Esetere 1 - Wunta Mempori

Mokole beine Wasati tinadi

¹ I tempo poparentaano mokole Ahasiwero i pabawaio asa etu rua pulu ka opitu wita, mompu'u i India hawe i Etiopia.

² Tempo atuu i mokole Ahasiwero mentoro a ngkadera poparentaano i larono bente Susani,

³ a nta'u anu ko otolu poparentaano, ondae mokole moweweu pelimbua luwudo anu langkai potorodo ka pegawaino. Sorodadu Peresia ka Media, ulea mokole ka anu langkai potorodo, mehawe i arodo mokole.

⁴ A mpelimbua atuu ondae mokole mopokitao pompoli ka marambano poparentaado ka tekosino marambano anu mangkilo, tehine ntu'u hawe asa etu ka halu pulu oleo.

⁵ Mansano sompoomo oleono atuu, ondae mokole moweweu mbo'u pelimbua luwuno palili anu mpo'ia i laro bente Susani opitu oleo tehineno, mompu'u a mia langkai hawe mia kodei, po'iangano a kintala anu kongko a langkanae poparentaa.

⁶ I tu'ai mperupa-rupa pelingo inso a nsawu lena, mori alusu, ka sawu wungo motu'a anu tinanggoako koloro lena alusu ka wungo mongura, ndinoe a mpandu-pandu salaka a luwuno karuno langkanae poparentaa inso a maramere mopute. Sekono poturia wulaa ka salaka ninaa a wawo horo puala, maramere mopute, kerabu ka puala menggori.

⁷ Inua pinatinda a piala wulaa mekaru anu mperupa-rupa sorano; ka anggorono onaemo anggoro inuado mokole anu hadio ntu'u kana pototodo mokole.

⁸ Tempo atuu atora mo'inu, onaemo: nahi dinadai, hangano kanandiomo parentado ira mokole a luwuno ata laro raha, ka dompoweweu montonda po'ehedo sompo mia.

⁹ I mokole beine Wasati mbo'u moweweu pelimbua luwudo beine i larono langkanaeno mokole Ahasiwero.

¹⁰ A oleo anu ko'opitu, tempono mawongko aroado mokole hangano mo'inu anggoro, doparenta iramo mokole i Mehumani, i Bisita, i Harabona, i Bigita, i Abagita, i Setari ka i Karakasi, onaemo opitu ira sida-sida anu mpo'angga i arodo mokole Ahasiwero,

¹¹ ka domewawao i Wasati, mokole beine, mompake ramba-ramba poparentaa, tepohaweako ira mokole ta mopokitao tekosino a luwuno palili ka a luwuno anu langkai potorodo, hangano ondae mokole beine tedoa tekosi rupado.

¹² Sine mokole beine Wasati nahi behe lumako tepohaweako ira montonda parentado mokole anu pinohawedo sida-sida atuu, ranta ka dotedoa tekuda mokole ka tensilaomo tekudado.

¹³ Onaemo ka dopesikeno mokole a luwuno mia anu pande mpompewowolo, luwuno mia anu mento'orio gau nse'elu, hangano kanatuumo biasano ba hinao anu nahi dopekonao mokole pinauako ira mia mpoto'ori gau ka songka.

¹⁴ Mia anu umpedaako ira ntu'u mokole, onaemo: i Karisena, i Setari, i Adimata, i Tarisi, i Meresi, i Marasena ka i Memukana, opitu ira mia anu pinelangkai i Peresia ka Media, anu pototono kumitao rupado mokole ka anu hinao potorodo mantande a laro poparentaa, mesikeno ira mokole,

¹⁵ ”Asalakono ira mbinioke mokole beine Wasati montonda atora, hangano nahi tondao parentado mokole Ahasiwero anu pinohawedo sida-sida?”

¹⁶ Onaemo ka ipotae i Memukana i arodo mokole ka luwuno anu langkai potorodo atuu, ”i Wasati, mokole beine, komba butu sala ndi ondae mokole, tendeano mbo'u a luwuno anu langkai potorodo, luwuno tongku anu i larono poparentaado mokole Ahasiwero.

¹⁷ Hangano pinogauno mokole beine atuu, ira mansa mpogauo luwuno beine, ranta ka nahi domperioo tamado, ba domempopauo a mia: I mokole Ahasiwero meparenta kai winawa mokole beine Wasati tepohaweako ira, sine nahi behe.

¹⁸ I oleo koa mbo'u andio kombiado luwuno mia langkai potorodo i Peresia ka i Media anu merongeo pinogauno mokole beine, ira mempauo anu gagi atuu a ntamado, ranta nahi hori menaa-naa pompokokodeia ka tekudaa.

¹⁹ Tewala ipemoikoo mokole, asalakono kai linuarako asa parenta inso ndi omiu mokole ka binuri a laro atora Peresia ka Media, ranta nahi ta pinokobali mbo'u, nine i Wasati inonto tepohaweako ira mokole Ahasiwero, ka ondae mokole ira meweengakono potorono gagi mokole beine a mia susua anu moikoopo sekono onae.

²⁰ Tewala otumpau anu inalado mokole andio teronge a luwuno poparentaado anu tedoa langkai, manasa luwuno beine ira mpelangkaio tamado, inso a mia langkai hawe a mia kodei.”

²¹ Pohaweno atuu dopemoikoo mokole saru luwuno mia langkai potorodo, gaagi doweweuomo mokole menunu saru pohaweno i Memukana atuu.

²² Mokole mo'oliwi iramo wunta a luwuno wita poparentaa, sompo-sompo wita montonda poburino ka sompo-sompo tongku montonda paudo, unino, ”Sompo tama asalakono gagi petewawa a nsomborino ka ipepau montonda paudo tongkuno.”