Hosea 13 - Wunta Mempori

Tekuda-Do i Ue ta dumunsio Eparai 13:1–14:1

¹ Mansano mepau i Eparai, mpondidi-ndidi iramo mia; onae inunde-unde i Isaraeli, sine onae saala hangano Baala, umarino atuu mateomo.

² Maupo kanandio-andio tepahe ira ntehala, ka moweweu tiano koroino tinaha tinawa inso a nsalaka saru luwuno lahumoa, montonda saru ponto'orido; luwuno atuu wineweudo mia mpande mpoweweu. Pesombaakonomo pesomba ndi ondae!, paudo mia. Moikoomo mia woo-wooo ana nsapi!

³ Onaemo pu'uno ondae ira megagi kana gawu mo'oru, kana tontoru anu moliu mo'o-mo'oru ntu'u, kana ota anu pinuurino opue inso a mposesaa ke kana ahu inso a pesalaano ahu.

⁴ Sine Ongkuemo Ue, Ue Alamu mompu'u i wita Masiri; omue nahi ponto'ori Ue Ala sangkadio Ongkue, ka nahina Puu mpongkadudui sangkadio Ongkue.

⁵ Ongkuemo anu mensiroiko i pada one, i wita anu morungku.

⁶ Tempono domempinakambi, memowohi ira; mansado memowohi, mpopelangka-langkai ira. Onaemo pu'uno ka domengkolupe Aku.

⁷ Ka Ongkue gagi kana singa ndi ondae, kana nggapu langkai meboti-boti Kupadasoo a wiwi nsala.

⁸ Aku sumapoi ira kana berua anu tetadi anano, Aku berio radado. I ra'ai Aku kumaa ira, kana singa waino; kondehora mo'ila i tongampada ta meberi-beri ira.

⁹ Omue masola, hei Isaraeli, hangano omue umewai Aku, umewaio puu Mpontulungimu.

¹⁰ Isuaomoke mokolemu, ka ikaduduiko luwuno kotamu, ka luwuno anu pabawa ndi omue. Mongkona ondae mepaukomo, ”Weeakunemo asa mokole ka luwuno anu langkai potorono!”

¹¹ Kupoweeakomu asa mokole a laro ntekuda-Ku ka umalao a laro mosa'o-Ku.

¹² Salano i Eparai tinongo, halano ninaa.

¹³ Pompemahaki me'ana mese'elungio hinaano, sine onae nana'ote anu nahi ponto'ori mompewowolo; mansano haweako tempono, onae nahi behe meluarako inso a mpe'anakaa.

¹⁴ Nde Aku motola ira ke inso a mpabawano tolinodo mia mate? Nde Aku tumolosi irake inso a matea? Isuaomoke haki lelemu, hei matea, isuaomoke poropumu, hei tolinodo mia mate? Mata-Ku tetutuwi tiano pompehohawa.

¹⁵ Maupo ituwu mewalo i olono luwuno ewo, angi i sabaano oleo, angi-Do i Ue ta hawe mepuuri inso i pada one, mokomotu'io luwuno insoano uwoi ka mokonsa'o luwuno mata uwoino; Ira rumontuo arataa, luwuno sangka anu tekosi.