IBARANI 5 - Wunta Mempori

¹ Hangano sompo sando mpesomba langkai, anu bininiki inso I olodo mia, pinakosiako mia a mpenggoeado saru Ondae Ue Ala, ka ipesombaakono pesomba ka pesomba hangano hala.

² Onae asalakono ka ipokonto'ori ira koa mia anu memonge-monge ka mia anu tepopo'oo, hangano onae isa'a bukeako molema,

³ anu asalakono onae mompesombaako pesomba hangano hala, komba butu tiado bawaa, sine tiano koa mbo'u koroino.

⁴ Ka nahina maupo te'asa mia anu umalao pompelangkai atuu tiano koroino onaeno, sine onae atuu Dopoboiakono Ue Ala, kana anu gagiomo ndi Haruni.

⁵ Kanandio koa mbo'u Ondae i Kerisituu nahi Dopokomarambao Ondae-Do koroi-Do gagi Sando Mpesomba Langkai, sine Ondae anu mokomaramba Ira anu mepau, ”Ana-Ku Omue! Omue Kupe'anaako-Mu oleo andio.”

⁶ Kana pau-Do a aasa pu'u mpau susua, ”Omuemo Sando Mpesomba ranta nahina tampulaano, montonda atorano i Melikisede.”

⁷ A ntuwu-Do kana mia, Dopesombaakonomo pekakai ka saru monsabangi mompemasusa mo'ema ndi Ondae, anu polio kumadudui Ira inso a matea, ka hangano mempori-Do rinonge Iramo.

⁸ Ka maupo Do'Ana, mepaguru Iramo gagi momperorongeako a hapa anu Dopemarasaiomo,

⁹ ka umari-Do humaweo pokobobotoli-Do, Ondae gagi Pu'uno tekaduduiado luwuno mia anu momperorongeako ndi Ondae anu nahina tampulaano,

¹⁰ ka Ondae Ue Ala moboi Ira gagi Sando Mpesomba Langkai, montonda atorano i Melekisede.

Pompopoto'ori ka si domehapuo pompe'ala-alado 5:11–6:8

¹¹ Mongkona atuu hadio anu asalakono kami mempauo, sine mapari ba ipinau, hangano memongguu komiumo a mporongea.

¹² Hangano omiu maupo ikinita inso a tempo, tekonaomo imegagi guru, da komiu mempinaguruako mbo'u empehino ntu'u inso a pepokomengkaa-Do Ue Ala, ka da mpokere komiu susu, komba kanga motea.

¹³ Hangano ba isema da mongkere susu nahi pokonto'orio pompaguru mongkona menteea, hangano onae nana'ote kodei.

¹⁴ Sine kanga motea onaemo tiano mia sompoomo tinuwuno, anu hangano hinao ponto'ori moiko anu pande mosisinggeo anu moiko sekonopo anu mosa'o.