande kai wineweu pesintuwua tiano mia atuu; asa ntia hopulu efa mbo'u tarigu moiko ntu'u sinaloako lana weweua pesomba kaanga ka asa logi lana,

²² saru orua manu-manu wurokou ke orua manu-manu marapati pototono pompolino. Manu-manu anu asa gagi pesomba po'onini hala ka anu asa mbo'u gagi pesomba tinunu.

²³ A oleo ko'oalu asalakono iwawao luwu a sando mpesomba anu ta pinokomanasa nahi mokoburu, i arono pewowa Kema Tepotowoa i aro-Do i Ue.

²⁴ Sando mpesomba asalakono umalao pesomba pontolosi sala ka lana anu asa logi atuu, ka i'amba mesombaakono luwu gagi pesomba tinande i aro-Do i Ue.

²⁵ Asalakono isumbeleo bimba pesomba pontolosi sala ka mo'ala tedei reano pesomba pontolosi sala atuu ka inaakono a lewe biri koanano mia atuu ka a ine ntoniso kae koanano saru mbo'u a ine ntoniso karu koanano.

²⁶ Sando mpesomba asalakono montawa tedei lana atuu a pelengkae manggalino onaeno,

²⁷ ka i'amba tedei lana a pelengkae manggalino atuu itawisiakono toniso koanano pepitu i aro-Do i Ue.

²⁸ Ka i'amba sando mpesomba asalakono monaakono tedei lana inso a pelengkaeno atuu a lewe biri koanano mia anu ta pinokomanasa nahi mokoburu ka a ine ntoniso kae koanano saru mbo'u a ine ntoniso karu koanano, a mpo'ianga ipinonaako reano pesomba pontolosi sala.

²⁹ Toreano lana inso a pelengkaeno, asalakono inaakono a uluno mia anu ta pinokomanasa nahi mokoburu, kai wineweu pesintuwua tiano mia atuu i aro-Do i Ue.

³⁰ Ka i'amba asalakono ipesombaakono asa inso a manu-manu wurokou orua ke anano manu-manu marapati anu winawano mia atuu menunu pompolino.

³¹ Anu asa gagi pesomba po'onini hala ka anu asa mbo'u gagi pesomba tinunu, saru mbo'u pesomba kaanga. Kanandiomo iweweuo sando mpesomba pesintuwua tiano mia anu ta pinokomanasa nahi mokoburu i aro-Do i Ue.

³² Onaemo songka mongkona pompokomanasa nahi mokoburu mia mohawe haki ngkuli anu mesaki anu nahi mompoli.”

³³ Ondae i Ue motae ndi Musa, ka i Haruni,

³⁴ ”Tewala mpewinso komiu i wita Kana'a anu Aku weeakomiu gagi pe'ueamiu ka mompotii Aku petondoni haki mesaki i asa raha i wita tiamiu atuu,

³⁵ ueno raha atuu asalakono aiwa pauakono sando mpesomba: Kukitao kana tondonino haki mesaki i rahaku.

³⁶ Asalakono sando mpesomba mbo'u meparenta ka dompokomoao raha atuu, se'eluno napi hawe paresao tondonino haki mesaki atuu, kasi luwuno anu kongko a raha atuu pinokomanasa mokoburu. Umarino atuu ka i'amba sando mpesomba aiwa paresao raha atuu.

³⁷ Tewala montonda pomparesano tondonino a rereno raha atuu kana melengku-lengku mololowulu ke mororontaha ka tengkita ondaloopo inso a rere atuu,

³⁸ sando mpesomba asalakono meluarako inso a raha atuu kai pentade i arono pewowano raha ka itondoo raha atuu opitu oleo tehineno.

³⁹ A oleo ko'opitu sando mpesomba asalakono wali aiwa kai paresao. Tewala mengkaa tondonino haki mesaki atuu tetiangi maluano a rereno raha,

⁴⁰ sando mpesomba asalakono meparenta kai luwuno watu anu kona tondonino atuu hinunggei kai tinadi i bungkuno kota a mpo'ianga anu mokoburu.

⁴¹ Asalakono ikeruwio limbu rereno i larono raha atuu ka wita kineruwi asalakono tinadi i bungkuno kota a mpo'ianga anu mokoburu.

⁴² Mia asalakono mpo'ala watu susua ka i'amba pasao gagi euno luwuno watu hieno, ka asalakono mpo'ala wita susua kai inapii rereno raha atuu.

⁴³ Sine tewala tondonino atuu saaba mbo'u i laro raha atuu umarino hinunggei luwuno watu ka rereno raha atuu kineruwi, tendeano inapii mbo'u,

⁴⁴ asalakono sando mpesomba aiwa paresao. Tewala mengkaa tondonino atuu tetiangi maluano i laro raha; onaemo atuu haki mesaki anu mongkokongiri i raha atuu. Raha atuu mokoburu.

⁴⁵ Raha atuu, watuno, keuno ka luwuno wita apiino asalakono rinongka, ka i'amba winawa i bungkuno kota, a mpo'ianga anu mokoburu.

⁴⁶ Mia anu mewinso a laro raha atuu tempono raha atuu tinondo gagi mokoburu hawe kai sumoo oleo.

⁴⁷ Mia anu moturi i raha atuu asalakono molombo sangkano; mia mbo'u anu mongkaa i raha atuu asalakono molombo sangkano.

⁴⁸ Sine tewala aiwa sando mpesomba kai paresao ka mengkaa tondonino atuu nahi tetiangi maluano i laro raha atuu, umarino inapii rereno, asalakono sando mpesomba mokomanasao raha atuu nahi mokoburu, hangano tondonino atuu tetadiomo.

⁴⁹ Ka i'amba ta pinokomempori raha atuu, asalakono onae mo'ala orua manu-manu, keu arasi, sawu motaha ntu'u ka hisopi.

⁵⁰ Manu-manu anu aasa asalakono isumbeleo i wawono kuro wita i wawo uwoi waa.

⁵¹ Ka i'amba umalao keu arasi, hisopi, sawu motaha ntu'u ka manu-manu anu da tuwu atuu kai emoo luwuno a reano manu-manu anu sinumbeleomo ka a uwoi anu waa atuu, ka i'amba tumawisio luwuno raha atuu pepitu.

⁵² Kanandiomo raha atuu ipokomemporiakono reano manu-manu, uwoi waa, manu-manu anu tuwu, keu arasi, hisopi, ka sawu motaha ntu'u.

⁵³ Sine manu-manu anu tuwu pinotola i bungkuno kota a mpada. Kanandiomo iweweuo pesintuwua tiano raha atuu ka raha mbo'u atuu nahi mokoburu.

⁵⁴ Onaemo songka mongkona sompo haki ngkuli anu mesaki, kumbi ulu,

⁵⁵ haki mesaki a sangka ka a raha,

⁵⁶ mongkona kamba, tangkulobo ka meloba mopute,

⁵⁷ anu mompowee pontiso mongkona kana'umpe asa rupa atuu mokoburu ke nahi mokoburu; Onaemo songka mongkona haki mesaki.”