Esetere 2 - Wunta Mempori

I Esetere pinotoro gagi mokole beine 2:1-18

¹ Umarino anu gagi andio, mansano molusaomo tekudado mokole Ahasiwero, terorambe iramo mokole ndi Wasati, hapa anu pinogauno, ka otumpoudo ndi onae.

² Mpotae iramo tetenaado mokole anu mpo'angga ndi ondae, ”Asalakono mia mpo'ungkeako ira mokole, ana beine anu tekosi rupano.

³ Asalakono omiu mokole mompowee pabawa a luwuakoano wita poparentaamiu, ka dopumpu ira luwu ana beine anu tekosi rupano, i laro bente Susani, a raha po'iangado beine anu dinagaino i Hegai, sida-sida mokole anu dumagai ira beine. Asalakono dompemina-mina.

⁴ Ana beine anu pinemoikodo mokole, onaemo anu ta gagi mokole beine euno i Wasati.” Mongkona atuu dopemoikoo mokole, ka doweweuomo kanatuu.

⁵ I tempo atuu hinao i laro bente Susani aasa to Yahudi, anu meneeako i Modekai anano i Yairi anano i Simei anano i Kisi, aasa to Benami,

⁶ anu winawa inso i Yerusale gagi asa mia tinabua merongaakono i Yekonia, mokole Yehuda, tempono i Nebukanesa, mokole i Babeli wawao a pontadia.

⁷ I Modekai atuu anu tume'iao i Hadasa, onaemo i Esetere, anano pepaekompono amano, hangano nana'ote atuu elu-eluomo. Ana beine atuu tekosi koroino ka tekosi rupano. Tempono domate ineno ka amano, itandeo i Modekai gagi anano.

⁸ Mansano tepalele parenta ka atorado mokole, ka hadioomo ana beine pinumpu i larono bente Susani i dagai ira i Hegai, onaemo ka iwinawa mbo'u i Esetere mewinso a laro langkanaedo mokole anu dinagaino i Hegai, puu mpodagai beine.

⁹ Beine atuu tedoa moiko a pongkitano ka ipehohawaomo, onaemo kai ronga moweeakono mina-mina ka kaanga pinakosi ka opitu ira mbo'u ana beine tebiniki inso a laro langkanaedo mokole, ka i'amba lumimbao saru luwuno ana beine puu pompekakaakono a mpo'ianga anu lalu moiko a raha po'iangado beine.

¹⁰ I Esetere nahi pauo tongkuno ka insoano, hangano i'ontoo i Modekai.

¹¹ Sompo oleo i Modekai melempa-lempa i arono kintalano raha po'iangado beine atuu, kai to'orio koa kana'umpe teweweuno i Esetere ka hapa anu ta gagi ndi onae.

¹² Sompo-sompo tempo asa ana beine mohawe tia ta mewinso tepohaweako ira mokole Ahasiwero, ka se'eluno pinekakaako montonda atora tiado luwuno beine i larono hopulu ka orua wula, hangano luwuno tempo atuu domempakeo mpemina-mina: onoo wula dompopake lana mire ka onoo wula mbo'u dompopake lana kasai saru mina-minado beine anu susuano.

¹³ Ka i'amba beine atuu mewinso tepohaweako ira mokole, ka luwuno hapa anu inemano asalakono ta wineeako ka iwawao mewinso inso a mpo'iangado beine lumako i larono langkanaedo mokole.

¹⁴ I tempono ngkiniwia ipewinso ka tempono mo'oru ipekule, sine pohona andio i larono raha po'iangado beine anu ko'orua anu dinagaino i Sa'asagasi, sida-sida mokole, anu dumagai ira samburue. Onae nahi ineheako mbo'u mewinso tepohaweako ira mokole, sangkadio dopekonao mokole ka pinoboi neeno.

¹⁵ Tempono i Esetere anano i Abihaili, onaemo pepaekompono amano i Modekai anu tumandeo i Esetere gagi anano, mohawe tia ta mewinso tepohaweako ira mokole, onae nahina ineheno maupo hapamokoa, sangkadio anu ipauakono i Hegai, sida-sida mokole, anu dumagai ira beine. Onaemo ka dompehohawao luwuno mia anu kumitao i Esetere.

¹⁶ Kanatuumo i Esetere winawa mewinso tepohaweako ira mokole Ahasiwero a larono langkanaedo a wula anu kohopulu, onaemo wula Tebeti a nta'u anu ko'opitu a laro poparentaado mokole.

¹⁷ Mengkaa i Esetere dopehohawao mokole laluaopo sekono luwuno beine susua ka onae mohawe pompehohawado mokole laluaopo sekono luwuno ana beine susua, ranta dopokonaakono mokole ramba-ramba poparentaa a uluno ka dopotoroo gagi mokole beine euno i Wasati.

¹⁸ Umarino atuu doweweuomo mokole asa pelimbua luwuno mia langkai potorono ka pegawaido, onaemo pelimbua hangano i Esetere. Ondae mokole meparenta nami hina sima'ulu a luwuno wita ka pinoweeako pompowee kana'umpe pototodo mokole.

I Modekai tumo'orio asa tepo'asaa mosa'o 2:19-23

¹⁹ I tempono luwuno ana beine pinumpu anu kompenduano, i Modekai mentoro a mpewowa langkai a langkanaedo mokole.

²⁰ I Esetere nahi pauo insoano ka tongkuno kana iparentaakono i Modekai, hangano i Esetere moweweu mpiha montonda pauno i Modekai itempono da ite'iao.

²¹ I tempo atuu i Modekai mentoro a mpewowa langkai langkanaedo mokole, mahakiomo aroano i Bigitani ka i Teresi, orua ira sida-sida mokole anu tewinso bawaa puu mpodagai pewowa, ka do'amba montoo, ira mepateo mokole Ahasiwero.

²² Sine tinoodo mia atuu ipokonto'orio i Modekai, onaemo ka ipauakono i Esetere, mokole beine ka i Esetere pauako ira mokole a neeno i Modekai.

²³ Tinoodo mia atuu pinaresa ka mengkaa mentee, onaemo ka dosinonso mia orua ira atuu a ngkeu pinontade. Ka anu gagi atuu binuri a wunta sejara i arodo mokole.