Esetere 3 - Wunta Mempori

Tinoono i Hamani rumopu ira to Yahudi

¹ Umarino luwuno anu gagi andio, i Hamani anano i Hamedata, to Agagi, pinoweeako pompelangkai inso ndi ondae mokole Ahasiwero, ka pangkano winuatako saru potorono pinakosi i wawono luwuno mia anu langkai potorono anu mekongko i arodo mokole.

² Ka luwuno pegawaido mokole anu a mpewowa langkai langkanaedo mokole, mpenggolontu mpesomba ndi Hamani, hangano kanatuumo peparentado mokole mongkona onae, sine i Modekai ka penggolontuu ka mesomba.

³ Onaemo ka dompotae luwuno pegawaido mokole anu a mpewowa langkai langkanaedo mokole ndi Modekai, ”Tembio kau ewaio parentado mokole?”

⁴ Mansano mararuomo domengkuahakono nahi perorongeako ira koa mbo'u, onaemo ka domempauakono i Hamani mongkona atuu ka ikitao, ta kanatuu mpiha peleluno i Modekai, hangano itutuluako iramo, nine onae to Yahudi.

⁵ Mansano kumitao i Hamani, nine i Modekai ka penggolontuu ka mesomba ndi onae, onaemo ka itedoa mokula aroano.

⁶ Sine ipekodeio lahi koroino ba butu koa i Modekai ta pinepateno, hangano domempauakonomo mia tongkuno i Modekai atuu. Gagi i Hamani mo'ungke akala ta rumopu ira luwu to Yahudi, onaemo tongkuno i Modekai atuu, a luwuno poparentaano i Ahasiwero.

⁷ I larono wula ko'asa, onaemo wula Nisani, i larono ta'u anu kohopulu ka orua tempo poparentaano mokole Ahasiwero, mia mpontende pur, onaemo undi i arono i Hamani, oleo me'eu oleo, wula me'eu wula hawe kai hawe a wula kohopulu ka orua, onaemo wula Adari.

⁸ Onaemo ka ipepau i Hamani ndi ondae mokole Ahasiwero, ”Hinao aasa tongku anu tuwu ntetia-tia ka tensia i olodo luwuno tongku i larono luwuno wita poparentaamiu ueku, ka songkado nahi mpengkena saru songkado luwuno tongku ka songkamiu mokole nahi domentondao, onaemo pu'uno nahi penunu omiu mokole mo'inee ira mpoweweu po'ehedo.

⁹ Tewala ipemoikoo mokole, ipoluarakomo wunta parenta ka domempinepate. Manasa atamiu ta mongkati salaka hopulu nsowu talenta ka meweengakono a kaedo luwuno mia anu hinao potorono, ka domewinsoo a mponaapa arataado mokole.”

¹⁰ Onaemo ka dolohuo mokole sinsi pontondoni inso a ntonisodo, ka dopeweengakono ndi Hamani anano i Hamedata, to Agagi, iwalido to Yahudi atuu.

¹¹ Ka i'amba petenado mokole ndi Hamani, ”Salaka atuu weweuomo po'ehemu, ka tongku mbo'u atuu weweuomo kana anu pinemoikomu.”

¹² Onaemo a wula ko'asa, i oleo anu kohopulu ka otolu, mempinoboi iramo luwuno puu mpoburido mokole, ka i'amba menunu saru luwuno anu iparentaako ira i Hamani, binuriomo wunta a luwuno saru ngkoroido mokole, a sompo bupati anu pabawaio wita ka sompo mia anu langkai potorono a tongku, onaemo a sompo-sompo wita montonda poburido ka a sompo-sompo tongku montonda paudo. Wunta atuu binuri a needo mokole Ahasiwero ka tinondoniako sinsi pontondonido mokole.

¹³ Luwuno wunta atuu inoliwi mesala a luwuno mia tinena anu magasi a luwuno wita poparentaa, ka domerinopu, pinepate luwu to Yahudi, inso anu mongura hawe anu mota'u, maupo nana'ote ka luwuno beine i larono asa oleo koa, a ntanggala hopulu ka otolu, wula kohopulu ka orua, onaemo wula Adari, ka irinontu arataado.

¹⁴ Polimbano wunta atuu, asalakono gagi atora a sompo wita, ka i'amba pinalele a luwuno tongku, ka dompepatinda a oleo atuu.

¹⁵ Onaemo ka dompodadu mpelungka luwuno mia tinena anu magasi atuu, a petenado mokole, ka atora atuu linuarako i larono bente Susani. Kontongaano atuu ondae mokole saru i Hamani mentoro ira mo'inu, sine kota Susani ntewuka iramo.