Esera 9 - Wunta Mempori

I Esera mangakuakono halado to Isaraeli a mpekakaino 9:1-15

¹ Umarino wineweu luwuno atuu, mehawe iramo mia mpinemota'u ndi ongkue, dompotae, ”Palili i Isaraeli, sando mpesomba, ka to Lewi nahi dotemponsia inso luwuno tongku i wita atuu, saru luwuno wineweudo anu mokoburu, onaemo inso to Kana'a, to Heti, to Perisi, to Yebusi, to Amoni, to Moabi, to Masiri ka to Amori.

² Hangano ondaedo ka anado, mpokombia iramo ana beinedo mia atuudo, ranta mpesaloomo inuleno anu mempori saru luwuno tongku i wita atuu, ka luwuno anu pinemota'u ka anu pabawa tese'elu mpoweweuo anu nahi penunu.”

³ Rumongeo pinau atuu, kuberio sangkaku ka lemba meloeku, kubutao wuu a uluku ka danggoku, ka ku'amba mentoro mompemasusa.

⁴ Mpepumpu iramo umpeda ndi ongkue luwuno mia anu mpondidi-ndidiako pau-Do Ue Alado to Isaraeli, hangano wineweudo mia mentinadi nahi penunu atuu. Sine kongkoku mentoro mompemasusa, hawe a tempono mpesomba ngkiniwia.

⁵ I tempono mpesomba ngkiniwia mentade aku umariku meurumako saru sangka ka lemba meloeku anu teberi, ka ku'amba menggolontu tumangaakono kaeku ndi Ondae i Ue, Ue Alaku,

⁶ ka kupotae, ”Oo Ue Alaku, mongkokoanuku ka mongkokolaro tumandeo rupaku ndi Omiu, oo Ue Alaku, hangano hala mami tehowuomo lumaloo ulu mami, ka sala mami haweomo i langi.

⁷ Mompu'u inso a uempu'u mami, ranta hawe oleo andio, sala mami tedoa langkai. Hangano lano hala mami, omami saru luwuno mokole ka sando mpesomba mami, mempineweengako a ngkaedo luwuno mokole, a mponai, a laro mpontawaa, ka a mpomurua, saru pompokokodei i arodo mia hadio, kana teweweuno oleo andio.

⁸ Sine kanandio-andio, da saraipo kimpohawe pompehohawa inso ndi Omiu Ue, Ue Ala mami ndi omami mia anu tepotola ka mowee kami po'ianga mami mpiha a mpo'ianga-Do anu mempori, ka Ipowee kami tedei sumanga tumuwu a laro ntepe'ataa mami.

⁹ Hangano maupo megagi kami ata, a ntepe'ataa mami, nahi Dohori binta kami Ue Ala mami, Doweweuo ka dompehohawa kami luwuno mokole i wita Peresia, ranta ka kimpohawe sumanga mewanguo Raha-Do Ue Ala mami ka wali mpontadeo anu terongka, saru mpohawe po'ianga pokongkomi-Miu i Yehuda ka i Yerusale.

¹⁰ Kanandio-andio, oo Ue Ala mami, hapa kami mpotae umarino luwuno atuu? Kimebintaomo parenta-Miu,

¹¹ anu pinohawe-Miu telalo a luwuno tetenaa-Miu, nabi atuu, kanandio, ’Wita anu komiu mpewinso mpetorokio onaemo wita anu mokoburu hangano mokoburuno tongku anu mpo'ia i wita atuu. Hangano mokoburudo luwuno wita atuu bukeako luwuakoano mokoburudo inso i tompano hawe i tompano.

¹² Gagi, simpoweeako ira ana beinemiu a ana ntamado ke mpo'ala ana beinedo weeako ira ana ntamamiu. Si mehori pompewowolo komiu mpokomanangai ira, ka imemoroso, mperapio hasilino wita anu moiko, ka mopo'umbuako ira anamiu wita atuu ranta nahina tampulaano.’

¹³ Unarino luwuno anu pinembasai mami hangano wineweu mami anu mosa'o ka sala mami anu langkai, Omiu, oo Ue Ala mami, nahi pohuku menunu saru hala mami, tendeano ka Ipowee kami pompehohawa ka Ikadudui kami luwuno mia andio,

¹⁴ kana'umpe da kami me'ewaio parenta-Miu ka mpekokombia saru luwuno tongku anu mokoburu andio? Nde nahi Komiu tekuda ndi omami, ranta kami mepingko memate, ka nami hina anu tuwu ke tepotola?

¹⁵ Oo Ue, Ue Alado to Isaraeli, Omiu tedoa mentee, hangano da ipo'inee kami mentuwu gagi mia tepotola, kana anu gagi kanandio-andio. Kitaomo, omami mpe'aro ndi Omiu saru sala mami, kahinaano a laro nteweweu kanandio nahina mia mokompentade i aro-Miu.”