Hosea 10 - Wunta Mempori

Pohukua a Mpesombaa Ana Nsapi Beti-Aweni

¹ Isaraeli onaemo keu anggoro anu tuwu mewalo, anu mehasiliako wua. Kohadi-hadiono wuano, kohadi-hadiono meda pontunua pesomba wineweuno. Komoi-moikono witano, komoi-moikono wineweuno luwuno tugu lahumoa.

² Aroado pande mpe'akala, kanandio-andio asalakono domentembio poko'ariano. Luwuno meda pontunua pesombado Ira rumawoo, luwuno tugu lahumoado Ira humoao.

³ Mentee ntu'u, kanandio-andio mpotae ira, ”Nahina mbo'u mokoleto, hangano nahi tomedoitoako Ira i Ue. Hapa anu ta mokoweweuakita mokole?”

⁴ Kopau-pau ira, mpesumpa nahi mentee mpoweweu pedandia; songka montonda po'ehedo kana pinopaho merasu a banga-bangano lere.

⁵ Palilino Samaria mpondidi-ndidi, medanggaraakono ana nsapi Beti-Aweni. Mentee ntu'u, palilino ira mpompemasusaakono, ka luwuno sando mpesombano ira mensabangio, hangano marambano meliahakoomo inso ndi onae.

⁶ Ana nsapi atuu ta winawa i Asuri gagi pesomba ndi Mokole Mosia. Eparai ta pinokoko'ii, Isaraeli ta montembi mokoko'iia hangano tinoono.

⁷ Samaria ta rinawo-rawo; mokoleno kana asa mpole sampa anu lonto a uwoi.

⁸ Luwuno po'ianga pesombaa ndi Aweni, anu gagi halano Isaraeli, ta pinokotampula. Ewo rui ka rui ta tuwu a wawo luwuno meda pontunua pesombano. Ira mpotae a luwuno torukuno, ”Howui kamimo!” Ka a luwuno pongku wita, ”Tehoamo dumunsi kami!”

Wineweuno mosa'o i Eparai mohawe terawo-rawo

⁹ Mompu'u luwuno oleo Gibea tehalakomo, hei Isaraeli; i ra'ai kongkodo mpe'ewa. Kombake metea mo'ewai mia molengku ta humawe ira mbo'u i Gibea?

¹⁰ Montonda po'ehe-Ku Aku sumepi ira. Luwuno tongku ira mpepumpu umewai ira, tempono domensinepi hangano hadiono salado.

¹¹ I Eparai i ndi'ipua asa ana nsapi anu tepaguru, anu ineheno monsesa, palasano anu tekosi Kupo'ineeo, sine kanandio-andio, i Eparai Kutenao mo'angga; i Yehuda asalakono mompadeko, i Yako asalakono mongkambu wita tiano onaeno.

¹² Porawomo menunu saru moleoa, sowiomo tiamu montonda petenunu mompehohawa! Anggaomo tiamu wita wo'ohu; temponomo umungke Ira i Ue, ranta ka Dohawe ka umusaiakomiu moleoa.

¹³ Mpopadeko komiumo mosa'oa, mponsowi molengkua, mpongkaa wua mpegaupia. Hangano omue merorohio salamu omuemu, ka hadiono po'osaiamu,

¹⁴ ka marisuako peteaa ta me'umbaako i olono tongkumu, ka luwuno bentemu ta rinawo-rawo kana i Salamani rumawo-rawoo Beti-Arabeli a oleo peteaa, tempono luwuno ine saru nana'ote pinerego.

¹⁵ Kanandiomo ta wineweu ndi omue, hei Beteli, hangano mongkokongirino lambahamu. I tempono umpeda meene mokole Isaraeli ta pinokotampula.