Esera 8 - Wunta Mempori

¹ Ndiomo luwuno petewawa suku ka burino luwuno mia anu mpekule meronga saru ongkue inso i Babeli, itempono poparentaano i mokole Aritahasasita:

² Inso a inuleno i Pinehasi, i Geresomi; inso a inuleno i Itamari, i Danieli; inso a inuleno i Daudi, i Hatusi

³ anano i Sekania; inso a inuleno i Parosi, i Sakaria, ka meronga saru onae, asa etu lima pulu mia tama anu teburi a mpoburia;

⁴ inso a inuleno i Pahati-Moabi, i Elio'enai anano i Seraya, ka meronga saru onae rua etu mia tama;

⁵ inso a inuleno i Satu, i Sekania anano i Yahasieli, ka meronga saru onae, tolu etu mia tama;

⁶ inso a inuleno i Adini: I Ebedi anano i Yonata, ka meronga saru onae lima pulu mia tama;

⁷ inso a inuleno i Elami, i Yesaya anano i Atalia, ka meronga saru onae pitu pulu mia tama;

⁸ inso a inuleno i Sepatia, i Sebadia anano i Mikaeli, ka meronga saru onae halu pulu mia tama;

⁹ inso a inuleno i Yoabi, i Obaja anano i Yehieli, ka meronga saru onae rua etu hopulu ka oalu mia tama;

¹⁰ inso a inuleno i Bani, i Selomiti anano i Yosipia, ka meronga saru onae asa etu nomo pulu mia tama;

¹¹ inso a inuleno i Bebai, i Sakaria anano i Bebai, ka meronga saru onae rua pulu ka oalu mia tama;

¹² inso a inuleno i Asagadi, i Yohanani anano i Hakatani, ka meronga saru onae asa etu hopulu mia tama;

¹³ Ka i'amba inso a inuleno i Adonikami anu mehawe lembui, ndiomo needo: i Elipeleti, i Yehieli, saru i Semaia, ka meronga saru ondae nomo pulu mia tama;

¹⁴ ka inso a inuleno i Bigiwai, i Utai saru i Sabudi, ka meronga saru ondae pitu pulu mia tama.

¹⁵ Kupumpu ira umpeda a ngkorono anu waa lumako i Ahawa ka i ra'ai mpekema kami, otolu oleo tehineno. Mansaku mekokoongako ira palili ka luwuno sando mpesomba, nahi kupohawe mia inso a inuleno i Lewi i olodo.

¹⁶ Onaemo pu'uno kutena ira i Eliese, i Arieli, i Semaia, i Elinatani, i Yaribi, i Elinatani, i Natani, i Sakaria, ka i Mesulami, luwuno petewawa atuu i Yoaribi ka i Elinatani, puu pompaguru atuu,

¹⁷ saru pe'oliwi tiano i Ido, petewawa i asa mpo'ianga, anu meneeako Kasipia. Kupauako ira hapa anu ira mempauakono i Ido ka luwuno pepaekompono anu mpo'ia iramo i tu'ai, i wita Kasipia, ka dompotenaa kami mia anu mpopekakaako i raha-Do Ue Ala mami.

¹⁸ Ka i'amba hangano moikono kae-Do Ue Ala mami kumongkomi kami, domentenaa kami: i Serebia, mia anu hadio ponto'orino inso a inuleno i Mahali anano i Lewi anano i Isaraeli, saru luwuno anano ka pepaekompono, hopulu ka oalu mia.

¹⁹ I Hasabia saru i Yesaya, inso a inuleno i Merari, ka luwuno pepaekompono saru luwuno anado, rua pulu mia.

²⁰ Ka inso a mpuu pompekakaako i Raha-Do Ue Ala, anu i ndi'ipua ipakosiomo i Daudi ka luwuno anu langkai potorono mpopokowali anggaado to Lewi, rua etu ka rua pulu mia, sompo mia teburi neeno.

²¹ Ka i'amba i ra'ai, i wiwi ngkorono Ahawa atuu, kupopoto'orio puasa ka kimpe'urumako i aro-Do Ue Ala mami ka mo'ema ndi Ondae ka Dokongkomi kami a pelempaa saru sombori mami ka luwuno arataa mami.

²² Hangano mo'o'anuku mo'ema sorodadu ka sorodadu mpengara ndi ondae mokole anu ta dumagai kami inso a iwali a mpelempaa mami, hangano mpotae kamimo ndi ondae mokole, kanandio, ”Kae-Do Ue Ala mami kumongkomio luwuno mia anu mo'ungke moikoano ndi Ondae, sine pabawa-Do mompotii tekuda-Do a mia anu mebungkui Ira.”

²³ Gagi mempuasa kamimo ka mpo'emao ndi Ondae i Ue, ka Do'ihiio po'ema mami.

²⁴ Umarino atuu, kuponsiao hopulu ka orua petewawado sando mpesomba, i Serebia ka i Hasabia saru hopulu mia inso i olono pepaekompodo.

²⁵ Kupotimbaako ira salaka, wulaa ka luwuno parewa onaemo pesomba susua tiano Raha-Do Ue Ala mami, anu pinesombaakodo mokole, saru puu mpompatududo, ka luwuno anu langkai potorono ka luwudo to Isaraeli anu kongko i ra'ai.

²⁶ Motimbaa aku mbo'u meweengakono ndi ondae: salaka nomo etu ka lima pulu talenta, parewa salaka me'oli asa etu talenta, wulaa asa etu talenta,

²⁷ ruapulu piala inso a wulaa me'oli asa nsowu dirihami ka orua parewa inso a mala ntu'u anu mangkilo ka tekosi kana wulaa.

²⁸ Ka ku'amba motaeako ira, ”Omiu mempori ndi Ondae i Ue, ka luwuno parewa mbo'u andio mempori, salaka ka wulaa andio onaemo pesomba a moleono aroa, tia-Do i Ue, Ue Alado uempu'umiu;

²⁹ Impekakaakono ka impekariao, ranta kai mpokotimbao i arodo luwuno petewawado sando mpesomba, saru luwuno to Lewi ka luwuno petewawa pepe'etuado to Isaraeli i Yerusale, i laro luwuno bolongkono raha-Do i Ue.”

³⁰ Ka do'amba luwuno sando mpesomba ka luwuno to Lewi mentarimao salaka ka wulaa ka luwuno parewa anu tinombaomo atuu, kai winawa i Yerusale a raha-Do Ue Ala mami.

Hawe i Yerusale 8:31-36

³¹ Ka ki'amba mpelungka inso i Koro Ahawa, tanggala hopulu ka orua wula ko'asa, melako i Yerusale, ka kae-Do Ue Ala mami kumongkomi kami, ka moko'olaiakami iwali ka puu porontu a nsala.

³² Mehawe kamimo i Yerusale ka mpenaa-naa kami, otolu oleo tehineno.

³³ Ko'opaa oleono, salaka ka wulaa ka luwuno parewa atuu, tinimba i larono Raha-Do Ue Ala, domedagaio sando mpesomba i Meremoti anano i Uria, saru i Eleasa anano i Pinehasi. Ka to Lewi atuu meronga saru ondae, onaemo i Yosabadi anano i Yesua ka i Noaja anano i Binui.

³⁴ Luwuno dinoa ka tinimba ka mobeano binuri.

³⁵ I tempo atuu, luwuno mia anu mpekule inso a mpontawaa, anu mpekule inso a pontadia, mpopesombaako ira pesomba tinunu ndi Ondae Ue Alado to Isaraeli: sapi lakino hopulu ka orua tiano luwudo to Isaraeli, bimba lakino sio pulu ka onoo, ana bimba pitu pulu ka opitu, luwuno gagi pesomba tinunu tia-Do i Ue; ka hopulu ka orua mbo'u bembe lakino gagi pesomba po'onini hala.

³⁶ Wunta parentado mokole pinohawe mbo'u a luwuno guberenuu ka bupati a mpoparentaa i sumooano oleo Koro Eparata, ka luwuno mia atuudo mpepokowali a tongkuto ka a raha-Do Ue Ala.