IBARANI 11 - Wunta Mempori

Ponsakosii pompe'ala-ala 11:1-40

¹ Pompe'ala-ala onaemo pu'uno luwuakoano anu pinerorohito ka tondonino luwuakoano anu nahi tomengkitao.

² Nde hangano pompe'ala-ala sinakosiiomo a uempu'uto.

³ Hangano pompe'ala-ala ka tomento'orio, nine luwuakoano pinokogagiako pau-Do Ue Ala, ranta hapa anu kinitato gagiomo inso a hapa anu nahi tompokokitao.

⁴ Hangano pompe'ala-ala ipesombaakonomo i Habeli ndi Ondae Ue Ala pesomba anu lalu moiko sekonopo pesombano i Kai. Hangano koa atuu ka ipohawe ponsakosii ndi onae, nine onae mentee, hangano Dopemoikoo Ue Ala pesombano atuu ka hangano pompe'ala-ala onae da mepau, umarino mate.

⁵ Hangano pompe'ala-ala i Heno tetande, ka si pompembasai matea, ka onae nahi hinawe, hangano Dotandeomo Ue Ala. Hangano se'eluno napi tetande, onae mohawe ponsakosii, nine onae Dopemoikoo Ue Ala.

⁶ Sine ba nahina pompe'ala-alano mia nahi Ira memoikoo Ue Ala. Hangano ba isema rumangkuhi Ira Ue Ala, asalakono ipe'ala-alao nine kongko Ira Ue Ala, ka nine Ondae Ue Ala moweeakono tambo mia anu umungke Ira ntu'u.

⁷ Hangano pompe'ala-ala, onaemo i Noho – saru pontiso-Do Ue Ala mongkona hapa anu napi tengkita – saru metenunu ipatindao Bangka kaduduido pe'asa rahano ka hangano pompe'ala-ala atuu ihukuo wawontolino, ka onae tinantui montarima menteea, menunu saru pompe'ala-alano.

⁸ Hangano pompe'ala-ala i Burahima metenunu, tempono ipinoboi ka ipelungka lumako i wita anu ta tumarimao gagi tia pusakano, ka i'amba melungka nahi to'orio po'ianga anu te'aroano.

⁹ Hangano pompe'ala-ala onae mo'ia i wita anu idinandiako atuu kana i asa wita susua ka i tu'ai ipo'ia a ngkema saru i Saki ka i Yako, anu saru ondae me'umbuo dandi anu aasa atuu.

¹⁰ Hangano isisikorio kota anu hinao empehino, anu sinongka ka winangu-Do Ue Ala.

¹¹ Hangano pompe'ala-ala onae ka i Sara mohawe koa mbo'u roso umule ira inule, maupo laloomo tinuwudo, hangano iperorohi Ira, anu mompowee dandi atuu Ira koa umihiio.

¹² Onaemo pu'uno, inso a mia aasa, tendeano mia anu kana mateomo, moluarako hadio inule, kana anano wula i langi ka kana one i wiwi ntahi, anu nahi pinokodoa hadiono.

¹³ Luwudo andio memate iramo a pompe'ala-ala gagi mia anu nahi dompohawe hapa anu dinandi atuu, sine butu domengkitao inso olai ka mengkawe-kaweo ka memangakuakono, nine ondae mia hawe ka mehawe i tolino andio.

¹⁴ Hangano ondae anu mpotae kanandio mpokomengkaao, nine ntekewoi ira mpo'ungke aasa wita po'iangado.

¹⁵ Ka bakana i larono mongkona atuu dompewowoloo wita insoado anu domebintaomo, sompo tempodo mpekule i tu'ai.

¹⁶ Sine kanandio-andio mpongkekewoi ira wita po'iangado anu lalu moiko onaemo aasa po'ianga suruga. Onaemo pu'uno nahi mokoko'ii-Do Ue Ala nineeako Ue Alado, hangano Dopatindaako iramo aasa kota.

¹⁷ Hangano pompe'ala-ala onaemo i Burahima tempono i inara-arahako, ipesombaakono i Saki. Onae, anu tumarimaomo dandi atuu, ipe'induakono mesombaakono anano anu asa-asa,

¹⁸ maupo umariomo ipinauako, ”Inulemu anu tepu'u inso ndi Saki anu ta nineeako inulemu.”

¹⁹ Hangano ipewowoloo, nine Ondae Ue Ala pabawa wangu ira mia maupo inso i olodo mia mate. Ka inso i ra'ai kana waliomo itarimao.

²⁰ Hangano pompe'ala-ala onaemo i Saki, saru mengkita olai i arono ironso ira i Yako ka i Esau.

²¹ Hangano pompe'ala-ala onaemo i Yako, mansano rangkuomo tempono ta mate, ironso ira orua anano i Yusupu, ka i'amba mesomba ka ipehonda a uluno tukono.

²² Hangano pompe'ala-ala onaemo i Yusupu tempono rangkuomo mateano ipaleleo mongkona peluarakodo to Isaraeli ka me'oliwi mongkona wukuno.

²³ Hangano pompe'ala-ala onaemo i Musa, mansano pine'anaako, domewunio mia mota'uno i larono otolu wula, hangano domengkitao, nine nana'ote atuu tekosi rupano ka nahi domedoitoakono parentano mokole.

²⁴ Hangano pompe'ala-ala onaemo i Musa, mansano langkaiomo, nahi behe ipinau anano ana beineno i Pirao,

²⁵ hangano inehenopo marasai saru bawaa-Do Ue Ala sekonopo anu sarai koa membasaio tuwu sanaa anu tehala.

²⁶ Pompokongkodeia hangano Ondae i Kerisituu ituduo gagi kaeaa anu lalu langkai sekonopo luwuno arataa i Masiri, hangano pinewowolono ipo'aroo a ntambo.

²⁷ Hangano pompe'ala-ala ka ibintaomo Masiri saru nahi doitoakono tekudado mokole. Onae mekorahako mengkena kana ikitao hapa anu nahi tengkita.

²⁸ Hangano pompe'ala-ala ka iweweuo Pasa ka pontawisia rea, ka si danggi ira anu mompepate luwuno ana aka.

²⁹ Hangano pompe'ala-ala ka domentelaloiomo Tahi Motaha mengkena kana telalo a wita motu'i, sine to Masiri mentondu, tempono dome'arahakono ndada.

³⁰ Hangano pompe'ala-ala ka itehoa luwu rere watuno Yeriko, mansano kota atuu tinanggolili opitu oleo tehineno.

³¹ Hangano pompe'ala-ala onaemo i Rahabi, beine belesu atuu, nahi mate merongaako ira mia mpe'ewa, hangano moiko itotowo ira anu mempadaso atuu.

³² Ka hapa mbo'uke anu asalakono kupao? Hangano nahi ta sompo tempoku, tewala aku tumutuluo mongkona i Gideo, i Baraki, i Simeso, i Yepeta, i Daudi ka i Semueli ka luwuno nabi,

³³ anu hangano pompe'ala-ala ka domenangi iramo poparentaa, mpoweweu menteea, mehaweo hapa anu dinandi, mpokopuo ngangado singa,

³⁴ mpepateo api anu mongkokongiri. Mentola iramo inso a mata mponai, mpohawe iramo roso a laro molemaa, gagi iramo memoroso a laro mpeteaa ka domensaari iramo bawaano sorodadu susua.

³⁵ Luwuno ine wali iramo mentarimao luwuno miado anu memate iramo, hangano mewinangu. Sine mia mehano dompo'ineeo koroido binobarasai ka nahi domebehe mentarimao pompotolaa, ka dompohawe pewangua anu moikoopo.

³⁶ Hinao mbo'u anu pinopodeu-deu ka sinepi, tamoako anu pinongu ka tinorungku.

³⁷ Mewinuno ira, meginaragadi, mempinepateako ponai; mpo'itu-itu ira mpesangkaako kulino bimba ka kulino bembe saru memarasaiako makerea, pompema'iso ka pobobarasai.

³⁸ Wawontolino andio nahi pototo ndi ondae. Mpo'itu-itu ira i pada one ka a mentorukuno, a laro ngkunepo ka a ntebokano wita.

³⁹ Ka luwudo nahi dompohawe hapa anu dinandi atuu, maupo pompe'ala-alado moweeako iramo aasa ponsakosii anu moiko.

⁴⁰ Hangano Ondae Ue Ala Dopatindaakitamo aasa anu lalu moiko; Ba nahi saru ontae nahi dompohawe hawe a sompoano.