GALATIA 3 - Wunta Mempori

Pinokomentee hangano pompe'ala-ala 3:1-14

¹ Hei to Galatia anu mebenge-benge, isemake anu mokobulalingo komiu? Kombake Ondae i Yesu Kerisituu anu pinaso a ngkeu pinotamba atuu mempinauako komiumo a menteeano i aromiu?

² Butu onae andio anu mingki aku tumo'orio inso ndi omiu: Ke mpotarima komiumo Penaa hangano meweweuo songka Taura ke hangano pompe'ala-ala a pompalelea Lele Mawongkoa?

³ Kanatuumoke benge-bengemiu? Imempu'uakonomo Penaa, mebehe koimuke kanandio-andio mpokotampulao a ngkoroi ntolino?

⁴ Nahina tudunoke luwuno pinembasaimiu anu hadio atuu? Potaeku komba nahina tuduno!

⁵ Gaagi kanandio-andio kana'umpe, Ondaeke anu mowee komiu Penaa hadio ntu'u ka anu moweweu kinohali-haliako i olomiu, Doweweu kanandio hangano imeweweuo songka Taura ke hangano pompe'ala-ala a pompalelea Lele Mawongkoa?

⁶ Kanatuu koa mbo'u i Burahima ipe'ala-ala Ira Ue Ala, onaemo ka Dopototoiakono Ue Ala mongkona atuu gagi menteea.

⁷ Gaagi imengkitao, nine ondae anu mentuwu inso a pompe'ala-ala, ondaemo atuu anano i Burahima.

⁸ Ka Wunta Mempori, anu se'eluno tumo'orio, nine Ondae Ue Ala mokomentee ira mia komba to Yahudi hangano pompe'ala-ala, tese'eluomo paleleo Lele Mawongkoa ndi Burahima, ”Hangano omue luwuno tongku ta rinonso.”

⁹ Gaagi ondae anu mentuwu inso a pompe'ala-ala, ondaemo anu merinonso meronga saru i Burahima anu mompe'ala-ala atuu.

¹⁰ Hangano luwuno mia, anu mentuwu inso a mpo'anggano songka Taura, mo'ia i totono totonaa. Hangano hinao teburi, ”Tetotonaaomo mia anu nahi petenunu weweuo luwuakoano anu teburi a laro wunta songka Taura.”

¹¹ Ka nine nahina mia anu pinokomentee i aro-Do Ue Ala hangano iweweuo songka Taura lano mengkaa, hangano, ”Mia anu mentee ta tuwu hangano pompe'ala-ala.”

¹² Sine empehino songka Taura komba pompe'ala-ala, tendeano isema anu weweuo, ta tuwu hangano onae.

¹³ Dotolosi kitamo i Kerisituu inso a ntotonaano songka Taura onaemo ka Dogagi tetotonaa hangano ontae, hangano hinao teburi, ”Tetotonaaomo mia anu ndinoe a ngkeu pinotamba!”

¹⁴ Doweweuomo i Kerisituu andio, ka ihawe a luwuno tongku susua ronsono i Burahima a ntepo'asaa saru Ondae, ranta hangano pompe'ala-ala mpontarima kita Penaa anu dinandiomo atuu.

Songka Taura ke dandi 3:15-29

¹⁵ Pepaekompo, moikoomo kupakeo aasa pandiri a ntumuwu sompo oleo. Aasa pe'oliwi anu pinokorosoomo, maupo onae inso a mia, nahina maupo te'asa mia mokobalio ke tumiangio.

¹⁶ Mongkona ndi Burahima pinau luwuno dandi atuu ka a inuleno. Nahi pinau ”a luwuno inuleno” kana tinoono hadio mia, sine butu asa mia, ”ka a inulemu”, onaemo i Kerisituu.

¹⁷ Tinooku onaemo: Dandi anu se'eluno Dopokorosoomo Ue Ala, nahi pokobalio Songka Taura, anu da iaopo isaba pato etu ka tolu pulu nta'u lembuino, onaemo ka itetadi rosono dandi atuu.

¹⁸ Hangano, tewala hapa anu pinakosi-Do Ue Ala mepu'u inso a songka Taura, komba mepu'u inso a dandi; sine tendeano hanganomo dandi ka Dopoweeakono i Burahima pompehohawa-Do.

¹⁹ Tewala kanandio, hapake tinoono songka Taura? Onae tiniangiako hangano hadio polimpaia songka – ranta ka ihawe inule anu tinoono dandi atuu – ka onae dompeweengakono mala'eka a ngkaeno asa mia.

²⁰ Asa mia i olono komba butu sumaru ngkoroio asa mia koa, sine Ondae Ue Ala asa-asa-Do.

²¹ Tewala kanandio, nde i'ewaio songka Taura tokoa luwuno dandi-Do Ue ala? Mentee ntu'u naahi. Hangano ande-andeno songka Taura wineeako gagi aasa anu mompokotuwu, ka menteea lano mepu'u inso a songka Taura.

²² Sine luwuakoano i'ukoomo Wunta Mempori a ntoto pabawano hala, ka hangano pompe'ala-ala ndi Ondae i Yesu Kerisituu dandi atuu mewineeako ira anu pompe'ala-ala.

²³ Se'eluno napi hawe pompe'ala-ala atuu mpo'ia kita a mpabawano songka Taura, ka me'inuko ranta ka ipinokomengkaa pompe'ala-ala atuu.

²⁴ Gaagi songka Taura onaemo taateto ranta ka Dohawe i Kerisituu, ka tomempinokomentee hangano pompe'ala-ala.

²⁵ Kanandio-andio pompe'ala-ala atuu haweomo, onaemo pu'uno nami tomekongko mbo'u a mpabawano pontaate.

²⁶ Nde luwumiu onaemo ana-Do Ue Ala hangano pompe'ala-ala ndi Ondae i Yesu Kerisituu.

²⁷ Hangano luwumiu, anu mebinaho ndi Ondae i Kerisituu, imempokona Iramo i Kerisituu.

²⁸ Mongkona anu andio nahina to Yahudi ke to Yunani, nahina ata ke mia maradeka, nahina tama ke beine, hangano luwumiu aasa koa ndi Ondae i Kerisituu Yesu.

²⁹ Ka tewala omiu mia-Do i Kerisituu, asalakono omiu mbo'u inuleno i Burahima ka tekona imentarimao dandi-Do Ue Ala.