Esetere 8 - Wunta Mempori

Parentado mokole anu mokome'ura ira to Yahudi 8:1-17

¹ A oleo koa mbo'u atuu i mokole Ahasiwero meweengakono arataano i Hamani, iwalido to Yahudi, ndi mokole beine, Esetere, ka i Modekai mewinso me'aro ndi ondae mokole, hangano umariomo i Esetere pauako ira mokole hapa penggoeano i Modekai ka onae.

² Onae ka dolohuo mokole sinsi pontondoni anu inala inso ndi Hamani, ka dopeweengakono ndi Modekai. Ka i Modekai ipotoroo i Esetere gagi pabawaio arataano i Hamani.

³ Ka i'amba i Esetere mepau mbo'u ndi ondae mokole kai pengolontu a ngkarudo ka ipengese mo'ema pompehohawa ka dobalio tinoo mosa'ono i Hamani, to Agagi atuu saru sinongkano anu umariomo iweweuo a nto Yahudi.

⁴ Onae ka dotasiakono mokole tuko wulaado ndi Esetere, ka i'amba mewanguako i Esetere mentade i arodo mokole,

⁵ saru mesomba ka ipepau, ”Tewala ipemoikoo ka tewala ipehohawao tetenaamiu ka mongkona andio ipementeeo ka omiu mokole ipekonoo tetenaamiu, ipoluarakomo wunta parenta mokole kai wali pinokule luwuno wunta anu me'ihi sinongkano i Hamani anano i Hamedata, to Agagi atuu, anu binurino ta mepate ira to Yahudi i larono luwuno wita poparentaa.

⁶ Hangano kana'umpe tetenaamiu andio ta polio kumitao masukaraa anu umalu ira tongkuku ka kana'umpe tetenaamiu ta polio kumita ira pe'etuku memate?”

⁷ Sumangki ira mokole Ahasiwero ndi Esetere, mokole beine saru ndi Modekai, to Yahudi atuu, ”Arataano i Hamani kupeweengakonomo ndi Esetere, ka i Hamani sinonsoomo a ngkeu pinontade, hangano ipo'ioomo kaeno a nto Yahudi.

⁸ Buriomo a needo mokole hapa anu pinemoikomiu mongkona to Yahudi ka wunta atuu meteraiakono sinsi pontondonido mokole, hangano wunta anu binuri a needo mokole ka mineteraiako sinsi pontondonido mokole, nahi ta pinokobali.”

⁹ Ia tempo koa atuu, pinoboi iramo luwuno puu mpoburido mokole, i larono wula ko'otolu, onaemo wula Siwani a ntanggala ruapulu ka otolu, ka menunu saru luwuno anu iparentaako ira i Modekai, binuriomo wunta a nto Yahudi ka a luwuno sarungkoroido topoparenta, luwuno bupati ka a luwuno mia langkai potorono i wita, inso i India hawe i Etiopia, asa etu rua pulu ka opitu wita poparentaa, a sompo-sompo wita montonda binurido ka sompo-sompo tongku montonda paudo ka mbo'u a nto Yahudi montonda binuri ka paudo.

¹⁰ Binuriomo pe'oliwi a needo mokole Ahasiwero ka tinondoniako sinsi pontondonido mokole, ka i'amba mesala a mia mentinena anu magasi mpengara, anu mpopesawiki ngara poparentaa anu magasi, inoliwiomo luwuno wunta,

¹¹ anu ihino: Ondae mokole umehe ira to Yahudi i sompo-sompo kota ka dompepumpu ka mengkorahakono penaado saru rumopu ira ka mepateo luwuno sorodadu, maupo nana'ote, ka luwuno beine, inso a tongku ka wita anu ta sumapoi ira ka merontuo arataado,

¹² ia oleo anu mengkena a luwuno witado mokole Ahasiwero, a ntanggala hopulu ka otolu wula kohopulu ka orua, onaemo wula Adari.

¹³ Polimbano pe'oliwi binuri atuu, asalakono gagi atora a sompo-sompo wita, ka i'amba pinopoto'oriako luwuno tongku ka to Yahudi, asalakono mpepatinda a oleo atuu ka dompombalo a iwalido.

¹⁴ Memadara ka mpopari-pari iramo mia tinenado mokole atuu melako mpesawi a ngara poparentaa anu magasi, montonda petenado mokole ka atora atuu linuarako a bente Susani.

¹⁵ Ka i Modekai meluarako inso i arodo mokole mompokona sangka poparentaa inso a nsawu wungo ntu'u ka sawu lena saru mompokona ramba-ramba ulu inso a wulaa anu tekosi ntu'u saru lemba meloe inso a nsawu lena alusu ka sawu wungo-wungo. Onaemo ka dompeboo-booli ka mpo'unde i kota Susani.

¹⁶ To Yahudi mpohawe iramo tolaano aroa, mpo'unde ka memawongko mpohawe ira pompelangkai.

¹⁷ Kanatuu koa mbo'u sompo-sompo wita ka kota, ba isuamokoa parenta ka atorado mokole haweomo, hinao po'unde ka mawongkoa i olodo to Yahudi, ka pelimbua saru oleo mawongkoa. Ka mbo'u hadio inso i olodo palili i wita atuu mpewinso a nto Yahudi, hangano medoito iramo ndi ondae.