Hosea 4 - Wunta Mempori

Pongkuahako a nsando mpesomba ka tongku anu umewa 4:1-19

¹ Rongeomo pau-Do i Ue, hei Isaraeli, hangano Ondae i Ue hinao kara-kara saru palilino wita andio, hangano nahina petenunu, nahina pompehohawa, ka nahina ponto'ori mongkona Ondae Ue Ala i wita andio;

² butu montotonaa, megaupi, mompepate, monako, monsosabo, mobobarasai ka po'uwua rea tinondaako mbo'u po'uwua rea.

³ Onaemo pu'uno wita andio ira pompemasusa, luwuno palilino ta me'i'isei; luwuno kondehora i tongampada ka manu-manu i laro meene, maupo luwuno bou a ntahi mbo'u ta tepumpu mate.

⁴ Sine, si hina mia motuntu, kasihina mia mekara-kara, hangano tongkumu gagi tumuntuko, hei sando mpesomba!

⁵ Omue kotebangku tetidu tempono meene ka nabi ta tetidu mbo'u merongaakomu i tempono wongi; inemu mbo'u Aku mepateo.

⁶ Bawaa-Ku memasola hangano nahi doto'ori Ira Ue Ala; hangano nahi utarimao ponto'oria atuu, Ongkue mbo'u nahi Aku tumarimako gagi sando mpesomba-Ku. Hangano ukolupeo pompaguru-Do Ue Alamu, Ongkue mbo'u Aku kumolupe ira anamu.

⁷ Kohadi-hadiodo, koteha-tehalado ndi Ongkue, marambado Aku umeuakono pontataa.

⁸ Ondae mpongkaa inso a halado bawaa-Ku, po'eheno aroado te'aro a mpe'ewado bawaa-Ku.

⁹ Kana anu gagi a mpalili, kanandio koa mbo'u a nsando mpesomba: Aku humukuo hangano luwuno pomputusino ka luwuno wineweuno Aku sumuloakono.

¹⁰ Ira mpongkaa, sine nahi ira memowohi, ira mpebelesu, sine nahi ira ntetiangi, hangano dobinta Iramo i Ue ka domentuwu a laro mpebelesua.

¹¹ Anggoro ka uwoi anggoro mokontetadio pinewowolo mentee.

¹² Bawaa-Ku mpesikeno a ngkeuno, ka tukono moweeakono sangkino, hangano penaa ponsosaboa mokopansia ira, ka ondae mponsosabo binta Ira Ue Alado.

¹³ Ondae mpopesombaako pesomba i punsuno luwuno torukuno ka mpontunu pesomba i wawono pongku-pongku wita, a ntoto ngkeu tarabanti ka keu hawari ka keu langkai susuano, hangano inengoino mompokonsanaa. Onaemo pu'uno luwuno anamu beine mponsosabo ka luwuno kombiado ana ntamamu mpebelesu.

¹⁴ Nahi Aku humuku ira anamu beine maupo domponsosabo, ke luwuno kombiado ana ntamamu, maupo dompebelesu. Sine, tamado isa'a melako mpe'asaako ira beine mebelesu ka mompesombaako pesomba meronga luwuno mia mebelesu a raha pesombaa susua. Bawaa anu nahina ponto'orino ta tedonta.

¹⁵ Tewala mansako monsosabo, hei Isaraeli, siimo Yehuda tetonda saala! Siimo lako i Giliga; siimo pewuatako i Beti-Aweni, ka siimo pesumpa, ”A nee-Do i Ue anu tuwu!”

¹⁶ Hangano Isaraeli umewa kana sapi anu umewa, kana'umpe ta gagi Dopakambi Ira i Ue kanandio-andio, kana bimba a ntanalapa?

¹⁷ I Eparai tepo'asaako ira lahumoa, po'ineeomo koa onae!

¹⁸ Mansado memolangu, mpepotende ira mpebelesu; domengkekewoio pontataa sekonopo mohawe pompelangkai.

¹⁹ Angi tumutuwi ira a laro mpanido, ka ira mempinokoko'ii hangano luwuno pesombado.