GALATIA 1 - Wunta Mempori

Tabea 1:1-5

¹ Inso ndi Paulu, asa mia tinena, komba hangano mia, komba mbo'u hangano asa mia, tendeano hangano Ondae i Yesu Kerisituu ka Ondae Ue Ala, Ama, anu wangu Iramo inso i olodo mia mate,

² ka inso a luwuno pepaekompo anu mekongko mperonga saru ongkue, a luwuno bawaa i Galatia:

³ pompehohawa kumongkomi komiu ka rodoa inso ndi Ondae Ue ala, Amato ka inso ndi Ondae Ue Yesu Kerisituu,

⁴ anu meweengakonomo koroi-Do hangano luwuno halato, motola kita inso a mosa'ono wawontolino anu kanandio-andio, montonda po'ehe-Do Ue Ala ka Amato.

⁵ Ndi Ondaemo marambaa nahina tampulaano! Ami.

Butu aasa Lele Mawongkoa 1:6-10

⁶ Kukohali-haliakono, nine magasi lahi impepokule inso ndi Ondae, anu moboi komiumo hangano pompehohawa-Do i Kerisituu, ka impotonda lele mawongkoa susua,

⁷ anu menteeano komba Lele Mawongkoa. Butu hinao mia anu mopo'oo komiu ka anu tinoodo mewowalitekio Lele Mawongkoa mongkona Ondae i Kerisituu.

⁸ Sine maupo omami ke asa mala'eka inso i suruga anu paleleo ndi omiu asa Lele Mawongkoa anu teposisingge saru Lele Mawongkoa anu kimempaleleomo ndi omiu, onae tetotonaaomo.

⁹ Kana anu kimempauomo i ndi'upua, kanandio-andio kupauo mbo'u tepohonapo: tewala hinao mia anu mompalele aasa lele mawongkoa ndi omiu, anu teposisingge saru hapa anu imentarimaomo, onae tetotonaaomo.

¹⁰ Gaagi kana'umpe kanandio-andio: ku'ungkeoke anu inehedo mia ke anu inehe-Do Ue Ala? Mo'arahako akuke ka dome'ineheakune mia? Tewala da mo'arahako aku ka dome'ineheakune mia, ongkue komba tetenaa-Do i Kerisituu.

Kana'umpe i Paulu ka igagi tinena 1:11-24

¹¹ Hangano kupokomanasao ndi omiu, pepaekompoku, nine Lele Mawongkoa anu pinaleleku atuu komba Lele Mawongkoa mongkona mia.

¹² Hangano komba kutarimao inso a mia, ka komba mia anu paguruakune, sine kutarimao a pepokomengkaa-Do i Yesu Kerisituu.

¹³ Hangano imerongeomo mongkona tuwuku i ndi'upua a laro agama Yahudi: nahina tidahino kubobarasai ira bawaa-Do Ue Ala ka umungkeakono mepate ira.

¹⁴ Ka a laro agama Yahudi hadio polaluaku inso a hadio wali-wali anu pe'asa ntinuwuku i olodo tongkuku, gagi asa mia anu mokua ntu'u tumondao gaudo uempu'uku.

¹⁵ Sine tempono Ondae, anu biniki akumo mompu'u inso a mpe'anakaado ineku ka moboi aku hangano pompehohawa-Do,

¹⁶ memoikoo mokomengkaa Ira ana-Do i laroku, ka kupalele Ira i olodo luwuno tongku komba Yahudi, ka maupo tepohona nahi kupo'ema pontimbangado mia;

¹⁷ i Yerusale mbo'u nahi kulako tepohaweako ira anu mense'elu iramo megagi tinena, sine melungka aku lumako i witado to Ara ka inso i tu'ai mekule mbo'u i Damasi.

¹⁸ Ka i'amba, otolu nta'u lembuino, lumako aku i Yerusale tepohaweakono i Kepa, ka merato aku i rahano hopulu ka olima oleo.

¹⁹ Sine nahina kinitaku maupo te'asa mia inso a luwuno tinena anu susua, sangkadio i Yakobu, pepaekompo-Do Ue Yesu.

²⁰ I aro-Do Ue Ala kupokomanasao: hapa anu kuburiakomiu andio mentee, nahi kupegaupi.

²¹ Ka ku'amba lumako a luwuno witado to Siria ka Kilikia.

²² Sine rupaku kongkono nahi domento'orio luwuno bawaa-Do i Kerisituu i Yudea.

²³ Butu domerongeo, nine onae anu bobarasai ira i ndi'upua, kanandio-andio paleleo pompe'ala-ala, anu horio ta mingki mepateo.

²⁴ Ka dome'unde-unde Ira Ue Ala hangano ongkue.