IBARANI 6 - Wunta Mempori

¹ Onaemo pu'uno aiwamo tomebintao pu'uno amba-ambano inso a pompaguru mongkona Ondae i Kerisituu ka tompelimba a tetiangino anu mentee. Si tomenaao mbo'u pu'uno tepidia inso a luwuno wineweu anu nahina tuduno, ka empehino pompe'ala-ala ndi Ondae Ue Ala,

² onaemo pompaguru mongkona mperupa-rupa pebahoa, modampoako kae, pewanguado mia mate ka pohuku anu nahina tampulaano.

³ Ka onaemo anu kita meweweuo, tewala Do'induo Ue Ala.

⁴ Hangano ondae anu horio pinokomewine aroado, anu horio mpenamio pompowee inso i suruga, ka anu horio mohawe tia a laro Penaa Mempori,

⁵ ka anu menamio pau anu moiko inso ndi Ondae Ue Ala ka luwuno pompoweeno wawontolino anu ta hawe,

⁶ sine anu humapu Ira mbo'u Ue Ala, nahi ira mempinokowo'ohu tepohona mbo'u kanarau, ranta ka dontepidi, hangano domempaso Ira mbo'u Ana-Do Ue Ala tiano koroido ka mokongkodei Ira i arodo mia hadio.

⁷ Hangano wita anu mo'oso uwoi usa anu mararu ipetii i wawono, ka anu mehasiliako hadio pinopaho anu mentudu ndi ondae anu me'anggao, montarima ronso inso ndi Ondae Ue Ala;

⁸ sine tewala wita atuu mehasiliako tonga ewo rui ka ewo rui, nahina tuduno ka umpedaomo a pontotonaa, anu poko'ariano sinongko.

Me'ini moroso a pomperorohia 6:9-20

⁹ Sine, hei pepaekompoku luwu-luwu anu kinekewoiku, maupo kimpotae kanandio mongkona omiu, kimpe'ala-alao, nine hinao ndi omiu anu lalu moiko, anu mowawa tekaduduia.

¹⁰ Hangano Ondae Ue Ala komba nahi Domoleo, ranta Ira kumolupeo inanggamiu ka pompehohawamiu anu pinopokitamiu te'aro a nee-Do hangano pompekakaakomiu a luwuno mia mempori, anu da imeweweuo hawe kanandio-andio.

¹¹ Sine inehemami, ka isingge mpopokitao bobotolino aroamiu anu mengkena mokogagio pomperorohimiu asa pe'umbua anu manasa, hawe a pokotompaano,

¹² ka si megagi mongguu, sine megagi anu tumonda ira anu hangano pompe'ala-ala ka pompedato mohawe tia a laro hapa anu dinandi-Do Ue Ala.

¹³ Hangano tempono Ondae Ue Ala weeakono i Burahima dandi-Do, mesumpa Ira a ngkoroi-Do Ondae-Do, hangano nahina mia anu lalu mantande sekono Ondae,

¹⁴ pau-Do, ”Menteeano Aku rumonsoko hadio ntu'u ka weweuko tedoa hadio.”

¹⁵ I Burahima sabara mesikori ka hangano kanandio ihaweo hapa anu dinandiako ndi onae.

¹⁶ Hangano mia mesumpa a neeno mia anu lalu mantande, ka sumpa atuu gagi aasa pompokoroso ndi onae, anu mokotampulao luwuno pengengea.

¹⁷ Onaemo pu'uno, ka ilalu manasado anu tekona mentarimao dandi atuu ka dompe'ala-alao koa ntu'u manasano pomputusi-Do, Ondae Ue Ala wutuakono sumpa koroi-Do,

¹⁸ hangano orua mengkaaano anu nahi bali, mongkona isua Ondae Ue Ala nahi Ira megaupi, ontae anu mpo'ungke pepekaduduia, ka tompohawe pompokoroso mentehaweo pomperorohia anu mo'ia i aroto.

¹⁹ Pomperorohia atuu onaemo ladu anu moroso ka mokorodoo sumangato, anu pineladuakoomo hawe a bungkuno pelingo,

²⁰ i tu'aimo Dopewinso i Yesu gagi Pese'eluto, tempono Dogagi Sando Mpesomba Langkai ranta nahina tampulaano, montonda atorano i Melekisede.