Esetere 6 - Wunta Mempori

Modekai pinelangkai 6:1-14

¹ Ia wongi mbo'u atuu ondae mokole nahi dopokompoturi. Onaemo ka dopetena mokole wawao wunta poburia tutulu, ka ibinasa i arodo mokole

² Ka i tu'ai hinawe aasa binuri mongkona i Modekai, anu horio mompau nine i Bigitani ka i Teresi, orua ira pegawaido mokole anu tewinso a bawaa puu mpodagai pewowa, dopontooakonomo ira mepateo mokole Ahasiwero.

³ Onaemo ka dopesikeno mokole, ”Pontudu ka pompelangkai hapake anu wineeako i Modekai, hangano wineweuno atuu?” Mesangki ira puu pompekakaakodo mokole anu mpo'angga ndi ondae, ”Ndi onae nahina maupo hapa ipinoweeako.”

⁴ Mesikeno iramo mokole, ”Isemake anu kongko a kintala atuu?” Tempo atuu i Hamani da'iaopo ihawe a kintala i bungkuno langkanaedo ta pauako ira mokole nine ta mesonsoakono i Modekai a ngkeu anu ipontadeomo tiano.

⁵ Mesangki ira puu pompekakaakodo mokole, ”I Hamani atuu anu mentade a kintala.” Dopotae mokole, ”Tenao ka ipewinso.”

⁶ Mansano mewinso i Hamani, mesikeno iramo mokole ndi onae, ”Hapake anu ta wineweu a mia anu inehedo mokole melangkaio?” Motae i Hamani i laro aroano, ”Ndi sema mbo'u inehedo mokole moweeakono pompelangkai anu laluaopo sekono ongkue?”

⁷ Onae pu'uno ka isangki i Hamani ndi ondae mokole, ”Mongkona mia anu pinekonamiu ipelangkaio,

⁸ asalakono inala sangka mokole anu wela pinakemiu, ka ngara anu wela pinesawikimiu, ka anu pinoweeako ramba-ramba poparentaa a uluno,

⁹ asalakono pineweengako sangka ka ngara atuu a ngkaeno asa mia inso i olodo luwuno anu langkai potorono ndi ondae mokole, luwuno ulea mokole, ka i'amba sangka atuu pinokonaako a mia anu pinekonamiu melangkaio, ka i'amba asalakono winawa mesawi a ngara atuu ka domentondao mia hadio telalo a tanalapano kota, saru mia mpeboo-booli i arono: kanandiomo iwineweu a mia anu pinekonado mokole melangkaio!”

¹⁰ Onaemo ka dopetena mokole ndi Hamani, ”Pompari-pari alao sangka ka ngara atuu, kana anu pinaumu atuu, ka weweuomo kanatuu ndi Modekai, to Yahudi anu mentoro a mpewowa langkai langkanae. Maupo te'asa mpali pau si laloo inso a luwuno anu pinaumu atuu.”

¹¹ Ka i'amba i Hamani umalao sangka ka ngara atuu ka ipokonaakono sangka atuu ndi Modekai, ka i'amba wawao i Modekai telalo a ntanalapano kota atuu, ka onae meboo-booli i arono, ”Kanandiomo iwineweu a mia anu pinelangkaido mokole.”

¹² Ka I'amba i Modekai mekule a mpewowa langkai langkanaedo mokole, sine i Hamani modadusi mekule i rahano saru masusa aroano ka mesoumbu.

¹³ Ka itutuluo i Hamani ndi Seresi, kombiano, ka a luwuno sambe'eno hapa anu pinembasaino. Mpotae iramo mia mponto'ori ka pande mpompewowolo ka i Seresi, kombiano, ndi onae, ”I arono i Modekai mompu'ukomo tedonda. Tewala i Modekai atuu inuledo to Yahudi, manasa nahi kopolio umewaio, tendeano mentee ntu'u kotedonta i arono.”

¹⁴ Kontongaado mpepau-pau saru onae, mehawe iramo sida-sidado mokole, ka do'amba ronga mewawao i Hamani a mpelimbua anu wineweuno i Esetere.