Hosea 6 - Wunta Mempori

¹ ”Aiwamo tompepokule ndi Ondae i Ue, hangano momperangkami Iramo, sine Ira mokotompa kita, monsepi Iramo, sine Ira walu kita.

² Ira motuwu kita umarino orua oleo, ia oleo ko'otolu Ira wangu kita, ka kita mentuwu i aro-Do.

³ Aiwamo tomento'orio ka mentee ntu'u tumo'ori Ira i Ue; manasa Ira me'umbaako kana wanta, Ira hawe ndi ontae kana usa, kana usa tempo pinopaho mentumba anu umuwoio tolino.”

⁴ Hapa anu Aku weweuo ndi omue, hei Eparai? Hapa anu Aku weweuo ndi omue, hei Yehuda? Pompehohawamu kana gawu mo'oru, ka kana tontoru anu moliu tempono mo'oru.

⁵ Onaemo pu'uno Aku puro-puro ira molalo luwuno nabi, Aku mepateako ira pau a nganga-Ku, ka songka-Ku meluarako kana mewine.

⁶ Hangano inehe-Ku petenunu mompehohawa ka komba pesomba sinumbele; Inehe-Ku ponto'oria mongkona Ondae Ue Ala, laluaopo sekono pesomba tinunu.

I Eparai nahi behe tepidi

⁷ Sine kana i Adama, domelinggeiomo pedandia, nahi dompesomba ndi Ongkue i ra'ai.

⁸ Gileadi onaemo kotado mia melambaha, bukeako hanga rea.

⁹ Kana gerombola anu montowoki mia, kanandiomo tepo'asaado sando mpesomba; ondae mpompepate a nsala lumako i Sikemi, mentee ntu'u, mpoweweu ira tataa.

¹⁰ I olodo to Isaraeli Kukitaomo luwuno mongkona anu mongkokongiri; i ra'ai pebelesuano i Eparai, i Isaraeli weweuo koroino mokoburu.

¹¹ Tiamu mbo'u, hei Yehuda, tinantuiomo ponsowia: tewala Kupokotompao teweweudo bawaa-Ku.