Habaku 3 - Wunta Mempori

Pekakaino nabi Habaku 3:1-19

¹ Pekakaino nabi Habaku montonda unino ponsabangi.

² Kurongeomo telele-Miu Ue, ka inangga-Miu, oo Ue, ku'unde-undeo! Ipotuwuomo atuu i tempo andio, Ipokomengkaaomo i tempo andio; a laro ntekuda Irambeomo pompehohawa!

³ Ondae Ue Ala aiwa inso i wita Temani, Anu Tedoa Mempori inso a mentorukuno Parani. Sela Langkaino pabawa-Do buketio langi, ka tolino bukeako po'unde-unde ndi Ondae.

⁴ Hinao tesangkilo kana wanta, pansario wanta inso a ngkae-Do ka i tu'aimo itewuni roso-Do.

⁵ I aro-Do melempa haki lele ka haki lele tumondao hanga-Do.

⁶ Ondae mentade ka mebomba tolino; Ondae mengkita ka luwuno tongku Doweweuo mpondidi-ndidi, terawo-rawoomo luwuno torukuno anu kongko mompu'u tempo se'eluno, ka luwuno pongku wita anu etu-etuno ta'u gagi merete. Onaemo telaloa-Do etu-etuno ta'u.

⁷ Kukitao luwuno kemado to Kusiani medinado, ka luwuno tenda i wita Midia mpondidi-ndidi.

⁸ A luwuno koronoke, oo Ue, a luwuno koronoke tekuda-Miu tensila? A ntahike tekuda-Miu tempono ipesawikio ngara-Miu ka kareta ponangia-Miu?

⁹ Pana-Miu I'ungkahiomo, I'ihiiakonomo ana mpana. Meluarakoomo luwuno korono inso i tolino anu binansi-Miu.

¹⁰ Kumita Komiu, luwuno torukuno mpondidi-ndidi, uwoi mowo u'uru telalo, uwoi a ondaloano moporongeo unino ka tumandeo kaeno.

¹¹ Mata oleo, wula menaa-naa a mpo'iangano, tempono wantano ana mpana-Miu mompalari, ka tesangkilono kansai-Miu mengkoliki.

¹² A laro ntekuda, Omiu lumolandao tolino, a laro ntekuda, Omiu sumesao luwuno tongku.

¹³ Omiu lumako kumadudui ira bawaa-Miu, kumaduduio anu inurapi-Miu. Omiu mokoropuo petewawado anu nahi dompotonda parenta-Miu lumolohio anu i totono hawe a we'uno.

¹⁴ Omiu dumuhuakono ana mpanano onaeno petewawa sorodaduno, anu aiwa kana lompiu ta sumiarawoakune saru po'unde, kana-kana tewuni dompotele mia tepokonsii.

¹⁵ Saru ngara-Miu, Omiu lumolandao tahi, howuno uwoi anu mebomba.

¹⁶ Tempono kurongeo, mondendeomo aroaku, rumongeo unino, bibiomo wiwiku; pompemekiki mewinso a laro wukuku, ka pelempano karuku mondidi-ndidi. Ka kupomperodo sumikorio oleo masusaa, anu ta umaluo tongku anu sumapoi kami.

¹⁷ Maupo keu ara nahi pensisi, keu anggoro nahi pewua, ka hasilino keu saitu mompokomasusa aroa, maupo luwuno lere nahi pehasiliako kaanga, bawaa bembe bimba tesaari inso a mpo'ukoa, ka nahina sapi a laro wala,

¹⁸ sine aku mo'unde ndi Ondae i Ue, mebooli mo'unde ndi Ondae Ue Ala anu kumadudui aku.

¹⁹ Ondae Ue Ala Ueku atuu rosoku. Ondae weweuo karuku kana karuno rusa, Ondae weweu aku mokompelempa a mpo'ianga mantande. Tiano petewawa mpenani. Saru pemaeno katapi.