Hosea 9 - Wunta Mempori

Isaraeli ta tinadi inso a wita-Do i Ue 9:1-9

¹ Siimo impo'unde, hei Isaraeli! Siimo impeboo-booli kana luwuno tongku! Hangano monsosabokomo binta Ira Ue Alamu, ukekewoio tambo mpebelesu a sompo ponsesaa gandu.

² Ponsesaa gandu ka pomporo'ia anggoro nahi ta moweeako ira kaanga; anggoro nahi ta mokonte'osa ira.

³ Nahi ira mpo'ia mpiha i wita-Do i Ue. I Eparai asalakono mekule i Masiri, ka i Asuri ira mpongkaa kaanga mokoburu.

⁴ Nahi ira mpotawa anggoro gagi pesomba ndi Ondae i Ue ka pesomba sinumbeledo nahi ta mokonsanaao aroado. Rotido kana roti pompemasusa, sompo mia anu kumaano ta gagi mokoburu, hangano rotido butu tiado ondaedo, nahi moiko iwinawa a laro raha-Do i Ue.

⁵ Hapake anu komiu mingki mpoweweu i tempono tepotowoa langkai, ka ia oleo langkai-Do i Ue?

⁶ Hangano moiko koa dompeliahako inso a mporopua, sine Masiri ta pumpu ira, Mepisi ta kumaburu ira. Rui ta tumutuwio luwuno sangka salakado anu masuli olino; ewo rui ta tuwu a laro luwuno kemado.

⁷ Haweomo luwuno oleo pohukua, haweomo luwuno oleo pombaloa, asalakono ka ito'oriomo Isaraeli, ”Nabi onaemo mia benge-benge, mia anu bukeako penaa onaemo mia mekombe!” Tendeano hangano langkaino salamu ka lansarano pe'iwalimu.

⁸ I Eparai, bawaa-Do Ue Alaku, kontongaano mompadaso nabi, oho porako manu-manu hinao a asa ngkeu salano, pe'iwalia hinao a raha-Do Ue Alano.

⁹ Tedoa ondalo domepansia kana a luwuno oleo Gibea; Ira mototoio salado ka ta hinuku halado.

Pohukua anu mompokomate a nto Isaraeli

¹⁰ Kana wua anggoro i pada one i Isaraeli Kuhaweo i ndi'ipua; kana wua amba-ambano, hasilino amba-ambano wua ara, Kukitao uempu'umu. Sine melako ira ndi Baala-Peori ka mpesombaakono koroido a lahumoa anu mompokoko'ii. Megagi ira mokoburu kana hapa anu kinekewoido.

¹¹ Marambano i Eparai menee kana manu-manu: nahina anu me'ana, anu mentia, ke maupo anu mo'ia koroino!

¹² Maupo dompokolangkai ira anado, Aku weweu ira ka dontetadi luwu anado. Mentee ntu'u, memasola iramo i tempono Ku'olai inso ndi ondae!

¹³ I Eparai, kana anu kinita-Ku, iweweu iramo anano gagi kondehora wembaa; i Eparai ta meweengako ira anano a puu pompepatedo.

¹⁴ Weeako iramo, oo Ue! Hapa anu Komiu weeako ira? Wee'ako iramo pe'anakaa anu te'onini ka uo anu motu'i.

¹⁵ Luwuno wineweudo mosa'o gagi i Giliga, mentee ntu'u, maupo i ra'ai Ku'o'aliaako ira. Hangano mosa'ono luwuno wineweudo, Aku sumaari ira inso i raha-Ku. Nahi Aku mehohawa ira mbo'u; luwuno mia pinemota'udo onaemo puu mpe'ewa.

¹⁶ I Eparai sinepiomo, hakano motu'iomo, nahi ira mpehasiliako wua. Maupo dompe'ana, Aku mepateo pe'anakaano anu mentudu.

¹⁷ Ondae Ue Alaku ta tumadi ira, hangano nahi domperorongeako Ira, ira mpelakopi i olodo luwuno tongku.