IBARANI 9 - Wunta Mempori

Po'ianga mempori i tolino ka i suruga 9:1-10

¹ Lano pedandia anu amba-ambano hinao koa mbo'u luwuno atora a mpesombaa ka a mpo'ianga mempori wineweuno kaeno mia.

² Hangano hinao pinatinda aasa kema, onaemo anu i arono ntu'u ka i tu'ai hinao karuno hulu ka meda saru roti pesomba kaanga. Po'ianga andio nineeako po'ianga anu mempori.

³ I bungkuno pelingo anu ko'orua hinao mbo'u aasa kema anu nineeako po'ianga anu tedoa mempori.

⁴ I tu'ai hinao meda pontunua pesomba pontunua dupa inso a wulaa, ka burua pedandia, anu luwuno inapiiako wulaa; i larono burua pedandia atuu ninaa pido-pido wulaa me'ihi manna, tukono i Haruni anu horio mentumba ka watu anu meburiako pedandia,

⁵ ka i wawono orua kerubi marambaa anu umengoio ulono pedandia. Sine mongkona andio nahi kita mpokopauo nte'o'asa kanandio-andio.

⁶ Kanandiomo weweuano po'ianga mempori atuu i inatora. Ka luwuno sando pesomba wela mpewinso i larono kema anu i arono ntu'u ka domeweweuo pesombado,

⁷ sine i larono kema anu ko'orua butu koa Sando Mpesomba Langkai anu mewinso pohona i larono asa nta'u, ka asalakono saru rea anu ipesombaakono hangano koroino onaeno ka hangano luwuno polimpaia, anu wineweudo bawaano nahi dompokonto'orio.

⁸ Saru andio Dopokomengkaao Penaa Mempori, nine sala lumako a mpo'ianga anu mempori atuu napi te'ungkahi, tewala kema anu amba-ambano atuu da kongkoo.

⁹ Onaemo atuu potundaano tempo kanandio-andio. Menunu saru atuu pinesombaako pesomba ka pesomba anu nahi pokosompo ira anu mpesombaakono montonda ihino aroado anu tedoa ondalo,

¹⁰ hangano luwuno atuu, umarino kaanga, inua ka mperupa-rupa powo'ohia, butu koa luwuno atora mentuwu tolino, anu butu tinonda ranta haweno tempo pompokowo'ohua.

Ondae i Kerisituu ondaemo Pomposombu inso a mpedandia anu wo'ohu 9:11-28

¹¹ Sine Ondae i Kerisituu hawe Iramo gagi Sando Mpesomba Langkai tiano luwuno anu moiko anu ta hawe: Dotelaloiomo kema anu lalu langkai ka anu lalu soompo, anu komba wineweuno kaeno mia, – pengkonaano anu nahi tewinso pinokogagi andio, –

¹² ka mewinso Iramo pohona a laro po'ianga mempori ranta nahina tampulaano komba saru mowawa reano bimba lakino ka reano ana nsapi, sine saru mowawa rea-Do Ondae-Do. Ka saru atuu mohawe Iramo tepotolaa anu nahina tampulaano.

¹³ Hangano, tewala reano bimba lakino ka reano sapi lakino ka petawisino awuno sapi mongura mokomempori ira anu mokoburu, ranta ka domempinokomempori montonda koroi,

¹⁴ lalua ntu'u rea-Do i Kerisituu, anu hangano Penaa anu nahina tampulaano Dopesombaakonomo koroi-Do Ondae-Do ndi Ondae Ue Ala gagi pesomba anu nahina tataano, Ira mokomeporio laro aroato inso a luwuno wineweu anu nahina tuduno, ka tompokompesomba ndi Ondae Ue Ala anu tuwu.

¹⁵ Onaemo pu'uno Ondaemo peposombu inso a aasa pedandia anu wo'ohu, ka dompokotarimao ondae anu mempinoboi iramo tia anu nahina tampulaano anu dinandi, hangano mate Iramo tumolosio luwuno polimpaia anu wineweuomo i larono pedandia anu amba-ambano.

¹⁶ Hangano isua hinao pe'oliwi pokotompa, i tu'ai asalakono pinau mongkona mateano anu mompau pe'oliwi pokotompa atuu.

¹⁷ Hangano aasa pe'oliwi pokotompa ka i'amba pinementee, tewala anu me'oliwi atuu mateomo, hangano tewala da tuuwu anu me'oliwi atuu, nahi tinonda pe'oliwino.

¹⁸ Onaemo pu'uno, pedandia anu amba-ambano nahi pinokomoroso hangano nahina rea.

¹⁹ Hangano umarino pauo i Musa luwuno petenano songka Taura a luwuno bawaa, i'alao reano ana nsapi ka reano bimba lakino saru uwoi, ka wulu motaha ka hisopi, ka i'amba tumawisio wunta atuu ka luwuno bawaa,

²⁰ saru mepau, ”Ndiomo rea pedandia anu Dopakosiakomiu Ue Ala.”

²¹ Ka kema mbo'u ka luwuno parewa mpesomba itawisiakono rea kanatuu.

²² Ka mingki luwuakoano pinokomemporiako rea montonda songka Taura, ka ba nahina po'uwua rea nahina po'ampunia.

²³ Gaagi luwuakoano anu metondoniako hapa anu kongko i suruga asalakono pinokomempori kanandio, sine luwuno parewa suruga pinokomemporiako luwuno pesomba anu lalu moiko sekonopo atuu.

²⁴ Hangano Ondae i Kerisituu komba mewinso Ira a mpo'ianga mempori wineweuno kaeno mia anu butu koa gambarano inso anu menteeano, sine i laro nsuruga isa'a Dotepo'aroako Ira Ue Ala hangano ontae.

²⁵ Ka Ondae komba mewinso temararu Dopesombaakono koroi-Do isa'a, kana Sando Mpesomba Langkai sompo ta'u dompewinso a mpo'ianga mempori saru rea anu komba reado ondaedo.

²⁶ Hangano tewala kanandio asalakono mararu Dotebobarasai mompu'u ipinokogagi wawontolino andio. Sine kanandio-andio butu koa pohona Dopokomengkaao koroi-Do, a tempo pokotompa ka Do'oninio hala a pompesombaako-Do koroi-Do.

²⁷ Ka mengkena kana mia pinakosi ka Domate butu koa pohona, ka umarino atuu binitara,

²⁸ kanandio koa mbo'u Ondae i Kerisituu butu koa pohona Dopesombaakono koroi-Do tumembio halano hadio mia. Umarino atuu pohona mbo'u Ira mokomengkaao koroi-Do komba montembi hala sine moweeako ira tekaduduia, anu sumikori Ira.