IBARANI 2 - Wunta Mempori

Tekaduduia anu langkai 2:1-4

¹ Onaemo pu'uno asalakono tompenootio ntu'u hapa anu tomerongeomo, ka si tomemolomo iwawa kita solo.

² Hangano tewala pau anu pinau telalo a luwuno mala'eka mo'ia mpiha, ka sompo polimpaia ka nahi pomperorongeako mohawe sulono anu menunu,

³ kana'umpeke kita mempokotola, tewala nahi tomentuduo tekaduduia anu langkai kanatuu, anu amba-ambano Dopopoto'oriakita i Ue ka ondae anu merongeomo, mesala a anu pinokompe'ala-ala, sekono

⁴ Ondae Ue Ala mokorosoo ponsakosiido luwuno petondoni ka anu mengkinohali-haliako ka mperupa-rupa pepokomengkaano pabawa ka pompowee-Do Penaa Mempori, anu tinia-tia-Do montonda po'ehe-Do.

Asa tempo Ondae i Yesu lalu i totono sekonopo luwuno mala'eka 2:5-18

⁵ Hangano komba a luwuno mala'eka Dopokompetuunduo wawontolino anu ta hawe, anu pinauto andio.

⁶ Hinao mia anu horio mesakosii a laro aasa pu'u mpau, ipotae, ”Hapake mia, ranta ka Ipewowoloo, ke anano mia, ranta ka Iperioo?

⁷ Sine Iweweuomo tetotoako tedei inso a luwuno mala'eka a tempo anu sarai, ka Iramba-ramba uluakonomo marambaa ka pelangkai,

⁸ luwuakoano anu Ipokompe'urumakoomo a toto ngkaru-Do.” Hangano i larono mokompe'urumakoo luwuakoano ndi Ondae, nahina maupo te'asa anu Dopesusuao. Sine kanandio-andio napi tomengkitao, nine luwuakoano Dopokompe'urumakoomo ndi Ondae.

⁹ Sine Ondae, anu a tempo sarai wineweu tetotoako tedei sekono luwuno mala'eka, onaemo Ondae i Yesu, tomengkita Ira, anu hangano tebobarasaiano matea, rinamba-ramba uluako marambaa ka pelangkai, ka Dopembasaio matea tiano luwuno mia hangano pe'aroa-Do Ue Ala.

¹⁰ Hangano lano menunu saru teweweu-Do Ue Ala – ndi Ondae ka hangano Ondae luwuakoano pinokogagi –, onaemo Ondae Ue Ala anu mowawa hadio mia a marambaa, ka mokosompo Ira i Yesu, anu wawa ira a ntekaduduia, mesala a ntebobarasaia.

¹¹ Hangano Ondae anu mompokomempori ka ondae anu mempinokomempori, luwudo tepu'u inso a anu Aasa; onaemo pu'uno nahi makoko'ii-Do moboiako ira pepaekompo,

¹² Mepau Ira, ”Aku paleleo nee-Miu a luwuno pepaekompo-Ku, ka umunde-unde Komiu i tonga-tongado bawaa,”

¹³ ka mbo'u, ”Aku merorohi Ira,” ka mbo'u, ”Menteeano, Ongkuemo andio ka luwuno nana'ote anu Doweea-Kunemo Ondae Ue Ala.”

¹⁴ Hangano nana'ote atuudo onaemo nana'ote inso a rea ka ihi, ka Ondae mbo'u gagi mengkena saru ondae ka mohawe tia a nteweweudo, hangano mate-Do ka Doropuo, onaemo i Mosa'o, anu pabawaio matea;

¹⁵ ka saru mesala kanandio ka Dopotola ira anu asa ntinuwudo mpo'ia a laro nte'ataa hangano domedoitoakono matea.

¹⁶ Hangano menteeano, komba mala'eka anu Dopehohawa ira, sine inuleno i Burahima anu pinehohawa-Do.

¹⁷ Onaemo pu'uno, ka a luwuakoano Ondae asalakono pinongkena saru luwuno pepaekompo-Do, ka Dogagi Sando Mpesomba Langkai anu me'aroa ka anu metenunu ndi Ondae Ue Ala mokosintuwuo halano luwuno tongku.

¹⁸ Nde hangano Ondae isa'a tebobarasaiako po'ara-arahako, ka Dopokotulungi ira anu me'inara-arahako.