IBARANI 1 - Wunta Mempori

Ondae Ue Ala mepau telalo a Ana-Do 1:1-4

¹ Mansano a tempo i ndi'upua Ondae Ue Ala mararu ka a mperupa-rupa pesalaa-Do mepau a uempu'uto telalo a luwuno nabi,

² ka a tempo pokotompa andio mepau Iramo ndi ontae telalo a Ana-Do, anu Dopakosiomo gagi anu tekona tumarimao luwuno anu hina. Hangano Ondae Dopokogagiomo Ue Ala wawontolino saru luwuno ihino.

³ Ondaemo wantano maramba-Do Ue Ala ka gambara tade-Do Ue Ala ka luwuakoano pinokorosoako pau-Do anu bukeako pabawa. Ka mansa-Do umari moweweu pompokomemporia inso a hala, mentoro Ira i koana-Do Anu Tedoa Langkai, a mpo'ianga anu mantande,

⁴ olaiopo lalu mantande sekonopo luwuno mala'eka, mengkena kana nee anu Dowineeako olaiopo lalu tekosi sekono needo.

Ana-Do Ue Ala mantande Irapo sekono luwuno mala'eka 1:5-14

⁵ Hangano ndi sema i olodo mala'eka atuudo hori Ira motae, ”Ana-Ku Omue! Kupe'anaakomumo oleo andio?” ka ”Aku gagi Ama-Do, ka Ondae Ira gagi Ana-Ku?”

⁶ Ka tempono Dowawao mbo'u Ana-Do anu amba-ambano i wawontolino, mepau Ira, ”Luwuno mala'eka-Do Ue Ala asalakono mpesombai Ira.”

⁷ Ka mongkona luwuno mala'eka mepau Ira, ”Anu weweu ira mala'eka-Do gagi angi mokora ka puu pompekakaako-Do megagi langano api.”

⁸ Sine mongkona Ana mepau Ira, ”Kadera poparentaa-Miu, oo Ue Ala, kongko mpiha motilalo ka nahina tampulaano, ka tuko poparentaa-Miu onaemo tuko menteea.

⁹ Ikekewoio moleoa ka umo'aliaakono gau mosa'o; onaemo pu'uno Ondae Ue Ala, Ue Alamu Do'urapia-Komiu lana gagi tondonino mawongkoa, lumaloio luwuno wali-wali tepo'asaa-Miu.”

¹⁰ Ka, ”A pompu'uano, oo Ue, Inaaomo empehino tolino, ka langi onaemo wineweuno kae-Miu.

¹¹ Luwuno atuu ta roopu, sine Omiu kongko mpiha, ka luwuno atuu ta gagi laano kana sangka;

¹² kana lemba meloe Komiu kupalulu ira, ka kana pe'anaa ira mebinali, sine Omiu mengkena mpiha, ka ta'u-Miu nahina tampulaano.”

¹³ Ka ndi semake i olodo mala'eka atuudo Dohori mepau, ”Pentoromo i koana-Ku, ranta Kuweweu ira iwali-Miu gagi pelandaano karu-Miu?”

¹⁴ Kombake luwudo onaemo luwuno penaa anu mpompekakaako, anu mentinena ka dompekakaako ira anu asalakono mpohawe tekaduduia?