Imama 13 - Wunta Mempori

Haki ngkuli anu mesaki

¹ Ondae i Ue mepau ndi Musa ka ndi Haruni,

² ”Tewala a ngkulino asa mia hinao mempiho ke tangkulobo, ke meboti-boti anu ta gagi haki ngkuli anu mesaki, asalakono kai winawa ndi sando mpesomba Haruni, ke ndi asa i olodo luwuno anano, sando mpesomba atuudo.

³ Asalakono sando mpesomba paresao haki a ngkuli atuu. Tewala wulu a mpo'iangano haki atuu baliomo gagi mopute, ka haki atuu tengkita ondaloopo inso a ngkuli, manasa atuu onaemo haki ngkuli anu mesaki. Tewala ikitao sando mpesomba mongkona atuu, asalakono ipokomanasaomo mia atuu mokoburu.

⁴ Sine tewala anu hina a ngkulino atuu butu meloba-loba mopute ka nahi tengkita ondaloopo inso a ngkuli, wuluno mbo'u nahi bali gagi mopute, sando mpesomba asalakono umukoo mia atuu opitu oleo tehineno.

⁵ Ko'opitu oleono asalakono sando mpesomba paresao. Tewala montonda pongkitano haki atuu da mengkena mpiha ka nahi tetiangi maluano a ngkuli, asalakono sando mpesomba umukoo anu kompenduano opitu oleo mbo'u.

⁶ Ka i'amba a oleo anu ko'opitu, asalakono sando mpesomba paresao anu kompenduano. Tewala haki atuu nami tengkita lahi ka nami tetiangi maluano a ngkuli, sando mpesomba asalakono mokomanasao onae nami mokoburu; atuu butu metangkulobo. Mia atuu asalakono lumomboo sangkano ka onae nami mokoburu.

⁷ Sine tewala tangkulobo atuu tetiangi malua a ngkuli, umarino iparesao sando mpesomba kai pokomanasao nami mokoburu, asalakono ipinaresa mbo'u.

⁸ Tewala montonda pomparesano sando mpesomba tangkulobo atuu tetiangi malua a ngkuli, sando mpesomba asalakono mokomanasao onae mokoburu; haki atuu haki mesaki.

⁹ Tewala asa mia mohawe haki ngkuli anu mesaki, asalakono kai winawa ndi sando mpesomba.

¹⁰ Tewala montonda pomparesano sando mpesomba a ngkulino hinao mempiho anu bali wuluno gagi mopute ka hinao ihi anu mebunsu a ngkamba atuu,

¹¹ manasa atuu haki ngkuli anu ta tehine a ngkulino. Sando mpesomba asalakono mokomanasao mia atuu mokoburu maupo nahi i'inuko, hangano mia atuu lano mokoburuomo.

¹² Tewala haki ngkuli anu mesaki atuu me'umbaako hadio mo'ia a ngkuli, ranta kai tutuwio luwuno kulino mia atuu inso a uluno hawe a ngkaruno, hawe anu pinokokitano sando mpesomba,

¹³ ka montonda pomparesano haki ngkuli anu mesaki atuu tumutuwio asa ngkoroino mia atuu, onaemo kai pokomanasao sando mpesomba onae nami mokoburu. Asa ngkoroino baliomo gagi mopute, gagi onae nami mokoburu.

¹⁴ Sine i tempono tengkita ihi mebunsu ndi onae, onae mokoburuomo.

¹⁵ Tewala ikitao sando mpesomba ihi me'untuako atuu, asalakono ipokomanasao mia atuu mokoburu, hangano ihi mebunsu atuu mokoburu, ka onaemo haki ngkuli anu mesaki.

¹⁶ Ke tewala ihi mebunsu atuu tenono ka bali gagi mopute, mia atuu asalakono aiwa ndi sando mpesomba.

¹⁷ Tewala montonda pomparesano haki ngkuli atuu baliomo gagi mopute, asalakono sando mpesomba mokomanasao mia atuu nami mokoburu; lano onae nami mokoburu.

¹⁸ Tewala a ngkulino asa mia hinao kamba anu tompaomo,

¹⁹ sine a mpo'iangano kamba atuu mempiho ke meloba mopute motaha-taha, mia atuu asalakono mepeparesa a sando mpesomba.

²⁰ Tewala montonda pomparesano meloba mopute atuu tengkita ondaloopo sekono kuli ka wuluno baliomo gagi mopute, asalakono sando mpesomba mokomanasao mia atuu mokoburu, hangano haki ngkuli mesaki anu tuwu a mpo'iangano kamba atuu.

²¹ Sine tewala loba atuu iparesao sando mpesomba ka nahina wulu mopute ndi onae ka nahi tetiangi ondalono inso a ngkuli, tendeano nami tengkita, asalakono sando mpesomba umukoo mia atuu opitu oleo tehineno.

²² Tewala loba mopute atuu lano tetiangi a ngkuli, sando mpesomba asalakono mokomanasao onae mokoburu; onae atuu haki ngkuli anu mesaki.

²³ Sine, tewala loba mopute atuu da mengkena mpiha ka nahi tetiangi maluano, manasa atuu butu pelarano kamba, ka sando mpesomba asalakono mokomanasao mia atuu nami mokoburu.

²⁴ Ke tewala a ngkulino asa mia molobaako api ka ihi anu me'untu a moloba atuu gagi meloba mopute motaha-taha ke mopute,

²⁵ asalakono sando mpesomba iparesao meloba atuu. Tewala mengkaa wulu a meloba atuu baali gagi mopute ka meloba atuu tengkita ondaloopo inso a ngkuli, manasa anu tuwu a loba atuu onaemo haki ngkuli anu mesaki, ka sando mpesomba asalakono ipokomanasao mia atuu mokoburu; onaemo atuu haki ngkuli anu mesaki.

²⁶ Sine tewala montonda pomparesano nahina a meloba atuu wulu anu mopute ka meloba atuu nahi ondaloopo sekonopo kuli, tendeano nami tengkita, sando mpesomba asalakono umukoo mia atuu opitu oleo tehineno.

²⁷ Ko'opitu oleono sando mpesomba asalakono iparesao mbo'u mia atuu. Tewala meloba atuu tetiangi maluano a ngkuli, sando mpesomba asalakono mokomanasao onae mokoburu; onaemo atuu haki ngkuli anu mesaki.

²⁸ Sine tewala meloba atuu da mengkena mpiha ka nahi tetiangi malua a ngkuli, tendeano tengkita, onae atuu butu kamba moloba ka sando mpesomba asalakono mokomanasao onae nahi mokoburu, hangano atuu butu pelarano moloba.

²⁹ Tewala asa tama ke beine mohawe haki a uluno ke a aseno,

³⁰ sando mpesomba asalakono paresao hakino atuu. Tewala tengkita ondaloopo inso a ngkuli ka ndi onae hinao wuu motutu anu mongkuni, sando mpesomba asalakono mokomanasao mia atuu mokoburu. Onaemo atuu kumbi, haki ngkuli anu mesaki a ulu ke a ase.

³¹ Tewala montonda pomparesano haki kumbi atuu nahi tengkita ondaloopo inso a ngkuli ka nahina ndi onae wuu mo'ito, sando mpesomba asalakono umukoo mia anu kona haki kumbi atuu opitu oleo tehineno.

³² Ko'opitu oleono sando mpesomba asalakono paresao haki atuu. Tewala mengkaa kumbi atuu nahi tetiangi maluano ka nahina wuu anu mongkuni ndi onae, kumbi mbo'u atuu nahi tengkita ondaloopo inso a ngkuli,

³³ mia atuu asalakono mekeru, butumo koa po'iangano kumbi atuu nahi moiko ikineru. Sando mpesomba asalakono umukoo mia anu kona kumbi atuu anu kompenduano opitu oleo mbo'u.

³⁴ Ka i'amba a oleo ko'opitu sando mpesomba asalakono paresao mbo'u kumbi atuu. Tewala mengkaa kumbi atuu nahi tetiangi maluano a ngkuli ka nahi tengkita ondaloopo inso a ngkuli, asalakono sando mpesomba mokomanasao mia atuu nahi mokoburu. Asalakono ilomboo sangkano, kai nahi mokoburu.

³⁵ Sine tewala kumbi atuu tetiangi maluano a ngkuli, umarino pinokomanasa onae nahi mokoburu,

³⁶ sando mpesomba asalakono paresao mbo'u. Tewala tengkita kumbi atuu tetiangi maluano a ngkuli, sando mpesomba siimo mbo'u ipo'ungke wuu anu mongkuni; mia atuu mokoburu.

³⁷ Sine tewala montonda pongkitano sando mpesomba kumbi atuu da mengkena mpiha, ka hinao wuu mo'ito tuwu a ngkumbi atuu, manasa kumbi atuu tompaomo. Mia atuu nahi mokoburu, ka asalakono sando mpesomba mokomanasao nahi mokoburu.

³⁸ Tewala a ngkulino asa tama ke beine hinao meloba-loba, onaemo meloba-loba mopute,

³⁹ asalakono sando mpesomba moweweu pomparesaa. Tewala mengkaa a ngkulino hinao meloba-loba nahi tengkita ka mopute, anu atuu butu koa pilangga anu tuwu a ngkulino ka mia atuu nahi mokoburu.

⁴⁰ Tewala wuu a uluno asa tama ronta ka i butu londa ulu, mia atuu nahi mokoburu.

⁴¹ Tewala wuuno ronta i arono ka igagi londa i arono, mia atuu nahi mokoburu.

⁴² Sine tewala a uluno anu londa atuu, i wawono ke i ra'ino, hinao haki anu mopute motaha-taha, manasa onaemo haki ngkuli mesaki anu tuwu a uluno anu londa atuu.

⁴³ Asalakono sando mpesomba paresao. Tewala mengkaa kamba a uluno anu londa atuu mopute motaha-taha ka tengkita kana haki mesaki a ngkuli,

⁴⁴ mia atuu mohawe haki ngkuli anu mesaki ka onae mokoburu. Asalakono sando mpesomba mokomanasao onae mokoburu, hangano hakino a uluno atuu.

⁴⁵ Mia anu mohawe haki ngkuli anu mesaki asalakono mompokona sangka teberi-beri, wuuno nahi te'atora ka onae mbo'u asalakono tumutuwio i totono rupano kai peboo-booli: mokoburu, mokoburu!

⁴⁶ Tempono da imahaki atuu onae mokoburu mpiha. Onae mokoburu ka asalakono mo'ia tensia i bungkuno pekemaa.

⁴⁷ Tewala hinao tondonino haki ngkuli anu mesaki a sangka, moiko sangka wulu bimba ke lena,

⁴⁸ maupo bana mentadeano ke bana montoweano, sangka lena ke wulu bimba, maupo a ngkuli ke hapamo koa inso a ngkuli,

⁴⁹ tewala tondonino luwuno sangka ke a ngkuli, bana mentadeano ke montoweano, maupo sangka hapa inso a ngkuli atuu mololowulu ke mororontaha, onaemo atuu haki ngkuli anu mesaki, ka asalakono pinopokitaako sando mpesomba.

⁵⁰ Tewala tondonino atuu umariomo iparesao sando mpesomba, luwuno atuu anu hinao tondonino asalakono liniahako opitu oleo tehineno.

⁵¹ Ko'opitu oleono asalakono iparesao mbo'u tondonino atuu. Tewala tondonino atuu tetiangi maluano a sangka, bana mentadeano ke bana montoweano ke a ngkuli, ta pombiomokoa kuli atuu, onaemo haki ngkuli anu mesaki anu mongkokongiri ka luwuno atuu mokoburu.

⁵² Asalakono itunuo sangka atuu, bana mentadeano ke montoweano, wulu bimba ke lena ke maupo hapamokoa inso a ngkuli anu hinao tondonino atuu, hangano haki atuu haki ngkuli mesaki anu mongkokongiri. Luwuno atuu asalakono tinunu kai pingko.

⁵³ Sine tewala montonda pomparesano sando mpesomba tondonino nahi tetiangi maluano a sangka atuu, a bana mentadeno ke bana montoweano ke maupo hapamokoa inso a ngkuli,

⁵⁴ asalakono sando mpesomba meparenta kai wino'ohi sangka anu hinao tondonino atuu, ka i'amba liniahako opitu oleo tehineno anu kompenduano.

⁵⁵ Umari wino'ohi sangka atuu, sando mpesomba asalakono paresao mbo'u tondonino atuu. Tewala mengkaa sorano tondonino atuu nahi bali, maupo nahi tetiangi maluano, sangka atuu mokoburu ka asalakono tunuo luwu kai pingko, hangano tondonino atuu lompahiomo hawe i bungkuno ke i arono.

⁵⁶ Tewala montonda pomparesano sando mpesomba tondonino atuu nami tengkita umarino wino'ohi, asalakono kai berio inso a sangka, kuli, bana mentadeano ke bana montoweano.

⁵⁷ Sine tewala tondonino atuu tengkita mbo'u a sangka ke a bana mentadeano, bana montoweano, ke maupo hapamokoa inso a ngkuli, onaemo atuu tondonino anu mesaki. Hapamokoa anu hinao tondonino atuu asalakono tunuo kai pingko.

⁵⁸ Sine sangka ke bana mentadeano, bana montoweano ke maupo hapamokoa inso a ngkuli anu umariomo wino'ohi ranta tondonino atuu nami hina ndi onae, asalakono wino'ohi anu kompenduano ka i'amba nahi mokoburu.

⁵⁹ Onaemo songka mongkona haki ngkuli anu mesaki anu hina a sangka wulu bimba ke lena, a bana mentadeano ke bana montoweano ke maupo hapamokoa inso a ngkuli, kai pinokomanasa nahi mokoburu ke mokoburu.”