Hosea 11 - Wunta Mempori

Pompehohawa-Do i Ue numangio moteano aroado to Isaraeli

¹ Tempono i Isaraeli da mongura, Kupehohawao, ka inso i Masiri Kupoboio ana-Ku atuu.

² Tepahe pinoboi, tepahe pontonda salado ondaedo. Ondae mpompesombaako pesomba a luwuno Baala, ka mpotunu pesomba tiano luwuno tinaha.

³ Kahinaano Ongkuemo anu paguruo i Eparai melempa ka tumande ira a ngkae-Ku, sine nahi dompokonto'orio, nine Ongkue mokotompa ira.

⁴ Kudiiako ira koloro pontulungi winutuako pompehohawa. Ndi ondae Ongkue kana mia anu montande pasanga inso a wuku asedo; me'odo Aku moweeako ira kaanga.

⁵ Kombake ondae asalakono mpekule i wita Masiri? Po'ineeomo Asuri gagi mokoledo, hangano nahi domebehe ntepidi.

⁶ Ponai ta me'a'e a luwuno kotado, rumopuo luwuno lansono pewowado ka ta kumaa ira, hangano luwuno tinoodo.

⁷ Bawaa-Ku mpekorahako mpebungkui Aku; Mpebooli ira a Baala ka mpenaa-naa mpelangkaio nee-Ku.

⁸ Kana'umpe nahi Aku merioko, hei Eparai, meweengakomu, hei Isaraeli? Kana'umpe nahi Aku merioko kana i Adima, weweuko kana i Seboimi? Aroa-Ku mepokule a ngkoroi-Ku, pompehohawa-Ku mansa haweako.

⁹ Nahi Aku motiio tekuda-Ku anu tensila, nahi ta sinolangi mbo'u i Eparai. Hangano Ongkue andio Ue Ala komba mia, anu mempori i tonga-tongamiu, ka nahi Aku hawe a laro ntekuda.

¹⁰ Ira mpetonda ndi Ondae i Ue; Ira mengaoli kana singa. Mentee ntu'u, Ira mengaoli. Nana'ote ira mehawe saru mpondidi-ndidi inso i sumooano oleo,

¹¹ kana manu-manu anu mondidi-ndidi hawe inso i Masiri, ka kana marapatii inso i wita Asuri, ka Ku'amba numaa ira mbo'u a luwuno rahado, kanandiomo pau-Do i Ue.