Hagai 2 - Wunta Mempori

^1a a oleo korua pulu ka opaa i larono wula ko'onoo.

Marambano raha-Do i Ue anu wo'ohu 2:1b-10

^1b A nta'u ko'orua poparentaano mokole Dariusu,

² i larono wula ko'opitu, tanggala rua pulu ka asa wula atuu, haweomo pau-Do i Ue telalo ndi nabi Hagai, kanandio,

³ ”Pauakonomo i Serubabeli anano i Sealitieli, petewawa wita Yehuda, ka ndi Yosua anano i Yosadaki, sando mpesomba langkai, ka a anu ntebinta inso a tongku atuu, kanandio:

⁴ Isemake i olomiu anu kumitao raha andio a laro marambano anu amba-ambano? Kana'umpeke imengkitao teweweuno kanandio-andio? Kombake anu andio kana nahina hapa-hapano a pongkitamiu?

⁵ Kanandio-andio, pokorosoomo aroamu, hei Serubabeli, kanandiomo pau-Do i Ue; Pokorosoomo aroamu, hei Yosua anano i Yosadaki, sando mpesomba langkai, impokorosoomo aroamiu, hei luwuno palili, kanandiomo pau-Do i Ue. Impo'anggamo, hangano Ongkue kumongkomi komiu, kanandiomo pau-Do Ueno luwuakoano.

⁶ Onaemo atuu dandi anu Kupokohinaomo saru omiu tempono impeluarako inso i Masiri. Penaa-Ku ta kongko mo'ia i tonga-tongamiu. Siimo imedoito.

⁷ Hangano kanandiomo pau-Do Ueno luwuakoano: Nami ta tehine mbo'u Aku lumeluo langi ka tolino, tahi ka wita.

⁸ Aku lumeluo luwuno tongku, ranta luwuno sangka masuli olino anudo luwuno tongku atuu ta hawe. Aku buketiakono marambaa raha andio, pau-Do Ueno luwuakoano.

⁹ Ongkuemo me'ueo salaka, ka Ongkuemo me'ueo wulaa, kanandiomo pau-Do Ueno luwuakoano.

¹⁰ Marambano raha anu kanandio-andio ta lumaloio marambano anu amba-ambano, pau-Do Ueno luwuakoano. A mpo'ianga andio Aku moweeakono rodoa, kanandiomo pau-Do Ueno luwuakoano.”

Pesikeno mongkona memporia ka mokoburua 2:11-15

¹¹ A ntanggala rua pulu ka opaa wula ko'osio, ta'u anu ko'orua poparentaano i Dariusu, haweomo pau-Do i Ue ndi nabi Hagai, kanandio,

¹² ”Kanandiomo pau-Do Ueno luwuakoano atuu: Pesikenoakonomo a luwuno sando mpesomba pompaguru andio:

¹³ Tewala asa mia mowawa bau anu mempori a laro ntapu sangkano, ka i'amba saru tapuno sangkano atuu idanggiakono roti ke anu ninahu, anggoro, lana ke hapamo koa anu moiko ikinaa, nde ta gagi mempori atuu?” Luwuno sando mesomba atuu mesangki, dompotae, ”Naahi!”

¹⁴ Motae i Hagai, ”Tewala asa mia anu gagi mokoburu hangano modanggi wata ngkoroi, modanggi luwuno andio, nde atuu ta gagi mokoburu?” Mesangki ira luwuno nabi, dompotae, ”Manasa!”

¹⁵ Ka i'amba mepauomo i Hagai, ipotae, ”Kanatuumo bawaa andio ka tongku andio i aro-Ku, kanandiomo pau-Do i Ue. Kanatuu koa mbo'u anu wineweuno kaedo ka anu pinesombaakodo, gagiomo mokoburu.”

Powangua raha-Do i Ue mowawa ronso 2:16-20

¹⁶ ”Kanandio-andio, pekokoongakonomo mompu'u oleo andio ka koramaino: se'eluno napi domempinotuda watu a raha-Do i Ue,

¹⁷ kana'umpe teweweumiu? Tempono dome'aiwa mia ira mpohawe howuno gandu rua pulu ponsa'u hadiono, butu hinao hopulu. Tempono dome'aiwa mia a mpoporo'ia anggoro ira mpontambu lima pulu ponsa'u, butu hinao rua pulu.

¹⁸ Kusumapoiakomiumo ponsolangi pinopaho, ka haki mpinopaho, saru luwuno anu inanggano kaemu kusapoiakono usa watu. Sine, omiu nahi mpepokule ndi Ongkue, kanandiomo pua-Do i Ue.

¹⁹ Pekokoongakonomo mompu'u oleo andio ka koramaino, mompu'u oleo korua pulu ka opaa wula ko osio. Mompu'u inso a oleo iwineweu pondasino raha-Do i Ue pekokoongakonomo

²⁰ Nde dahinaokoake inii a laro nsi'e, ka keu anggoro, keu ara, keu delima, keu saitu, napi pewua? Mompu'u oleo andio Aku mompowee ronso!”

Dandi ndi Serubabeli 2:21-24

²¹ Haweomo pau-Do i Ue anu kompenduano ndi Hagai a ntanggala rua pulu ka opaa wulaa atuu, kanandio,

²² ”Pauakonomo i Serubabeli, petewawa i wita Yehuda, kanandio: Aku lumeluo langi ka tolino

²³ ka wowangunsuleo kadera poparentaano luwuno mokole. Aku rumopuo rosono poparentaano luwuno tongku ka wowangunsuleo kareta ka anu me'ulaio; ngara ka anu mesawikio ta tebangku, singge mia hangano ponaino walino.

²⁴ A oleo atuu, kanandiomo pau-Do Ueno luwuakoano, Aku umalako, hei Serubabeli, anano i Sealitieli, tetenaa-Ku, kanandiomo pau-Do i Ue. Aku mokogagiko kana sinsi pontondoni, hangano omuemo anu bininiki-Ku, kanandiomo pau-Do Ueno luwuakoano.”