Hosea 7 - Wunta Mempori

¹ Tewala Kupokotompao Isaraeli, te'ungkahiomo salano i Eparai ka luwuno mosa'ono Samaria, hangano mpoweweu ira pompopo'oo; mia monako merumpa mewinso, gerombola mporontu i bungkuno.

² Nahi dompokompewowoloo i laro aroado, nine Kupewowoloo luwuno wineweudo anu mosa'o. Maupo kanandio-andio luwuno wineweudo kumadu ira, luwuno kongko i aro-Ku.

Marisuno a poparentaa i Isaraeli nahi Dokongkomi Ira i Ue 7:3-16

³ Aroano mokole dompokosanaakono wineweudo mosa'o, ka pegaupido a luwuno mia pinemota'u.

⁴ Luwudo puu mponsosabo, kana awu pompotuwua api anu kolanga-langa, tempono puu mpoweweu roti menaa-naa mokolangkaio apino, kontongaano ipisio sinalono ranta ka ite'iliako ragi.

⁵ A mpogaweado mokole, ontae mia pinemota'u pinokomokolili ulu, molanguako anggoro; onae tepo'asaako ira puu mpopasinggiri.

⁶ Laro aroado kana pompotuwua api, aroado tensila, larono asa wongi tekudado roodo, tempono mo'oru tensila mbo'u kana api anu mesila'e.

⁷ Luwudo kana mokulano awu pompotuwua api, ka kumaa ira puu mpobitarado. Luwuno mokoledo memate iramo; nahina maupo te'asa mia inso ndi ondae mebooli ndi Ongkue.

⁸ I Eparai tepo'iaomo i olodo luwuno tongku, i Eparai gagiomo roti anu motaha asambali.

⁹ Mia hawe kumaano ka ipingko rosono, sine onaeno nahi to'orio; uwano mbo'u hadioomo, sine onaeno nahi pokonto'orio.

¹⁰ Pompelangka-langkaino i Isaraeli gagi sakosii a ngkoroino, sine nahi dompepokule ndi Ondae i Ue, Ue Alado, ka nahi dome'ungke Ira maupo luwuno atuu.

¹¹ I Eparai gagiomo kana marapatii anu momperorongeako, nahi pompewowolo; a nto Masiri dompebooli, a nto Asuri domelako.

¹² Tewala melako ira, Aku padindio buani-Ku i wawodo; Aku motii ira kana manu-manu i laro meene, Aku sumepi ira tempono Kurongeo dompepumpu.

¹³ Masola iramo, hangano mpolai ira inso ndi Ongkue! Masola iramo, hangano dome'ewai Aku! Behe Aku tumolosi ira, sine mpegaupi ira ndi Ongkue.

¹⁴ Nahi dompebooli ndi Ongkue inso i aroado, tendeano mperaaliki a mpepomboleado. Domensosorekio koroido hangano gandu ka anggoro, ka dome'ewai Aku.

¹⁵ Maupo Kupaguru iramo ka mokorosoako ira tokiado, mpotoo ira mpoweweu mosa'o ndi Ongkue.

¹⁶ Mpepokule ira sine komba ndi Ondae Anu i Wawono, ondae kana pana anu teposule pe'aroano; luwuno mia pinemota'udo ira memateako ponai, hangano elodo bukeako pontotonaa. Onaemo pasinggiri ndi ondae i wita Masiri te'ipua.