Hosea 5 - Wunta Mempori

Pompokodoito a nto Isaraeli ka luwuno petewawano 5:1-7

¹ Rongeomo andio, hei luwuno sando mpesomba, pekokoongakonomo hei to Isaraeli, ka ta'oomo biri, hei somborino mokole! Hangano tiamiumo pohuku atuu, hangano megagi komiumo dampa ndi Misipa, ka buani anu tinende i wawo ntorukuno Tabori,

² ka bolo anu kineke i lembono Sitimi, Aku sumepi ira luwu.

³ Kuto'orio i Eparai, ka Isaraeli nahi tewuni ndi Ongkue, hangano monsosabokomo, hei Eparai; ka Isaraeli iweweuomo koroino mokoburu.

⁴ Luwuno wineweudo nahi pototono dompepokule ndi Ondae Ue Alado, hangano aroa ponsosaboa kongko a laro ngkoroido, ka nahi domento'ori Ira i Ue.

⁵ Pompelangka-langkaido tongku Isaraeli gagi sakosii a ngkoroino onaeno; i Eparai ta tebangku tetiduako salano onaeno, i Yehuda mbo'u meronga ondae.

⁶ Saru asa bawaa bembe bimba ka sapi pesomba, domelako umungke Ira i Ue, sine nahi dohawe Ira; Dobinta iramo.

⁷ Nahi dompetenunu ndi Ondae i Ue, hangano dompe'anaako iramo ana anu komba anado ntu'u; kanandio-andio ondae ka leredo ta rinawo-rawo a mporame-ramea wula wo'ohu.

Nahina tuduno i Isaraeli mo'ungke pepetulungia 5:8-14

⁸ Puuriomo tawuwua i Gibeoni, ka napiri i Rama. Peboolimo i Beti-Aweni, ”Petangkoromo, i bungkumu hei Benami!”

⁹ Eparai ta gagi wita londa a oleo pohukua. Mongkona luwuno suku Isaraeli, Kupauo hapa anu manasa.

¹⁰ Luwuno mia pinemota'u i Yehuda kana mia anu mompahe tida; ndi ondae Aku umuwuo tekuda-Ku kana uwoi.

¹¹ I Eparai tepokonsii, pinuro-puroako pohuku, hangano onae mekorahako melempa tumondao lahumoa nahina pengkonaano.

¹² Aku gagi kana ule-ule ndi Eparai ka wingo a nsuku Yehuda.

¹³ Mansano kumitao i Eparai hakino, ka i Yehuda kumitao moboono, lumakoomo i Eparai a nto Asuri ka montena mia lumako ndi Mokole Mosia. Sine maupo onae nahi polio mokotompa komiu ka umoninio moboo atuu inso ndi omue.

¹⁴ Hangano Ongkue andio kana singa ndi Eparai ka singa mongura a nsuku Yehuda. Ongkue, Ongkue-Ku anu momperangkami, umarino atuu lumako, Aku molaisakono ka nahina anu motolao.

Tepidino i Isaraeli anu asa mpiniro koa 5:15–6:6

¹⁵ Aku lumako, mekule a mpo'ianga-Ku, ranta ka domemangaku saala ka umungkeo rupa-Ku. A laro masukaraado ira mengkekewoi Aku: