IBARANI 7 - Wunta Mempori

Ondae i Kerisituu ka i Melekisede 7:1-10

¹ Hangano i Melekisede onaemo mokole i Salemi ka sando mpesomba-Do Ue Ala Anu Lalu i Wawono; onae lumako tumotowoo i Burahima tempono ipekule i Burahima inso numangi ira mokole, ka rumonsoo.

² Ndi onae mbo'u i Burahima moweeakono asa ntia hopulu inso a luwuno. Montonda pengkonaano neeno i Melekisede onaemo amba-ambano mokole menteea, ka mokole i Salemi mbo'u, onaemo mokole rodoa.

³ Onae nahina amano, nahina ineno, nahina potudano tumuwuno, oleono nahina pompu'uano ka tuwuno nahina pokotompaano, ka hangano onae pinokogagi mengkena saru Ana-Do Ue Ala, onae gagi mpiha Sando Mpesomba ranta nahina tampulaano.

⁴ Impe'ihilaroomo tedoa langkai mia atuu, anu ndi onae i Burahima, uempu'uto, moweeakono asa ntia hopulu inso a luwuno rinontuno anu lalu moiko.

⁵ Ka ondae inso a luwuno anano i Lewi, anu mpontarima potoro sando mpesomba, mpohawe anggaa, montonda songka Taura, ka dompo'ema tia hopulu inso a bawaa Isaraeli, onaemo inso a luwuno pepaekompodo, maupo ondae mbo'u andio inuleno i Burahima.

⁶ Sine i Melekisede, anu komba inuledo, mo'ema tia hopulu inso ndi Burahima ka ironsoo, maupo onae anu me'ueo dandi.

⁷ Lano nahi pinokohapu, nine anu lalu i totono ironsoo anu lalu i wawono.

⁸ Ka i ndi'ai luwuno mia anu ira memate mpontarima tia hopulu, ka i ra'ai Ondae, anu mongkona Ondae sinakosii, nine tuwu Ira.

⁹ Ka topotaemo, nine telalo ndi Burahima inema koa mbo'u tia hopulu inso ndi Lewi, anu tekona montarima tia hopulu,

¹⁰ hangano da mo'ia a laro ngkoroino uempu'uno, tempono itotowoo i Melekisede uempu'uno atuu.

Ondae i Kerisituu onaemo Sando Mpesomba anu lalu i wawono sekono i Haruni 7:11-28

¹¹ Onaemo pu'uno, ande-andeno a imamado to Lewi hinaweomo sompoano ntu'u – nde hangano imamado atuu bawaa Isaraeli mpontarima iramo Taura – hapake pu'uno da kinere asa mia susua pinakosi gagi sando mpesomba langkai montonda atorano i Melekisede ka anu mongkona onae nahi pinau montonda atorano i Haruni?

¹² Hangano, tewala imama baali, asalakono ta koa mbo'u baali songka Taura atuu.

¹³ Hangano Ondae, anu pinau i ndi'ai, tewinso suku susua; inso a nsuku andio nahina maupo te'asa mia anu hori mompekakaako a meda pontunua pesomba.

¹⁴ Hangano domento'oriomo luwuno mia, nine Ondae Ueto tepu'u inso a nsuku Yehuda ka mongkona suku atuu nahi hori i Musa mompau maupo te'asa mongkona luwuno sando pesomba.

¹⁵ Ka mongkona atuu laluaopo mbo'u imengkaa, tewala ipakosio aasa sando mpesomba susua montonda atorano i Melekisede,

¹⁶ anu gagi sando mpesomba komba mepu'uako luwuno atorano mia, sine mepu'uako tuwua anu nahi pokomate.

¹⁷ Hangano mongkona Ondae sinakosii, ”Omiu onaemo Sando Mpesomba ranta nahina tampulaano, montonda atorano i Melekisede.”

¹⁸ Lano aasa songka anu linuarako se'elu nahi pinake, tewala songka atuu nahina rosono ka onaemo pu'uno nahi mentudu,

¹⁹ – hangano songka Taura nahina ntu'u ipowawa sompoano ntu'u – sine kanandio-andio pinosaba pomperorohia anu moikoopo, anu moko'umpeda kita ndi Ondae Ue Ala.

²⁰ Ka mengkena kana mongkona andio nahi gagi ba nahi sinumpa – lano ondae megagi iramo sando mpesomba nahi domesinumpa,

²¹ sine Ondae saru sumpa, Dopauo anu mepau ndi Ondae, ”Ondae i Ue mesumpa Iramo ka nahi Ira me'o'ole: Omiu onaemo Sando Mpesomba ranta nahina tampulaano” –

²² kanandio koa mbo'u Ondae i Yesu onaemo pompokoroso inso a aasa pedandia anu lalu moroso.

²³ Ka hadio ira anu megagi iramo sando mpesomba, hangano itowoki ira matea nahi domegagi mpiha sando mpesomba.

²⁴ Sine, hangano nahi Dobali ranta nahina tampulaano, potoro-Do sando mpesomba nahi pokompelimba a mia susua.

²⁵ Onaemo pu'uno ka Dopolio koa mbo'u kumadudui ira ntu'u luwuno mia anu me'aiwa ndi Ondae Ue Ala hangano Ondae. Hangano Ondae tuwu wela mpiha gagi Peposombudo.

²⁶ Hangano Sando Mpesomba Langkai anu kanandiomo anu kinereto: onaemo anu mempori, nahina sala-Do, nahina tataa-Do, anu teponsia inso a mia mentehala ka lalu i wawono sekonopo luwuno mala'eka i suruga,

²⁷ anu komba kana luwuno sando mpesomba langkai susua, anu sompo oleo asalakono mpompesombaako pesomba hangano halado ondaedo ka umarino atuu ka i'amba hangano halado bawaano, hangano mongkona atuu Doweweuomo pohona tiano ranta nahina tampulaano, tempono Dopesombaakono koroi-Do Ondae-Do gagi pesomba.

²⁸ Hangano songka Taura pakosi ira mia anu ipabawai ira molema gagi Sando Mpesomba Langkai, sine sumpa, anu pinau lembui sekono songka Taura, pakosi Ira Ana, anu gagi Iramo soompo ntu'u ranta nahina tampulaano.