GALATIA 5 - Wunta Mempori

Maradekaado to Kerisituu 5:1-15

¹ Ka imentee koa ntu'u ontae maradeka, Dopokomaradeka kitamo i Kerisituu. Onaemo pu'uno impentademo temoroso ka si mebehe mbo'u imempinokonaako pasanga te'ataa.

² Menteeano, ongkue, i Paulu, mepau ndi omiu: tewala mpetindi komiu, Ondae i Kerisituu nahi ta hina ntu'u tudu-Do ndi omiu.

³ Pohonapo mbo'u kupauakono sompo mia anu metindi, nine asalakono ka iweweuo luwu songka Taura.

⁴ Omiu mentola inso ndi Ondae i Kerisituu, tewala mpomperorohi komiu menteea hangano songka Taura; mentuwu komiu i bungkuno pompehohawa.

⁵ Nde hangano Penaa, ka hangano pompe'ala-ala, tomensikorio menteea anu pinerorohito.

⁶ Hangano mia anu mekongko a ntepo'asaa ndi Ondae i Kerisituu Yesu mongkona petindi ke nahi petindi nahina pengkonaano, butu pompe'ala-ala anu mo'angga hangano pompehohawa.

⁷ I ndi'upua momoiko impetaki. Isemake tumombolei komiu, ranta nami mentondao mbo'u menteea?

⁸ Po'oluako ka si mentondao mbo'u komba inso ndi Ondae, anu moboi komiu.

⁹ Ragi tedei sumoopio luwuno anu sinaloako.

¹⁰ Ndi Ondae i Ue kupe'ala-ala komiu, nine nahina pinewowolomiu susua sekono pinewowolo andio. Sine ba isema anu sumosaelo komiu, onae ta tumembio hukuno, maupo isema onae.

¹¹ Ka ongkue mbo'u andio, pepaekompo, tewala da kupaleleo petindi, tembioke ka kudabinobarasai mbo'u? Hangano tewala kanandio, keu pinotamba komba watu tetidua mbo'u.

¹² Moikoomo ondae anu mensosaelo komiu atuu ka domensinu'uluimo koa!

¹³ Pepaekompo, lano mempinoboi komiumo ka imaradeka. Sine si mempakeo maradekaa andio gagi pompe'umalu ka imentuwu a laro hala, tendeano imemambepekakaako hangano pompehohawa.

¹⁴ Hangano luwuno songka Taura tewinsoomo a laro aasa pau andio, onaemo, ”Pehohawaomo pe'asa miamu kana koroimu!”

¹⁵ Sine tewala memambe kiki komiu ka memambe tele, petangkoromo, ka si memambe pepate.

Tuwu montonda koroi ntolino ke Penaa 5:16-26

¹⁶ Tinooku onaemo: imentuwumo hangano Penaa, ka nahi komiu mentondao po'eheno koroi ntolino.

¹⁷ Hangano po'eheno koroi ntolino umewaio po'eheno Penaa ka po'eheno Penaa umewaio po'eheno koroi ntolino – hangano oruano mambe'ewa – ranta nahina tempo komiu meweweuo hapa anu inehemiu.

¹⁸ Sine tewala mebehe komiu Dotaate komiu Penaa, asalakono nahi komiu mentuwu a mpabawano songka Taura.

¹⁹ Poweweuno koroi ntolino mengkaaomo, onaemo: pebelesua, moweweu mokoburu, po'eheno aroa,

²⁰ mpesomba a lahumoa, sihiri, pe'u'uaa, teposisalaa, kohili, tekuda, mompewowolo koroino onaeno, mambebelai, penaa momposisala,

²¹ kohili, memolangu, mpogawe saru mpoweweu anu nahi mentee ka anu susuano. A luwuno atuu kupauakomiu – kana anu kuweweuomo i ndi'upua – nine ba isema weweuo luwuno anu kanatuu, nahi ta mohawe tia a laro Poparentaa-Do Ue Ala.

²² Sine wuano Penaa onaemo: pompehohawa, mawongko, rodoa, sabaraa, pe'aroaa, moikoa, petenunua,

²³ maurua, pabawaio koroi. Nahina songka anu umewaio mongkona luwuno atuu.

²⁴ Ba isema gagi mia-Do i Kerisituu Yesu, ipasoomo tuwu ntolino saru luwuno po'eheno aroano ka mosisirino a ngkeu pinotamba.

²⁵ Tewala mentuwu kita hangano Penaa, moikoomo tuwuto mbo'u Dotaateo Penaa,

²⁶ ka si tompo'ungke pompelangkai, si tomemambe ewa ka memambe kohili.