Imama 10 - Wunta Mempori

Mateado i Nadabi ka i Abihu

¹ I Nadabi ka i Abihu, luwuno anano i Haruni, singge ira mo'ala pontunuado, monaakono api i larono saru monaa dupa i wawono api atuu. Kanandiomo dopompesombaako ndi Ondae i Ue api susua anu nahi Doparentaako ira i Ue ndi ondae.

² Onaemo kai peluarako api inso i aro-Do i Ue tumunu orua ira, ranta ka domate i aro-Do i Ue.

³ Mepauomo i Musa ndi Haruni, ”Onaemo andio anu pinau-Do i Ue: Mia anu umpeda ndi Ongkue Kupokomengkaao mempori-Ku, ka i arodo luwuno tongku atuu Aku mopokitao maramba-Ku.” I Haruni butu menoro-noro.

⁴ Ka i'amba i Musa moboio i Misaeli ka i Elisapa, luwuno anano i Usieli, maamano i Haruni ka ipotaeako ira, ”Aiwamo ndi'ai, tande ira pepaekompomiu andio inso i arono po'ianga mempori wawa ira i bungkuno mpekemaa.”

⁵ Aiwa iramo ka dotandeo wata ngkoroido atuu, orua ira da melemba meloe i larono, dowawa ira i bungkuno pekemaa, kana pinauno i Musa.

⁶ Ka i'amba motae i Musa ndi Haruni saru ndi Eleasa ka i Itamari, luwuno anano i Haruni, ”Siimo impo'inombo, mpo'ineeo wuumiu tekale ka berio sangkamiu, kasi memate ka luwuno bawaa andio Dotekudaako ira i Ue. Luwudo pepaekompomiu tongku Isaraeli ondaemo anu asalakono mpengese hangano api anu pinokomelanga-Do i Ue atuu.

⁷ Si melako inso i'arono pewowa Kema Tepotowoa, kasi memate, hangano lana po'urapi-Do i Ue kongko i wawomiu.” Domeweweuo montonda pinauno i Musa.

Pepo'onto mo'inu inua mompokomolangu a nsando mpesomba

⁸ Ondae i Ue mepau ndi Musa,

⁹ ”Si po'inu anggoro ke inua mompokomolangu, omue saru luwuno anamu tempono impewinso i larono Kema Tepotowoa, kasi memate. Onaemo asa pompakosi ndi omiu asa mpinu'u hawe nahina tampulaano.

¹⁰ Asalakono imposinggeo olono anu mempori ka nahi mempori, olono anu mokoburu ka nahi mokoburu,

¹¹ kai paguruako ira to Isaraeli luwuno pompakosi anu Dopauako iramo i Ue ndi ondae telalo ndi Musa.”

Pesomba tiado sando mpesomba

¹² Mepauomo i Musa ndi Haruni saru ndi Eleasa ka i Itamari, anano i Haruni anu da tuwu, ”Ime'alaomo pesomba kaanga anu torea inso a luwuno pesomba ndi Ondae i Ue anu tinunu ka imengkaanomo atuu kana roti nahi peragi i horino meda pontunua pesomba, nde onaemo tiano anu tedoa mempori.

¹³ Asalakono imengkaano i asa po'ianga anu mempori, hangano onaemo anu pinakosi tiamu ka luwuno anamu inso a luwuno pesomba tinunu ndi Ondae i Ue, hangano kanatuumo kupinarentaako.

¹⁴ Rada pesomba tinande ka pa'a pesomba pinesusua atuu, asalakono imengkaano meronga luwuno anamu tama ka beine a mpo'ianga anu nahi mokoburu, hangano luwuno imewineeako gagi anu pinakosi tiamu ka luwuno anamu inso a luwuno pesomba tekaduduido to Isaraeli.

¹⁵ Pa'a pesomba pinesusua ka rada pesomba tinande atuu asalakono domewawao saru tabano luwuno pesomba tinunu atuu, kai pinesombaako gagi pesomba tinande i aro-Do i Ue. Onaemo asa pompakosi ndi omiu ka luwuno anamiu hawe nahina tampulaano kana parenta-Do i Ue.”

¹⁶ Ka i'amba i Musa menootio mo'ungke bembe laki pesomba po'onini hala atuu, sine tengkita bembe atuu pingkoomo tinunu. Onaemo kai tekudaako ira i Eleasa ka Itamari, luwuno anano i Haruni anu da tuwu atuu, ipotae,

¹⁷ ”Tembio nahi imengkaano pesomba po'onini hala atuu a mpo'ianga anu mempori? Kombake atuu anu tedoa mempori ka Doweeakomiu i Ue kai meliahakono salado bawaa atuu ka impoweweu pesintuwua tiado i aro-Do i Ue?

¹⁸ Kitao, reano atuu nahi winawa mewininso i larono po'ianga mempori. Kombake bakanaano imengkaano pesomba atuu a mpo'ianga mempori, kana anu umariomo kuparentaa komiu?”

¹⁹ Ka i'amba motaeomo i Haruni ndi Musa, ”Lano mentee, a oleo andio umariomo dompesombaakono pesomba po'onini hala ka pesomba tinunudo i aro-Do i Ue, sine anumo kanatuu anu kupembasaio. Tewala a oleo andio kukaano pesomba po'onini hala, ta koa moiko ke a pongkita-Do i Ue?”

²⁰ Rumongeo pinauno atuu, ipementeeo i Musa.