IBARANI 13 - Wunta Mempori

Patudu ka pekakai tekaduduia 13:1-25

¹ Pompehohawa pepe'etua ka ikongko koa mpiha!

² Si mengkolupeo mpetotoka ira mia, hangano moweweu kanandio ba opia mia nahi domento'orio dompekakaako iramo mala'eka.

³ Impewowolo ira koa mia mehinuku, hangano omiu isa'a onaemo mia koa mbo'u mehinuku. Ka impewowolo ira koa mia anu mewineweunsa'o, hangano omiu isa'a da mentuwu komiu koa mbo'u i wawontolino andio.

⁴ Luwumiu imentuduo koa pekombiaa ka si mengkokoburutio poturia, hangano mia mebelesu ka mponsosabo Ondae Ue Ala bitara ira.

⁵ Si megagi atano doi ka impesompoomo hapa anu hina ndi omiu. Hangano Ondae Ue Ala mepau Iramo, ”Naahi ntu'u Aku mo'ineeko ka naahi ntu'u Aku bintako.”

⁶ Onaemo pu'uno ka tompe'ala-alao mpokompotae, ”Ondaemo i Ue anu tumulungi aku. Nahi aku doito. Hapake anu pinokoweweuno mia ndi ongkue?”

⁷ Impewowolo ira koa petewawamiu, anu mempauomo pau-Do Ue Ala ndi omiu. Impepenteeo tompaano tumuwudo ka imempandirio pompe'ala-alado.

⁸ Ondae i Yesu Kerisituu mengkena mpiha, moiko indiawi maupo oleo andio ka hawe nahina tampulaano.

⁹ Si ntepopo'ooako mperupa-rupa pompaguru susua. Hangano anu moiko onaemo, nine aroamiu pinokorosoako pe'aroa ka komba saru mperupa-rupa kaanga anu nahina tuduno ndi ondae anu mentondao luwuno atorano kaanga kanatuu.

¹⁰ Ontae hinao aasa meda pontunua pesomba ka mia anu mpompekakaako a ngkema si dompongkaa hapa anu i larono.

¹¹ Hangano koroido kondehora anu reano iwawao Sando Mpesomba Langkai mewinso a mpo'ianga mempori gagi pesomba po'onini hala, tinunu i bungkuno pekemaa.

¹² Onae koa mbo'u pu'uno Ondae i Yesu tebobarasai Iramo i bungkuno pewowa langkai mokomemporiakono rea-Do bawaa-Do.

¹³ Onaemo pu'uno aiwamo ka tomelako ndi Ondae i bungkuno pekemaa ka mentembio tekoko'ii-Do.

¹⁴ Hangano i ndi'ai nahina ta po'iangato mpiha; tome'ungkeo kota anu ta hawe.

¹⁵ Hangano Ondae, onaemo pu'uno aiwamo tompesombaakono pesomba po'unde-unde ndi Ondae Ue Ala, onaemo pinauno wiwi anu umunde-undeo nee-Do.

¹⁶ Ka si mengkolupeo mpoweweu moiko ka pompowee pontulungi, hangano luwuno pesomba anu kanandio anu Dopemoikoo Ue Ala.

¹⁷ Imperorongeako ira petewawamiu ka impetenunumo ndi ondae, hangano ondae medagaio sumangamiu, gagi mia anu asalakono sumusuruo. Ba kanatuu ira memawongko meweweuo, komba dompenaarunseakono, hangano mongkona atuu nahi ta mowawaakomiu ura.

¹⁸ Impekakaiakami mpiha; hangano kimpe'ala-alao, nine pohaweno aroamami moiko, nde a luwuakoano inehemami aasa tuwua anu moiko.

¹⁹ Ka tamoako kupatudu komiu, ka imeweweuo, ka kuronga mekule ndi omiu.

²⁰ Ka Ondae Ue Alano rodoa, anu hangano rea pedandia anu nahina tampulaano Dopokule Iramo inso i olodo mia mate Puu pompakambi Langkai anu pakambi ira luwuno bimba, onaemo Ondae i Yesu, Ueto,

²¹ po'ineeomo ka Dopokosompoakomiu luwuno anu moiko ka imeweweuo po'ehe-Do, ka umanggao ndi ontae hapa anu pinemoiko-Do, hangano Ondae i Yesu Kerisituu. Ndi Ondaemo marambaa hawe nahina tampulaano! Ami.

²² Ka kupatudu komiu, luwuno pepaekompo, ka imentarimao a moputeno aroa, maupo butu owowa wuntaku andio ndi omiu.

²³ Ka imento'orio koa, nine i Timotiu, pepaekompoto, melungkaomo. Ba ronga koa hawe, aku aiwa tepohaweakomiu meronga saru onae.

²⁴ Pohaweomo tabea a luwuno petewawamiu ka luwuno mia mempori. Imentarimaomo tabea inso a luwuno pepaekompo i Italia.

²⁵ Pe'aroa kumongkomi komiu luwu.