Habaku 2 - Wunta Mempori

Mia anu mentee ta tuwu hangano pompe'ala-ala 2:1-5

¹ Aku mentade a mpodagaia ka mekorahako a menara; Aku sumikorio ka kukitao hapa anu Ira pauo ndi ongkue, ka hapa sangki-Do a mpo'emaku.

² Ka Do'amba i Ue sumangki aku, pau-Do, ”Buriomo pongkita andio ka nggoriomo atuu a lempe-lempeno watu, ka dompokobasao mia ntelalo.

³ Hangano pongkita atuu da monsikori tempono, sine ta ronga te'aro a mpoko'ariano, ka komba pompopo'oo. Maupo nahi ronga hawe, sikoriomo, hangano mongkona atuu manasa ta hawe ka nahi ta tepotulu.

⁴ Menteeano, mia anu mompelang-langkai nahi moleo aroano, sine mia anu mentee ta tuwu hangano pompe'ala-ala.

⁵ Mentee ntu'u pompoli atuu mompopo'oo; mia anu mopelangka-langkai nahi ta momperodo. Onae wileo ngangano kana po'iangado mia mate nahi hori mowohi kana matea. Luwuno tongku ipumpuo ka luwuno tongku ipo'asao.”

Pohuku a mia mompokonsii 2:6-20

⁶ Kombake ondae luwu ira mpopau potundaano pau ndi onae saru penani pasinggiri andio: Masolaomo ntu'u mia anu mohowu tiano koroino hapa anu komba pine'ueno! Hawe te'ipia mbo'uke upopumpu arataa? Kanatuu koa mbo'u mia anu humowuiakono koroino sangka ginade.

⁷ Kombake nahi kinookoo ira mehawe puu mposinga pasuamu, ka ira ntelike anu mpodengkeko, ka omue domerontuko?

⁸ Hadioomo tongku pinomurumu, ranta luwuno tongku anu toreano ira mempomuruko hangano reano mia anu te'uwu atuu ka pobobarasaia a wita, kota saru luwuno palilino.

⁹ Masola ntu'u mia mo'ala ura anu nahi moleo pesalaano ta pakeano i rahano, ta numaao senono a mpo'ianga anu mantande, ka itola inso a masolaa!

¹⁰ Omue mosongkaakonomo tataano rahamu tempono upingko ira tongku ka hangano kanandio sumolangio koroimu omuemu.

¹¹ Hangano watu mebooli inso a rere, ka sobo sumangkio inso a rangkano raha.

¹² Masola ntu'u mia anu mowangu kota a wawo rea ka mokorosoakono wineweu nahi moleo.

¹³ Menteeano, kombake inso ndi Ondae Ueno luwuakoano nine luwuno tongku mpe'o'osu ntu'u tiano api ka luwuno tongku mpe'iseiako anu nahina pengkonaano?

¹⁴ Hangano tolino ta bukeako ponto'ori mongkona maramba-Do i Ue, kana uwoi tumutuwio tahi molue.

¹⁵ Masola ntu'u mia anu moweeakono pe'asa miano mo'inu sinaloako tekuda, tendeano mokomolangu ira ka ipokokitao pomaliano.

¹⁶ Omue komowohiako pongkoko'iia, komba marambaa. Omue po'inumo mbo'u ranta ka upobangku-bangku. Ndi omuemo ta melimba piala inso a ngkae koana-Do i Ue, ka pongkoko'ii ta tumutuwio marambamu.

¹⁷ Pobobarasaia i Libano ta umaluko ka mateno luwuno kondehora ta mokompondendeko, hangano reano mia anu te'uwu atuu ka hangano pobobarasaia a wita, kota ka luwuno palilino atuu.

¹⁸ Hapa tuduno tinaha pesomba pina'o, pina'ono anu weweuo? Hapa tuduno tinaha pesomba tinawa, anu mompaguru pegaupi atuu? Hangano anu weweuo me'ala-alao wineweuno, ka hinaano luwuno lahumoa wineweuno atuu beebe nahi dompepau.

¹⁹ Masola ntu'u mia anu mepau a ngkeu asa mpole, ”Pelikemo!” ka a asa watu beebe nahi pepau, ”Pewangumo!” Kana'umpe ka ipokompopaguru? Lano onae mewaluako wulaa ka salaka, sine nahina ntu'u penaa i larono.

²⁰ Sine Ondae i Ue kongko Ira i laro raha-Do anu mempori. Imerodomo mpo'ia i aro-Do, oo luwuno tolino!