Esetere 4 - Wunta Mempori

I Modekai mepetulungi ndi Esetere tiado to Yahudi 4:1-17

¹ Mansano tumo'orio i Modekai luwuno anu gagi atuu, iberio sangkano, umarino atuu mompokona sawu po'inombo ka awu, ka i'amba meluarako melempa i tonga-tongano kota ka ipengese meroku ka masusa.

² Inso i ra'ai haweomo i arono pewowa langkai langkanaedo mokole, hangano maupo te'asa mia nahi moiko ipewinso a mpewowa langkai langkanaedo mokole mesangkaako sawu po'inombo.

³ Ia sompo-sompo wita, isua petena ka atorado mokole haweomo, hinao po'inomboa anu langkai i olodo to Yahudi tinondaako puasa ka ponsabangi; hadio mia mpowile sawu po'inombo saru awu pe'empehido mpoturi.

⁴ Tempono puu mpopekakaako ka pegawaino i Esetere mempauakono mongkona atuu, onaemo kai tedoa nahi rodo aroado mokole beine, ka i'amba mo'oliwi sangka kai pinokonaako i Modekai ka kai linohu sawu po'inombono inso ndi onae, sine nahi tarimao.

⁵ Onaemo i Esetere kai poboio i Hatahi, aasa mia pegawaido mokole anu pinakosi mekakaakono, ka i'amba meparenta sumikenoo i Modekai kai to'orio koa hapa pengkonaano ka hapa pu'uno mongkona atuu.

⁶ Ka i'amba meluaraoomo i Hatahi tepohaweakono i Modekai a ntanalapano kota anu i arono pewowa langkai langkanaedo mokole,

⁷ ka itutuluo i Modeki ndi onae luwuno anu pinembasaino saru ba opia hadiono salaka anu dinandino i Hamani ta tinimba tiano ponaapa arataado mokole gagi olino ponsolangia to Yahudi.

⁸ Ka mbo'u polimbano wunta atora anu linuarako i Susani ka domerinopu ondae atuu, ipeweengakono ndi Hatahi, ka ipopokitao ka ipauakono i Esetere. Ka i'amba i Hatahi tinena mbo'u mohaweo pe'oliwi ndi Esetere, ka ipe'aro ndi ondae mokole mo'ema pompehohawado ka umalaako ira tongkuno i arodo mokole.

⁹ Ka i'amba mewinsoomo i Hatahi ka ipohaweo pauno i Modekai ndi Esetere.

¹⁰ Sine i Esetere tumenao i Hatahi pauakono i Modekai,

¹¹ ”Luwuno pegawaido mokole saru palili a luwuno wita poparentaa mento'orio nine sompo tama ke beine anu me'aro ndi ondae mokole a kintala i larono ka nahi pinoboi, butu asa atora mpinolempa, onaemo hinuku mate. Butu mia anu ndi onae dotasiakono mokole tuko wulaa, anu ta kongko tuwu. Ka ongkue i larono tolu pulu oleo andio nahi kupinoboi me'aro ndi ondae mokole.”

¹² Mansano dompohaweo mia pauno i Esetere atuu ndi Modekai,

¹³ onaemo ka ipetena i Modekai mohaweo sangkino andio ndi Esetere, ”Si ko'aro-aroa, hangano omue a laro langkanaedo mokole, butu omue anu tola inso i olodo luwuno to Yahudi.

¹⁴ Hangano maupo omue i tempo andio butu merodo-rodo, a nto Yahudi ta koa hina mbo'u pontulungi ka tepotolaa inso a nsusuaano, ka omue saru pe'etumu komiu memasola. Isema tumo'orio, bara'ura hangano tempo anu kanandio omue mohawe potoro gagi mokole beine.”

¹⁵ Onaemo ka petena i Esetere mohaweo sangki andio ndi Modekai,

¹⁶ ”Lakomo, pumpu iramo luwu to Yahudi anu mekongko i Susani ka imempuasamo tiaku. Si mpongkaa ka si mpo'inu otolu oleo tehineno, moiko i tempono wongi, moiko i tempono meene. Ongkue saru luwuno beine puu mpopekakaakoku mbo'u, kami mempuasa kanatuu. Ka umarino atuu aku mewinso me'aro ndi ondae mokole, maupo mo'ewai atora. Tewala mansa aku mate, po'ineeomo kumate.”

¹⁷ Lumakoomo i Modekai ka iweweuomo kana anu i'oliwiakono i Esetere.