Hosea 12 - Wunta Mempori

I Eparai ka i Yako ama mpu'uno 12:1-15

¹ I Eparai kumadua-Kune pegaupi, a nsuku Isaraeli saru pe'akala; Yehuda mbo'u moliu inso umpedaako Ira Ue Ala, inso umpedaako Ira Anu Tedoa Mempori anu metenunu.

² I Eparai mompakambi angi, ka molulu angi sabaano oleo asa oleo, mompokohadio pegaupi ka pobobarasai. Mpowutu ira pedandia saru Asuri, ka mpowawa lana a nto Masiri.

³ Ondae i Ue mekara-kara saru Yehuda. Ira humukuo Yako menunu saru peleluno, ka Ira weeakono montonda saru luwuno wineweuno.

⁴ I laro pe'anakaa i'akalaomo pepaekompono, ka a laro morosono ipelulukuako Ira Ue Ala.

⁵ Onae melulukuako Mala'eka ka monangi; onae mengese ka mo'ema pompehohawa ka pompowee ndi Ondae. I Beteli i Yako tepotowoako Ira, ka i ra'aimo Dopepau ndi ontae.

⁶ Ondaemo i Ue, Ue Alano luwuakoano, Ondae nineeako Ue.

⁷ Omue asalakono pepokule ndi Ondae Ue Alamu, pekariaomo petenunu mompehohawa ka moleoa, ka sikori Iramo mpiha Ue Alamu.

⁸ Mengkena kana Kana'a, saru pontimba nahi mentee a ngkaeno, ka inehedo mporontu,

⁹ kanandiomo pauno i Eparai, ”Kombake gagi akumo mompoli, mohawe akumo arataa tiaku; Luwuno atuu pine'osaiku. Mia nahi dompohawe sala anu gagi halaku.”

¹⁰ Sine Ongkuemo Ue, Ue Alamu mompu'u inso i wita Masiri; Aku weweuko mo'ia mbo'u a luwuno kema kana a luwuno oleo tepotowoa atuu.

¹¹ Mepau Akumo a luwuno nabi, mompowee hadio anu kinita, ka molalo luwuno nabi Kupohaweo pandiri.

¹² Kombake Gileadi atuu lambaha? Ondae megagi nahina tuduno. Kombake i Giliga dompesombaakono luwuno sapi lakino? Luwuno meda pontunua pesombado mbo'u gagi howuno watu a banga-bangano lere.

¹³ I Yako molai a lereno i Arami, ka i Isaraeli mepe'ataako koroino ka ipohawe kombiano; ka ipohawe kombiano, onae gagi puu pompakambi.

¹⁴ Molalo asa nabi, Ondae i Ue tumaateo i Isaraeli meluarako inso i wita Masiri, molalo asa nabi, onae dinagai.

¹⁵ I Eparai mompokotesingkaomo tekuda anu ondalo, pasua reano ta pinopotembiako ndi onae, ka tataano Ira sumuloakono Ueno ndi onae.