IBARANI 4 - Wunta Mempori

Oleo penaa-naaa anu pinatinda-Do Ue Ala 4:1-13

¹ Onaemo pu'uno, moikoopo tompetangkoro, ka si hina te'asa mia I olomiu anu tinudu tebinta, maupo pedandia ira mpewinso a mpenaa-naaa-Do napi inihii.

² Hangano ndi ontae pinalele koa mbo'u lele mawongkoa mengkena kana ndi ondae, sine pau pinalele atuu nahina tuduno ndi ondae, hangano nahi tuwuako pompe'ala-ala meronga-ronga saru ondae anu merongeo.

³ Hangano ontae anu mpompe'ala-ala, kita mpewinso a mpo'ianga penaa-naaa kana anu pinau-Do, ”Ranta ka Kupesumpa a laro ntekuda-Ku: Nahi ira mpewinso a mpo'ianga penaa-naaa-Ku,” maupo umariomo anggaa-Do mompu'u ipinokogagi wawontolino.

⁴ Hangano mongkona oleo ko'opitu horio pinau a laro aasa pu'u mpau, ”Ka Ondae Ue Ala menaa-naa a oleo ko'opitu inso a luwuno anggaa-Do.”

⁵ Ka a laro pu'u mpau atuu tomebasao, ”Nahi ira mpewinso a mpo'ianga penaa-naaa-Ku.”

⁶ Gaagi mengkaaomo, nine hinao asa ntia mia ira mpewinso a mpo'ianga penaa-naaa atuu, sekono ondae anu ntese'elu domempinaleleako lele mawongkoa atuu, nahi dompewinso hangano nahi dompomperorongeako.

⁷ Onaemo pu'uno ka Dopakosio mbo'u aasa oleo, onaemo ”oleo andio,” mansano ba opia tehineno tempono Dopepau telalo ndi Daudi kana pinau i wawono, ”A oleo andio, tewala imerongeo suara-Do, si mpokomoteao aroamiu!”

⁸ Hangano, bakanaano iwawa iramo i Yosua mpewinso a mpo'ianga penaa-naaa, manasa Ondae Ue Ala nahi Ira mepau lembuino mongkona aasa oleo susua.

⁹ Gaagi da tepatinda aasa oleo penaa-naado bawaa-Do Ue Ala, oleo ko'opitu.

¹⁰ Hangano ba isema mewinsoomo a mpo'ianga penaa-naaa-Do, onaeno menaa-naaomo inso a luwuno anggaano, mengkena kana Ondae Ue Ala menaa-naa inso a anggaa-Do.

¹¹ Onaemo pu'uno moikoomo tompeteahako ka tompewinso a laro mpenaa-naaa atuu, ka si tedonta maupo te'asa mia hangano montonda pandiri nahi pomperorongeako mbo'u atuu.

¹² Hangano pau-Do Ue Ala tuwu ka moroso ka montasoopo sekono ponai isuamo koa anu memata patimbali; onae meduhu tedoa ondalo ranta monsuao sumanga ka penaa, luwuno lodi-lodi ka unto wukulaa; onae polio mosisinggeo pontimbanga ka pinewowolono aroato.

¹³ Ka nahina maupo te'asa anu tuwu tewuni i aro-Do, hangano luwuakoano nahi tetutuwi ka te'ungkahi i arono mata-Do, anu ndi Ondae asalakono kita mentanggumio.

Ondae i Yesu gagi Sando Mpesomba Langkai 4:14–5:10

¹⁴ Hangano ontae kanandio-andio hinao Sando Mpesomba Langkai Maramba, anu telaloiomo asa wawo langi, onaemo Ondae i Yesu, Ana-Do Ue Ala, moikoomo tompe'ini moroso a mangakua pompe'ala-alato.

¹⁵ Hangano Sando Mpesomba Langkaito, komba sando mpesomba anu nahi pokompetonda membasaio luwuno molemato, tendeano mengkena saru ontae, inara-arahako Iramo, butu nahi Dopoweweu hala.

¹⁶ Onaemo pu'uno ime'aiwamo tomemosia me'umpedaakono kadera poparentaa pe'aroa, ka tomentarimao pompehohawa ka mehaweo pe'aroa ka tomehaweo pontulungi a tempono.