Hosea 2 - Wunta Mempori

To Isaraeli nahi tinarima ka pinomule 2:1-22

¹ ”Tuntuomo inemu, tuntuomo, hangano onae komba beine-Ku, ka Ongkue komba tamano. Asalakono pebelesuno ipoko'olaio inso i arono, ka ponsosabono inso i olono wua radano,

² kasi mansa Kulohuo sangkano ranta kai kolambe-lambe, ka mo'ineeo kana a oleo ipine'anaako, weweuo kana pada one, weweuo kana wita mokari, ka mo'ineeo kai mate mokoranga.

³ Luwuno anano nahi Aku mehohawa ira, hangano ondae onaemo nana'ote belesu.

⁴ Mentee ntu'u inedo gagiomo belesu; beine anu mentiaako ira moweweuomo mokoko'iia. Hangano ipotae: Aku tumonda ira mia ineheku ntu'u, anu mowee aku roti ka uwoi inuaku, wulu bimba ka sawu lenaku, lana ka inuaku.

⁵ Onaemo pu'uno, menteeano Aku umolotiakono ewo rui salano, ka mompontade rere watu umukoo, ranta nahi pokompohawe salano.

⁶ Onae ta lumulu ira pinehohawano, sine nahi ta humawe ira; onae ta umungke ira, sine nahi ta tepohaweako ira. Ka onae ta motae: Aku mekule mepokule a ntamaku anu amba-ambano, hangano tempo atuu sanaa akupo sekono kanandio-andio.

⁷ Sine nahi to'orio nine Ongkuemo anu moweeakono gandu, anggoro, ka lana, ka anu mokohadioakono salaka ka wulaa anu domeweweuo tinaha Baala.

⁸ Onaemo pu'uno Aku wali umalao gandu-Ku i tempono ka anggoro-Ku i tempono, Aku wali sumintakio sawu wulu bimba ka sawu lena-Ku anu tumutuwio anuno.

⁹ Ka kanandio-andio, Aku sumungkeo anuno i arodo mia pinehohawano, ka maupo te'asa mia nahi ta motolao inso a ngkae-Ku.

¹⁰ Aku mokompenaa-naao luwuno pinemawongkono, oleo langkaino, wula wo'ohuno ka oleo Sabano ka luwuno porame-rameno.

¹¹ Aku rumopuo keu anggorono ka keu arano, mongkona teweweu atuu ipotae, ’Luwuno andio tamboku, anu domeweeakune mia pinehohawaku!’ Aku weweuo gagi tobu, ka luwuno kondehora i tonga mpada ta kumaano.

¹² Aku humukuo hangano luwuno oleo pesombaano a Baala tempono ipontunuako ira pesomba, ka meramba-rambaako tole-toleno saru enuno. Itonda ira mia pinehohawano ka kumolupe Aku,” kanandiomo pau-Do i Ue.

¹³ ”Onaemo pu'uno, menteeano Aku popandeio ka wawao i pada one, ka i'amba mepau mokorodoo aroano.

¹⁴ Inso i ra'ai Aku weakono lere anggorono, ka Kuweweuo lembono Akoro gagi pewowa pomperorohia. I ra'aimo onae ta meweengakono koroino kana tempono imongura, kana tempono ipelungka meluarako inso i wita Masiri.

¹⁵ Ia oleo atuu, kanandiomo pau-Do i Ue, Omue komoboi Aku: Tamaku, ka nami poboi Aku mbo'u: Baalaku!

¹⁶ Ka Ku'amba metadiakono needo Baala inso a ngangamu, ka needo nami ta pinau mbo'u.

¹⁷ Aku mowutu pedandia ndi omue i tempo atuu saru luwuno kondehora i tongampada, saru luwuno manu-manu i laro meene, ka luwuno kondehora melele a wawo wita; Aku umoninio wo'eno pana, ponai ka parewa mpetea inso i witamu, Aku weweuko rodo mepombole.

¹⁸ Aku mokogagiko beine-Ku ranta nahina tampulaano ka Aku kumombiako a laro menteea ka moleoa, a laro mpetenunu ka pompehohawa.

¹⁹ Aku mokogagiko beine-Ku a laro mpetenunu, ranta kau to'ori Ira i Ue.

²⁰ Ia oleo atuu Aku merorongeakono, kanandiomo pau-Do i Ue, Aku merorongeakono langi, ka langi ta merorongeakono tolino.

²¹ Tolino ta merorongeakono gandu, anggoro ka lana, ka ondae andio ira mperorongeakono i Yisire'eli.

²² Onae Aku merawoakono tia-Ku i tolino, ka mehohawao i Lo-Ruhama ka Aku mepau ndi Lo-Ami: omuemo bawaa-Ku! Ka onae ta motae: Ue Alaku!”