IBARANI 10 - Wunta Mempori

Pesomba anu mentee ntu'u 10:1-18

¹ A laro songka Taura butu koa hinao eo-eono tekaduduia anu ta hawe, ka komba pengkonaano inso a ntekaduduia atuu. Onaemo pu'uno saru pesomba anu mengkena, anu sompo ta'u ipinesombaako mpiha, nahi ta polio songka Taura mokosompo ira anu me'aiwa mpo'ala tia i larono.

² Hangano tewala ipolio, manasa mia nahi ira mpompesombaako mbo'u pesomba, hangano ondae anu meweweuo pesomba atuu nami dompokoto'orio mbo'u halado umarido mempinokomempori pohona ranta nahina tampulaano.

³ Sine tendeano hangano pesomba atuudo sompo ta'u mia pinopoto'oriako nine hinao hala.

⁴ Hangano komba reano sapi lakino ke reano bimba lakino po'onini hala.

⁵ Onaemo pu'u tempono Dopewinso i wawontolino, mepau Ira, ”Pesomba ka anu pinesombaako nahi Ipe'eheo – sine koroi Ipatindaa-Kunemo –.

⁶ A mpesomba tinunu ka pesomba po'onini hala nahi Ipemoikoo.

⁷ Ka Ku'amba mepau: Mentee ntu'u, hawe Aku; alaro mpaluluno wunta hina teburi mongkona Ongkue ka Kuweweuo po'ehe-Miu, oo Ue Ala-Ku.”

⁸ I wawono mepau Ira, ”Pesomba ka anu pinesombaako, pesomba tinunu ka pesomba po'onini hala nahi Ipe'eheo ka nahi Ipemoikoo” – maupo ipinesombaako montonda songka Taura –.

⁹ Ka i'amba mepau Ira, ”Mentee ntu'u, hawe Aku weweuo po'ehe-Miu.” Anu amba-ambano Dopahihio, ka ipokorosoo anu ko'orua.

¹⁰ Ka hangano po'ehe-Domo andio mempinokomempori kitamo ranta nahina tampulaano hangano pompesombaako-Do koroi-Do i Yesu Kerisituu.

¹¹ Ka i'amba sompo sando mpesomba weweuo sompo-sompo oleo pompekakaakono ka mararu mompesombaako pesomba anu mengkena, anu nahi pokompahihio ntu'u hala.

¹² Sine Ondae, mansa-Do mesombaakono butu aasa pesomba hangano hala, mentoro Ira ranta nahina tampulaano i koana-Do Ue Ala,

¹³ ka kanandio-andio butu Ira sumikorio tempono, luwuno iwali-Do Ira mokogagio pelandaano karu-Do.

¹⁴ Nde hangano aasa koa pesomba Dopokosompo iramo anu pinokomempori-Do ranta nahina tampulaano.

¹⁵ Ka mongkona atuu Penaa Mempori mbo'u mesakosii ndi ontae,

¹⁶ hangano mansa-Do mepau, ”Ndio pedandia anu Aku weweuo saru ondae umarino tempo atuu,” mepau Ira mbo'u, ”Aku numao songka-Ku i laro aroado ka burio a mpinewowolo molinodo,

¹⁷ ka nahi Aku mewowoloo mbo'u luwuno hala ka salado.”

¹⁸ Gaagi tewala a luwuno atuu hinao po'ampunia, nami ta pinesombaako mbo'u pesomba hangano hala.

Pompedato 10:19-39

¹⁹ Gaagi, luwuno pepaekompo, hangano rea-Do i Yesu ontae kanandio-andio memosia kitamo mpokompewinso a laro po'ianga mempori,

²⁰ hangano Do'ungkahiomo pesalaa anu wo'ohu ka anu tuwuakita telalo a mpelingo, onaemo koroi-Do isa'a,

²¹ ka ontae hinao asa mia Sando Mpesomba Langkai gagi petewawa a Raha-Do Ue Ala.

²² Onaemo pu'uno aiwamo tompe'aro ndi Ondae Ue Ala saru aroa anu moleo ntu'u ka pompe'ala-ala anu moroso, hangano aroato pinokomorinaomo inso a laro aroa anu mosa'o ka koroito wino'ohiakoomo uwoi anu morina.

²³ Aiwamo tompe'ini moroso a pomperorohiato anu tomemangakuakono, hangano Ondae anu dumandio, nahi bali.

²⁴ Ka aiwamo ka tomemambekita ka memambepokowali a pompehohawa ka a anggaa moiko.

²⁵ Si tome'olaiakono luwuno tepumpuato mpesomba, kana domeleleoakono ba opia mia, sine aiwamo tomemambepatudu, ka komoku-mokuato meweweuo haweano oleo-Do i Ue anu umpedaomo.

²⁶ Hangano tewala me'inungako kita moweweu hala, umarito mpohawe ponto'ori mongkona menteea, ka nami hina mbo'u pesomba po'onini hala atuu.

²⁷ Sine anu hina onaemo matea anu mongkokongiriako pobitaraa ka api anu tedoa mokula anu ta mokomo'aio luwuno mia anu mpe'ewa.

²⁸ Tewala hinao mia anu nahi tarimao songkano i Musa, onae hinuku mate nahina pompehohawa a pompauno orua ke otolu mia sakosii.

²⁹ Tedoaopo lalu mobea pohuku anu asalakono ipinoweeako, anu lumolanda Ira Ana-Do Ue Ala, anu tumuduo mokoburu rea pedandia anu mokomemporio, ka anu mokongkodei Ira Penaa pe'aroa?

³⁰ Hangano tomento'ori Ira anu mepau, ”Pombaloa onaemo tia-Ku. Ongkuemo anu tumuntuo pombaloa.” Ka mbo'u, ”Ondae i Ue Ira bitarao bawaa-Do.”

³¹ Mongkokongiri ntu'u, tewala tedonta a ngkae-Do Ue Ala anu tuwu.

³² Impewowoloomo tempo anu telalo. Umarimiu mentarimao mewine, hadio pinemarasaimiu hangano mpekorahako komiu a mpeteahako anu mobea,

³³ moiko tempono imempinokogagi kikitaa hangano pompepaukiako ka marasaia, maupo tempono imemarasai saru ondae anu mewineweu kanandio.

³⁴ Lano memarasai komiumo saru mia anu mehinuku ka tempono irinontu arataamiu, mawongko aroamiu mentarimao mongkona atuu, hangano imento'orio, nine hinao arataamiu anu lalu moiko ka anu kongko mpiha.

³⁵ Onaemo pu'uno si mpotolao pompe'ala-alamiu, hangano langkai tambo anu sumikorio.

³⁶ Hangano mpokere komiu pompedato, ka imehaweo hapa anu dinandi-Do atuu, umarimiu meweweuo po'ehe-Do Ue Ala.

³⁷ ”Hangano tedei, tendeano tedeimo koa ntu'u tempo, ka Ondae anu Ira hawe, Iramo hawe, nahi ta tepotulu hawea-Do.

³⁸ Sine mia-Ku anu mentee ta tuwu hangano pompe'ala-ala, ka tewala onae monsuka, ka ndi onae nahi Aku memoikoo.”

³⁹ Sine ontae komba mia anu memposuka ka memate, sine mia anu pompe'ala-ala ka anu mpohawe tuwua.