IBARANI 12 - Wunta Mempori

Patudu mompedato a pompe'ala-ala 12:1-17

¹ Hangano ontae hadio sakosii, kana seru anu lumimbu kita, aiwamo ka tobintao luwuno tinembi ka hala anu tedoa rumerenggoti kita, ka tompo'asao mpiha aroato mpegolo a mpegoloa anu tomentinenaako.

² Aiwamo tomeweweuo saru mata anu te'aro ndi Ondae i Yesu, anu wawa kita a pompe'ala-ala, ka anu wawao pompe'ala-alato atuu a sompoano, anu nahi Doperioo mokoko'iia mpo'asao aroato po'ahao keu pinotamba euno po'undea anu Dopinatindaako, anu kanandio-andio mentoro i koanano kadera poparentaa-Do Ue Ala.

³ Impewowolo Ira koa mpiha, anu mo'asao aroa-Do tumembio pengengedo mia ntehala anu lansara atuu a ngkoroi-Do, ka si megagi molema ka ntelusa.

⁴ A mpelulukumiu umewaio halamiu napi ranta mompowaa rea.

⁵ Ka imengkolupeomoke patudu anu mepau ndi omiu kana a nana'ote, ”Hei anaku, si mperuanahio pompaguru-Do i Ue, ka si telusa aroamu tewala Dokuahakomu;

⁶ hangano mia anu pinehohawa-Do i Ue Dotunduhio, ka mia anu Dope'anao Dosepio kana ana.”

⁷ Tewala omiu asalakono mentarimao pontunduhi; Doweweu komiu Ue Ala kana ana. Hinaoke ana anu nahi tunduhio amano?

⁸ Sine, tewala mentola komiu inso a pohuku, anu asalakono ipemarasaio sompo mia, asalakono omiu komba ana, sine ana i olono.

⁹ Ka i'amba: inso a amato anu menteeano mpohawe kita pohuku, ka tompelangkai ira; tewala kanandio kombake asalakono laluaopo tompomperorongeako ndi Ondae Amano luwuno penaa, ka tomentuwu?

¹⁰ Hangano ondae mempaguru kita a tempo anu sarai menunu saru hapa anu pinemoikodo, sine Ondae Dotunduhi kita a moikoato, ka tompohawe tia a mempori-Do.

¹¹ Lano sompo pohuku anu iweeakita nahi powawa mawongkoa, sine masusaa. Sine lembuino ipehasiliako wua menteea anu moweeako ira sintuwu anu linatino.

¹² Onaemo pu'uno pokorosoomo kae anu molema ka olontuu anu leedu;

¹³ ka pesalaano karumu pokomoleoomo, ka si tepolindu anu modingge, sine gagi tompa.

¹⁴ Imentuwumo sintuwuako ira luwuno mia ka ime'ungkeomo memporia, hangano nahina maupo te'asa mia ta kumita Ira i Ue ba nahi mempori.

¹⁵ Impedagaimo ka si hina maupo te'asa mia olaiakono pe'aroa-Do Ue Ala, ka si tuwu haka anu mopa'i anu mompokomarisu ka monsosa'ai hadio mia.

¹⁶ Si hina mia anu gagi belesu ke anu mompewowolo owowa kana i Esau, anu umasao te'akano a ngkaanga asa sempe.

¹⁷ Hangano imento'orio, nine lembuino, tempono ta tumarimao ronso atuu, nahi wineeako, hangano nahi pohawe tempo mokomoikoo salano, maupo i'ungkeakono uwoi mata.

Anggaa anu mobea 12:18-29

¹⁸ Hangano nahi ime'aiwa a ntorukuno anu pinokodanggi ka api anu kolanga-langa, a worikidi, wongi-wongia ka angi mokora,

¹⁹ a unino tawuwua ka unino suara anu weweu ira anu merongeo mpo'ema, ka siimo mbo'u domempinepauako,

²⁰ hangano nahi domempolio merongeo petena andio, ”Tendeano maupo kondehora tewala anu dumanggio torukuno, asalakono onae winunoako watu.”

²¹ Ka tedoa mongkokongiri anu kinita atuu, onaemo ka ipotae i Musa, ”Tedoa aku doito ka mondidi-ndidi ntu'u.”

²² Sine me'aiwa komiumo a Pongku Sioni, a ngkota-Do Ue Ala anu tuwu, Yerusale nsuruga ka a sowu-sowuno mala'eka, aasa tepumpua anu maroa,

²³ ka a bawaado ana aka, anu needo teburi i suruga, ka ndi Ondae Ue Ala, anu bitara ira luwuno mia, ka a mpenaado mia mentee anu gagi sompoomo,

²⁴ ka ndi Ondae i Yesu, Po'oloti pedandia wo'ohu, ka a rea tinawisi, anu morosoopo ipepau sekono reano i Habeli.

²⁵ Impedagai ka si komba nahi impe'ala-ala Ira, anu mepau. Hangano tewala ondae, anu nahi dompe'ala-ala Ira anu mohaweo pau-Do Ue Ala i tolino, nahi domentola, tamoako ontae, tewala tompebungkui Ira anu mepau inso i suruga?

²⁶ Tempo atuu suara-Do lumeluo tolino, sine kanandio-andio Dodandio, ”Pohonapo mbo'u Aku lumeluo komba butu tolino, tendeano langi mbo'u.”

²⁷ Pau ”Pohonapo mbo'u” tumisoo tebalia a hapa anu pinokolelu, hangano onae pinokogagi ka ipo'ia mpiha hapa anu nahi telelu.

²⁸ Gaagi, hangano mpontarima kita poparentaa anu nahi telelu, aiwamo tompontarimakasi ka mpesomba ndi Ondae Ue Ala montonda gau anu pinemoiko-Do, saru pompelangkai ka doito.

²⁹ Hangano Ondae Ue Alato onaemo api anu mompokomo'ai.