GALATIA 4 - Wunta Mempori

Nahina mbo'u te'ataa 4:1-11

¹ Anu tinoo onaemo: tempono asa mia anu me'umbuo pusaka napi sompo tinuwuno, maupo tedei nahina teposisinggeno saru aasa ata, maupo onae umbuno luwuakoano;

² sine onae mo'ia i totono anu mekariao ka dinagai hawe a tempo anu ipakosiomo amano.

³ Kanatuu koa mbo'u ontae: tempono napi sompo tinuwuto, mpetuundu kita koa mbo'u a hadio rupa po'eheno wawontolino.

⁴ Sine mansano sompoomo tempono, onaemo ka Dotenao Ue Ala ana-Do, anu pine'anaakono asa beine ka metuundu a songka Taura.

⁵ Ondae tinena ka Dotolosi ira, anu mpetuundu a songka Taura, ka tomentinarima gagi ana.

⁶ Ka hangano omiu ana, onaemo ka Dotena Ira Ue Ala Penaa-Do ana-Do i laro aroato, anu mebooli, ”Oo Abba, oo Ama!”

⁷ Gagi omiu komba ata mbo'u, tendeano ana; tewala ana komiu, saru koa omiu mbo'u umbuno pusaka, hangano Ondae Ue Ala.

⁸ I ndi'upua, tempono nahi imento'ori Ira Ue Ala, impe'atao koroimiu a luwuno pinesombai anu menteeano komba Ondae Ue Ala.

⁹ Sine kanandio-andio umarimiu mento'ori Ira Ue Ala, ke moikoopo, umari-Do tumo'ori komiu Ue Ala, kana'umpeke ka komiu mpepokule mbo'u a mperupa-rupa pabawano wawontolino anu molema ka mongkokolaro ka mpompu'u mpe'atao mbo'u koroimiu ndi onae?

¹⁰ Omiu pompesu'ui mpelangkaio luwuno oleo anu pinakosi, luwuno wula, tempo ka ta'u anu wela pinelangkai.

¹¹ Salalaro aku ba mansa nahina tuduno kupe'i'iseiakomiu.

Impewowoloomo penggoeato amba-ambano 4:12-20

¹² Ku'emao ndi omiu, pepaekompo, imegagimo kana ongkue, hangano ongkue mbo'u gagi akumo kana omiu. Napi kuhori mompembasai hapa anu nahi moiko inso ndi omiu.

¹³ Imento'orio, nine amba-ambano kupaleleo Lele Mawongkoa ndi omiu hangano mahaki aku.

¹⁴ Maupo kanandio teweweuno koroiku atuu, anu gagi po'ara-arahako ndi omiu, komba imengkodei aroaakono ka memokoburuakono, sine imentotowo akumo, mengkena kana montotowo asa mala'eka-Do Ue Ala, tendeano mengkena kana tumotowo Ira i Kerisituu Yesu.

¹⁵ Tedoa komiu meme'ura i tempo atuu! Ka kanandio-andio, isuaomoke me'uramiu atuu? Hangano ongkue mokompesakosii mongkona omiu, nine bakana igagi, imegogoiomo matamiu ka imeweeakune.

¹⁶ Nde ba mompau menteea ndi omiu gagi akumo iwalimiuke?

¹⁷ Memokua ira mpeteahako ka dompoko'ala komiu, sine komba a moleono aroado, hangano ira mponsua komiu inso ndi ongkue, ka imemokua koa tumonda ira.

¹⁸ Lano moiko ba imokua mia meteahako mompete'umala mia susua a moikoa, poolo a sompo tempo ka komba butu ba kukongko i olomiu.

¹⁹ Hei anaku, hangano omiu ka kupe'i'isei kana mahaki me'ana mbo'u, hawe rupa-Do i Kerisituu gagi mengkaa i laromiu.

²⁰ Tedoa aku tekewoi ka kukongko i olomiu i tempo andio ka mokompepauako suara anu susua, hangano nami kuto'orio ba kana'umpe umaropi komiu.

I Hagari ka i Sara 4:21-31

²¹ Pauakunemo, hei omiu anu ineheno tuwu i totono songka Taura, nahi merongeoke songka Taura?

²² Komba hinaoke teburi, nine i Burahima hinao anano orua, asa mia inso a beine anu gagi atano ka asa mia inso a beine anu maradeka?

²³ Sine ana inso a beine anu gagi atano atuu pine'anaako montonda koroi ntolino ka ana inso a beine anu maradeka atuu hangano dandi.

²⁴ Andio onaemo aasa potundaano. Hangano beine orua ira atuu onaemo orua pompakosi-Do Ue Ala: anu aasa mepu'u inso i torukuno Sinai ka me'anaako ira ana nte'ataa, onaemo i Hagari –

²⁵ I Hagari onaemo torukuno Sinai i witado to Ara – ka onae mengkena saru Yerusale anu kanandio-andio, hangano onae tuwu a laro nte'ataa saru luwuno anano.

²⁶ Sine Yerusale nsuruga onaemo beine anu maradeka, ka onaemo ineto.

²⁷ Hangano hinao teburi, ”Po'undemo, hei anu biita anu nahi hori me'ana! Temawongko ka peboo-boolimo po'unde, hei omue anu nahi hori memarasaio mahaki me'ana! Hangano anu binintano tamano ta laluaopo hadio anano sekono anu metama.”

²⁸ Ka omiu, pepaekompo, mpengkena komiu kana i Saki onaemo ana dinandi.

²⁹ Sine kana i ndi'upua, onae, anu pine'anaako montonda koroi ntolino, bobarasaio anu pine'anaako montonda Penaa, kanatuu koa mbo'u kanandio-andio.

³⁰ Sine hapa pinauno Wunta Mempori? ”Saariomo ata beine atuu saru anano, hangano anano ata beine atuu nahi ta gagi me'umbuo pusaka meronga saru anano beine maradeka atuu.”

³¹ Onaemo pu'uno, pepaekompo, ontae komba anano ata beine, tendeano anano beine maradeka.