Hosea 8 - Wunta Mempori

Isaraeli morawo angi, sumowi lompiu 8:1-14

¹ Puuriomo tawuwua! Tepatinda kana rajawali a wawo raha-Do i Ue! Hangano domelinggeiomo pedandia-Ku ka me'ewaio pompaguru-Ku.

² Ndi Ongkue dompeboo-booli, ”Oo Ue Alaku, omami, to Isaraeli tumo'ori Komiu!”

³ To Isaraeli nahi tarimao anu moiko; po'ineeomo ka iluluo iwali!

⁴ Mpopotoro iramo mokole, sine nahi dompesikeno ndi Ongkue; mpopotoro ira mia pinemota'u, sine nahi Kuto'orio. Inso a wulaa ka salaka domeweweuo luwuno lahumoa tiado ondaedo, ranta ka domempinokotampula.

⁵ Nahi Kutarimao ana sapimu, hei Samaria; tekuda-Ku tensila ndi ondae! Hawe te'opia tehineno ondae nahi pinokomempori?

⁶ Menteeano lahumoa atuu inso a nto Isaraeli, wineweuno puu mpo'angga, ka onae komba Ondae Ue Ala! Mentee ntu'u, ta gagi sibano ana nsapi Samaria atuu!

⁷ Hangano ondae mporawo angi, ira mponsowi lompiu. Gandu anu mentonggi nahina ndi ondae; luwuno punopaho nahi pehasiliako tarigu; ka tewala mompowee hasili, mia hawe tumeleo.

⁸ Isaraeli tineleomo; kanandio-andio mekongko ira i olodo luwuno tongku kana bolusa anu nahi mentudu.

⁹ Hangano ondae melako iramo i Asuri, kana kalide ntobu anu teponsia asa-asano; i Eparai montia-tiaomo pompowee pompehohawa.

¹⁰ Maupo dompontia-tia pompowee atuu i olodo luwuno tongku, kanandio-andio Aku pumpu ira, ranta nami tehine mbo'u ira mpopu'u mentembio tembia inso a mokole ka luwuno anu pabawa.

¹¹ Mentee ntu'u, i Eparai mompokohadioomo meda pontunua pesomba poweweuano hala; luwuno meda pontunua pesomba atuu pompu'uano dompoweweu hala.

¹² Maupo Kuburiakono hadio pompaguru-Ku, luwuno atuu domerekeo kana aasa anu susua.

¹³ Mpompowee ira ndi Ongkue luwuno pesomba sinumbele; mpopesombaako ira bau ka domengkaano; sine nahi Dopemoiko ira i Ue. Kanandio-andio Dopototoio salado ka humukuo halado. Ondae asalakono mpekule i Masiri!

¹⁴ I Isaraeli kumolupeo anu mokogagio ka montadeo luwuno langkanae; i Yehuda mokohadioo kota mebente; sine Aku mompotola api i larono luwuno kotado, ka i'amba luwuno bente ka langkanaedo ta kumaano.