Hosea 14 - Wunta Mempori

¹ Samaria asalakono tumembio salano, hangano onae umewa ndi Ondae Ue Alano. Ira memateako ponai, luwuno anadalono ta pinerego ka luwuno beineno anu mentia ta binonsi kompono.

Tepidido to Isaraeli ka dandi-Do i Ue 14:2-9

² Pepokulemo, hei Isaraeli ndi Ondae i Ue, Ue Alamu, nde tetidukomo hangano salamu.

³ Wawaomo perongaakono luwuno pau andio, ka pepokulemo ndi Ondae i Ue; pepaumo ndi Ondae, ”I'oniniomo luwuno saala, ka Itarimaomo anu moiko. Gagi euno sapi, kami mpesombaakono mangakumami.

⁴ Asuri nahi pokokadudui kami; nahi kami mpopesawiki ngara, ka nami kami mpotae mbo'u, ’Ue Alamami’ a wineweuno kaemami. Hangano ndi Omiu nana'ote nahina amano mohawe pompehohawa.”

⁵ Aku mokotompa ira inso a mpopebungkuido ndi Ongkue, Aku mehohawa ira hangano po'ehe-Ku, hangano tekuda-Ku telusa inso ndi ondae.

⁶ Aku gagi kana tontoru a nto Isaraeli, ka onae ta tewile kana sisi bonse ka mepahoakono luwuno hakano kana hadio keu Libano.

⁷ Luwuno sampano ta tetiangi hadio, mewantano ta kana keu saitu ka mana mo'ahino kana hadio keu Libano.

⁸ Ira mpo'ia mbo'u a laro mpe'engoa-Ku ka mentuwu kana gandu; ira ntetiangi kana keu anggoro, anu telele kana anggoro Libano.

⁹ I Eparai, hapa mbo'u tekaino ndi Ongkue a luwuno lahumoa? Ongkuemo anu sumangki ka mensiroiko! Ongkue andio kana keu sanobari anu molowulu, inso ndi Ongkue upohawe wua.

Pokotompaano pau 14:10

¹⁰ Isema anu pande mompewowolo, po'ineeomo ka ito'orio luwuno atuu. Isema anu mompekokoongako, po'ineeomo ito'orio; hangano luwuno sala-Do i Ue atuu moleo, ka mia mentee tumondao, sine mia umewa tetidu i ra'ai.