Hagai 1 - Wunta Mempori

Pepoboi wali wanguo raha-Do i Ue 1:1–2:1a

¹ A nta'u ko'orua poparentaano mokole Dariusu, a wula ko'onoo, a oleo amba-ambano wula atuu, haweomo pau-Do i Ue telalo ndi nabi Hagai hawe ndi Serubabeli anano i Sealitieli, petewawa i wita Yehuda, ka ndi Yosua anano i Yosadaki, sando mpesomba langkai, kanandio,

² ”Kanandiomo pau-Do Ueno luwuakoano, tongku andio mpotae: Kanandio-andio napi hawe tempono wali mewanguo raha-Do i Ue!”

³ Ka i'amba haweomo pau-Do i Ue telalo ndi nabi Hagai, kanandio,

⁴ ”Nde haweakoomo tempono ka impo'iangario luwuno rahamiu anu me'apiiako dopi, sekono raha-Do andio da kana howuno anu terawo?

⁵ Kanandio-andio, kanandiomo pau-Do Ueno luwuakoano: Impekokoongakonomo pelempano tumuwumiu!

⁶ Komiu mporawo hadio inii, sine hasilino tedei; komiu mpongkaa, sine nahi memowohi; komiu mpo'inu, sine nahi nte'osa; komiu mpesangka, sine koroimiu nahi pompemokula. Mia anu mo'angga ka itinambo, mohawe tambo a laro ngkadu-kadu anu mebolo!

⁷ Kanandiomo pau-Do Ueno luwuakoano: Impekokoongakonomo sala ntumuwumiu!

⁸ Impewuatakomo a ntorukuno, wawaomo keu ka imewanguomo raha-Do atuu. Aku koa memoikoo ka pinokomaramba, pau-Do i Ue.

⁹ Komiu mpomperorohi hadio, sine kitao hasilino tedei. Tempono imewawao mpekule, Kupuurio ka itampula. Hapa pu'uno? Kanandiomo pau-Do Ueno luwuakoano. Hangano raha-Ku anu da kana howuno anu terawo, sekono omiu singge mia marepaako rahano onaeno.

¹⁰ Onaemo pu'uno langi umontoo tontoruno ka tolino umontoo hasilino.

¹¹ Kupoboio motu'i-tu'ia ka ihawe a wawo wita, a luwuno torukuno, a gandu, a anggoro, a lana, a luwuno hasilino wita, a mia ka a mpinotuwu saru a luwuno pe'i'iseino kaemu.”

¹² Ka i'amba i Serubabeli anano i Sealitieli ka i Yosua anano i Yosadaki, sando mpesomba langkai, ka anu tebinta inso a tongku atuu mperorongeakono pepau-Do i Ue, Ue Alado, ka pauno nabi Hagai, kana peparenta-Do i Ue, Ue Alado ndi onae. Ka tongku atuu medoito ndi Ondae i Ue.

¹³ Mepauomo i Hagai, tinena-Do i Ue a tongku atuu montonda pe'oliwi-Do i Ue, kanandio, ”Kukongkomi komiu, kanandiomo pau-Do i Ue.”

¹⁴ Ka Do'amba i Ue wanguakono sumangano i Serubabeli anano i Sealitieli, petewawa i wita Yehuda, ka sumangano i Yosua anano i Yosadaki, sando mpesomba langkai, saru sumangado anu da ntebinta atuu. Ka do'amba me'aiwa ka me'anggao powangua raha-Do Ueno luwuakoano, Ue Alado,